1 Aba tanügǘn lubagüsin Aburemei tidoun kianpu to lábunaguboun Dawidi tubá. Lárigiñe aba lichugúniwa adagaragüdüni gudawarügüti luma adagaragüdüni lánina arandaruni ligibugiñe Aburemei, 2 lásurun ladagaragüdüni Dawidi, aba labiniruniña gürigia lidan liri Aburemei, 3 aba líchugun aban fein, aban durudia tautu lin yaraüwa tuma aban tautu pasa lun kada Ísüraelina, wügüriña würiña.

4 Írida lumutiña Dawidi Lewitagu ha lúnbaña heseriwidun tigibugiñe lubagüsin Aburemei lun hagíaba lan íchiga eteingiruni luma eremuhani lun Aburemei le Lubungiute Ísüraeli. 5 Asafü, ligía ábutibei, lárigiñe, Sakaríasi, lárigiñe Heieli, Semiramótu, Heieli, Matatíasi, Eliabü, Benaíasi, Owedi-edomu luma Heieli, ha táubaña sun tuwuyerigu árüpa. Asafü áfarubalin pülatíyu. 6 Benaíasi luma Haasieli ha fádirigu, hagía íñaahabaña fidu tigibugiñe lubagüsina lidaradun Aburemei.

7 Lídanmeme weyu ligía lariñaga Dawidi luagu furumiñeti wéiyaasu lun líchugun Asafü hama lánigu eteingiruni lun Aburemei ítara.

8 «Ru humá eteingiruni lun Aburemei!

Hadimureha luagu liri!

Habahüdagua houn gürigia luagu sun le ladügübei.

9 Heremuha lidan liri.

Hadimureha luagu burí luéinamun

katei le ladügübei!

10 Hapantaha lau liri

Gúndaata hanigi ha áluahabalin Aburemei!

11 Ñübuin humá lumoun Aburemei,

áluaha huméi lubafu;

ñübuin humá lumoun Aburemei súnwandan.

12 Haritagua humá luagun luéinamun

luma lanarime burí katei le ladügübei

luma burí le lariñagubei:

13 Huguya, ha ladügawagun Ísüraeli le lubúein Aburemei,

huguya ha lirahüñü Hakobu,

huguya ha lanúadirubaña.

14 Ligía Waburemebei le Wabungiute;

ligía agumadihabei lidan sun ubóu!

15 Ni anhein ásügüra milu inebanfangu

mabulieidun lubéi lidaradun,

16 daradu le buga ladügübei luma Abüraámü,

fiñún le buga ladügübei lun Isaakü.

17 Ani gufirümalei keisi lúrudu lun Hakobu,

keisi daradu magumuchaditi lun Ísüraeli,

18 dan le lariñagunbei:

"Níchugubei Kanán bun keisi balagante".

19 Lau sun meha mibe hamá,

fiuraü terencha fulasurugu,

20 ha éibudügütiña lídangiñe aban néchani lidoun aban,

lídangiñe aban arúeihani lidoun aban,

21 mígirunti Aburemei lun hamudirawagun;

ariñagati houn urúeigu:

22 "Maguura humá hawagu ha anúadira náañabaña,

móuseragun humañame nani profetagu".

23 Heremuha lun Aburemei sun huguya lílana ubóu,

hadimureha sagü weyu luagu lesefuhan.

24 Hadimureha luagu luéirigun

hagibugiñe sun néchanigu,

luma luagu katei buiti le ladügübei

hagibugiñe sun gürigia.

25 Lugundun wéiriguti Aburemei

ani garichati lun leremuhóun lun,

hanarimeti hawéi sun búngiugu.

26 Ni kata búngiugu ha habungiutegu híbiri gürigia,

ánheinti Wabureme, ligía adügübalin sielu.

27 Anihein óunwenbu larugounga liñúarü!

Anihein ubafu luma ugundani lúbiñe.

28 Ru huméi liseinsuna gumadi lun Aburemei

ru huméi ubafu luma uéiriguni lun Bungiu;

29 ru huméi uéiriguni le ladünabei Aburemei lun

chülǘ humá lumoun lau idewesei,

hudugua humá lun Aburemei tidan tuenden lisanduariun.

30 Adadagaralá sun ubóu ligibugiñe!

Ligía ederebudagüdübalin ubóu lun mánhingichun lan.

31 Gundaagualá sielu luma ubóu!

Ariñaga hamá néchanigu:

Aburemei urúeibei!

32 Ladürürüha barana lau sun le lídanbei!

Gundaagualá áraabu lau sun le lídanbei!

33 Wáguala burí tídibu wewe le dabíararugubei lau ugundani

ligibugiñe Aburemei,

le anitebei lun lagumadihan ubouagu.

34 Ru humá eteingiruni lun Aburemei,

ladüga buiti Bungiu,

ladüga magumuchaditi línsiñehabu.

35 Ariñaga humá lun:

"Sefubáwa Aburemei Wabungiute le wasalbaragüle!

Budabawa, sefubáwa hádangiñe néchanigu

eremuha wamaamuga lun biri le Sándubei,

alawaha wamaamugabu lau ugundani!"

36 Biniwalá Aburemei le Lubungiute Ísüraeli,

lun súnwandan!»

Aba hóunabun sun lílana fulasu ariñaga: «Ítarala!» Aba halawahani Aburemei.

37 Ábati líchuguni Dawidi Asafü hau lánigu tigibugiñe lubagüsina lidaradun Aburemei lun heseriwidun ñein mararamagunga, según le emegeiruti sagü weyu. 38 Ru lumuti giñe Owedi-edomu hau lánigu, ǘrüwa-wein-widü gürigia, luma Owedi-edomu le liráü Hedutún, labu Osá, óunigira bénabu. 39 Ru lumuti Sadoku hau lánigu ha fádirigu tigibugiñe likianpun Aburemei tidan ténpulu to Gabaónboun, 40 lun híchugun adagaragüdüni gudawarügüti merederagunga lun Aburemei luagu latarü le lánina adagaragüdüni gudawarügüti, binaafin luma rábounweyu, ítara kei bürüwañu lan lidan lilurudun Aburemei, le líchugubei lun Ísüraeli keisi gumadi. 41 Ígira lumuti giñe Emán hama, Hedutún, hama ha híbiri anuadirútiña lun heremuhan ítara: «Ru humá eteingiruni lun Aburemei, ladüga magumuchaditi línsiñehabu». 42 Ábaha híñaahan fidu áfara hagía pülatíyu lun leremuhóun lun Aburemei. Lirahüñü Hedutún arihubaña lau bena.

43 Lárigiñe aba hagiribudunga hábiñoun, aba giñe lagiribudun Dawidi lúbiñoun lun labiniruniña liduheñu.