1 Ligía lariñagunbei Dawidi:

—Yaaboun litenpulun Bungiu, luma latarü lun adagaragüdüni gudawarügüti lun Ísüraeli.

2 Lárigiñe aba lóundaraguagüdüniña Dawidi terencha ha aganóubaña Ísüraeli, aba líchugun nadagimeintiña dübü lun habouhan dübü lun tábunawagun litenpulun Bungiu. 3 Aranseti giñe Dawidi saragu gürabu lun lügürabuna bena luma gürapa; luma giñe saragu buronse, 4 luma wewe le hibúari gíbeti ladüga barütiña meha lílana Sidón luma Tiru saragu wewe le hibúari lun.

5 Lariñaga Dawidi lúnguarügü: «Salomón le niráü, ñǘraügili ani ténpulu to lunboun tábunawagun lun Bungiu, gasu tuguyaba lan wéiritima, díseme laganbahoun luagu tiri ani wéndetima ubouagu; naranseraali lubeiti sun katei lubá».

Ligía lébubei laransehan Dawidi tubá ténpulu lubaragiñe lounwen. 6 Lárigiñe aba lagúarun lun Salomón le liráü, aba líchugun dimurei lun, lun lábunaguboun tan litenpulun Bungiu le Lubungiute Ísüraeli, 7 lariñaga lun:

—Niráü, anihein yebe buga naritagunrugu lun nábunagun aban ténpulu lun Bungiu le Nubungiute. 8 Gama lumoun ariñagaali Bungiu nun: "Arihaadina luagu wiyuhadibu lan saragu hitaü, ani awuribuhaadibu lan saragu; ligía mámaba lubéi buguya ábunagua ténpulu nun. 9 Gama lumoun garaübadibu aban wügüri irahü, le lunbei ábanbei lan wügüri darangilati; ani nadügüba giñe lun mañawarihan hamá láganiñu lun lidan ni aban fulasu. Ligía Salomónba lubéi liri, níchuguba ñuruguaü luma darangilaü lun Ísüraeli lidaaniwagu. 10 Ligíaba ábunagua ténpulu nun. Ábanbei isaani nun, aume aban úguchili lun, nederebudagüdübei larúeihan lun súnwandan Ísüraeli".

11 —Guentoti niráü, bumalá Bungiu lun bábunaguboun lan litenpulun Aburemei le Bubungiute kei füramaselani badügübei lan. 12 Rula Bungiu lualin ichügü luma lichú aau bun lun danme lan líchugunibu lun barúeihan Ísüraeli, gúnfuli báamugei lilurudun Aburemei le Bubungiute. 13 Buídubei lasalirun sun katei bun, ánhabu áfaagua bagunfuliruni lúrudu le líchugubei Bungiu lun Moisesi lun Ísüraeli. Áfaaguaba, ganigi buguyame; gaguraasunbá manufude buguyame! 14 Lau saragu áfaaguni óundaraadina lubá tábunawagun litenpulun Bungiu: Ǘrüwa-milu-ǘrüwa-san tonelada golu, darandi-ǘrüwa-milu tonelada pülata, luma saragu gürabu luma buronse darí lun siñá lan lamisurahóun. Óundaraadina giñe wewe luma dübü, bíchigame lanwoun. 15,16 Bóugudin luéi lira, añahein saragu nadagimeintiña buma, nadagimeintiña dübü, ábunagutiña muna, sarafangei hama saragu wügüriña ha buítiña lidan sun luwuyeri wadagimanu lauti golu, pülata, buronse luma gürabu, buadigimarida lubeiti ani íderagualabu Bungiu!

17 Lárigiñe aba lariñagun Dawidi houn sun ábutigu Ísüraeli lun híderaguni Salomón le liráü, lariñaga houn:

18 —Húmañahañein Aburemei le Hubungiute, rúhali ñuruguaü hun lidan sun fulasu, lugundun ru laaña lílana ageiraü labun nubafu, ani rédeiha lábugiñe lererehan Bungiu hama lumutuniña. 19 Rugua humá lubeiti hungua lun háluahani Aburemei le Hubungiute. Aranse humá lubeiti lun hábunagunu lisanduariun Bungiu, lun hanügünu lubagüsina lidaradun luma umegeni sagüráuti le lani Bungiu tidoun litenpulun to lunboun tábunawagun lun.