1 Aba lóundaruniña Dawidi sun gumadimatiña Ísüraelina uburugu Herusalén, hábutigu türibu, hábutigu súdaragu ha eseriwidubaña lun urúei, gumadangu, úfisigu, ha óunigirubalin lumúan hama libiñanigu urúei hama lirahüñü, gürigia burí ha íñugutimabaña hama sun súdaragu íñugutiña.

2 Ábati lararamun Dawidi, aba lariñagun:

—Aganba humana níbirigu: Anihein yebe meha lidan naritagun lun nábunagun aban muna lun hamuga ñeinboun lan lubagüsina lidaradun Bungiu súnwandan, lun hamuga giñe ñeinba lan líchigei Wabungiute lálana larúeihan, ani aransedina yebe lun nábunagunu muna tuguya. 3 Gama lumoun aba lariñagun Bungiu nun: "Mámaba buguya ábunagua ténpulu nun, lugundun wuriburuguna buguya ani gíbeeña gürigia báfarun. 4 Gama lumoun, anúadira lumutina Bungiu le Lubungiute Ísüraeli hádangiñe niduheñu lun líchuguniña lurúeiteme Ísüraeli lun súnwandan. Anúadira lumuti lani Hudá türibu keisi türibu agumadihati; hádangiñe lani Hudá türibu anúadira lumutiña niduheñu; hádangiñe níbirigu, anúadira lumutina lun urúeibadina lan lidan sun Ísüraeli. 5 Guentoti, hádangiñe sun nisaanigu kei híbebei líchugun Bungiu nun, anúadira laali Bungiu niráü le Salomón lun larúeihan Ísüraeli".

6 —Ariñagati giñe Bungiu nun: "Salomón le biráü, ligíaba ábunaguoun nitenpulun luma nibürürün, lugundun anúadira naali keisi niráü, ani ábanbadina úguchili lun, 7 nederebudagüdübei larúeihan lun súnwandan. Anhein ítarameme luba lubéi agunfulirei nugumadin kei ladügüni chülǘ lumoun weyu le uguñe".

8 —Guentó lubeiti, ligibugiñe sun Ísüraeli, hagibugiñe lidamurin Bungiu ha luma ligibugiñe Bungiu le aganbagubei woun, gúnfuli huméi sun lugumadin Bungiu tau sun hanigi, lun hanimémebei lan ageiraü wéndeti le, lárigiñe ábame hígiruni houn hirahüñü halaganteme. 9 Buguyati Salomón, niráü. Subudibéi Bungiu le Habungiute bagübürigu, seriwibéi tau sun banigi luma lau ugundani, lugundun ariha lumuti Bungiu sun aritaguni, subudi lumuti sun le lídanbei wasaminan. Anhein lubeiti báluaha Bungiu, badarirubei; gama lumoun ánhabu adireira luéi, lígirubadibu lun súnwandan. 10 Subudibéiti guentó luagu anúadira láadibu lan Bungiu lun bábunagun aban muna lun lun lúbanme. Gaguraasunbá lubeiti, adügabéi wadagimanu!

11 Ábati lederegerunu Dawidi pülanu lun Salomón to lani tibürürün ténpulu, muna to lareidaagüle éigini, sun lasali luma Fulasu le Sándutimabei, le ñein lubéi ferudunawa lan figóu. 12 Ru lumuti giñe wadagimanu lun luagu sun le laritagubei lun tibürürün ténpulu, luma burí rumu le lunbei geyegubei lan lau, irisini luma lagei idewesei le sagüráubei, 13 tuma giñe burí rumu lun lidaani heseriwidun fádirigu Lewitagu luma sun eseriwiduni ténpulurugu, luma giñe lun sun ílagu le lánina kultu ténpulurugu.

14 Ruti giñe saragu golu luma pülata lun, lun sun ílagu golu luma pülata le lunbei layusurúniwa lidan kultu; 15 lun burí lebu sanudelu lau sun lilanpun, dandu le golu kei le pülata, ru lumuti lun según lihürü kada aban; 16 Ligiaméme giñe ladüga lun kada aban lídangiñe dábula, dandu le golu kei le pülata le lunbei ñeinba lan tichugúa fein anuadirúatu aban tárigi aban. 17 Ruti giñe golu lun lun lubuñame burí fígiedu, bésini luma fudu, luma saragu golu, lubuñame burí weru luma pülata le lauti golu luma le lauti pülata según lihürü kada aban. 18 Ruti giñe saragu golu afinuhóuaali lun lubuñame latarü le lebu kupali; ru ligía golu lun lun tubuñame karü, hameme kátaña garünatiña ha adouragubaña tau lubagüsina lidaradun Bungiu lau harüna.

19 Sun le, bürüwañu liña meha kei lariñaguni Bungiu lun Dawidi lidan luénedü, ñein lubéi lariñawagúa sun burí wadagimanu le lunbei ladügǘn según tarufuduni pülanu.

20 Ábati lariñagun Dawidi lun Salomón:

—Ganigibá deregüda buguyame, adügabéi wadagimanu! Mábürühala barüna manufude buguyame, lugundun búmabei Bungiu le Nubungiute! Mígirun lubadibu bábugua darí lagumuchun sun wadagimanu lun eseriwiduni le tani ténpulu. 21 Aranseñu liña lidaani heseriwidun fádirigu hama Lewitagu ténpulurugu. Híderagubadibu giñe sun hawuyeri lau hagundan lidan sun wadagimanu, subudihabútiña lun sun luwuyeri eseriwiduni, ábutigu hama sun lílana fulasu.