1 Aba labusenrun Mafia líchugun turobuli houn Ísüraelina aba línchahani Dawidi lun labahüdüniña Ísüraelina. 2 Ábati lariñagun Dawidi lun Hoabü luma houn ábutigu fulasurugu:

—Heiba, ábame habahüdüniña Ísüraelina lúmagiñe Bérüsewagiñe darí Dan, ábame hiabin subudi náamugei átiriñanu lan.

3 Gama lumoun lariñaga Hoabü lun:

—Gánwoungüdalaña Bungiu lumutuniña san wéiyaasu. Nurúeite, ma funagia hubúeingu sun ha? Kámegia labusenrei urúei katei le, le lunbei lañawarihani Ísüraeli?

4 Lau sun lira, héretimati lererun urúei luéi Hoabü, aba lidin Hoabü abahüdaña Ísüraelina, lárigiñe aba lagiribudun Herusaléun. 5 Aba líchugun Hoabü dimurei lun Dawidi luagu átiriñanu lan Ísüraelina. Hadan sun Ísüraelina ñéinñanu aban-míñunu-san-milu wügüriña ha gayaraahali houdin wuriburugu, hama gádürü-san-ǘrüwa-wein-diisi-milu Hudá. 6 Gama lumoun mabahüdǘntiña lani Lewí hama lani Benhamín türibu hadan, ladüga magundanti Hoabü lau le lariñagubei urúei.

7 Wuribati larihín sun katei le lun Bungiu, aba lóunahan aban abeichúni luagun Ísüraeli. 8 Gama lumoun aba lagufeserun Dawidi lun Bungiu, lariñaga:

—Adügaadina aban óunwenbu figóu. Gama lumoun ayumuraguatina bun lun ferudunabani nifigoun, lugundun nadügüni le nadügübei kei aban ibidiougua tau.

9 Ábati lariñagun Bungiu lun Gadü, profeta le eseriwidubei lun Dawidi:

10 —Beiba lumoun Dawidi nun, bariñagame lun luagu anihein lan ǘrüwa katei níchugun ligibugiñe, lun lan lanúadirun ka lan lídangiñe labusenrubei nadügün.

11 Aba lidin Gadü lumoun Dawidi, lariñaga lun:

—Anuadahabá aban 12 lídangiñe ǘrüwa katei le: Ǘrüwa irumu ilamaü, ǘrüwa hati hau báganiñu éibaahabu, ǘrüwa weyu lau sandi fulasurugu, lau lani Bungiu ánheli adaagua wuribani hadan lílana Ísüraeli. Ariñagabéi lubeiti nun ka lan bóunabagülebei, ariñaga náamugei lun le óunahabalina.

13 Lariñaga Dawidi lun Gadü:

—Wéiriti igarigu le gádanbalina. Gama lumoun himei numuti lun nábürühan lúhaburugun Bungiu, lugundun wéiriti lareini, mama lun nábürühan háhaburugun wügüriña.

14 Ábati lóunahan Bungiu aban sandi hawagun Ísüraelina, aba hóunwegun ǘrüwa-wein-diisi-milu hádangiñe Ísüraelina, 15 Aba lóunahan Bungiu aban ánheli lun lagünrinchaguni uburugu Herusalén. Gama lumoun dan le ñeinñein lubéi ánheli ligía agünrinchaguei, aba larihini Bungiu, aba lasakürihan, aba lariñagun lun ánheli ligía:

—Buídurügaali, rédeibei búhabu!

Lidan oura ligía lubaduñein fulasu le ñein lubéi léfereha Orunán le Hebusuna türigu lani Bungiu ánheli ligía. 16 Dan liñurunbalin Dawidi larihin, aba larihini lani Bungiu ánheli labadinagua sielu luma múa tau aban eféin lúhaburugu, larufudun luagun uburugu Herusalén. Ábati labuluchagun Dawidi hama ábutigu dagá herebe múarugu tau hadaüragun to súsutu.* 17 Aba lariñagun Dawidi lun Bungiu:

—Au óunahabei abahüdaña Ísüraelina! Au afigouhabei! Kagia wuribati hadügübei fugiabu gürigia ha? Bungiu Baba, ayumuraguatina bun lun au lan babeicha hama niduheñu, gama lumoun hebé báfaraguniña bumutuniña.

18 Ábati lariñagun lani Bungiu ánheli lun Gadü lun lariñagun lun Dawidi lun ladügün aban latarü lun Bungiu lidan fulasu le ñein lubéi buga léfereha Orunán le Hebusuna türigu. 19 Ábati lidin Dawidi adügei le lariñagubei Bungiu lun liyumulugugiñe Gadü. 20 Kei ñeinñein lubéi Orunán éfereha türigu, dan le ladigiragunbei ariha laali ánheli, ánhañati gádürü lisaanigu ha lúmabaña ñein, ñǘdünha buga aramudagua. 21 Dan le layarafadunbei Dawidi ñeinhin lubéi Orunán, aba larihini Orunán Dawidi, aba láfuridun ñéingiñe lubéi léfereha türigu, aba labuluchagun ligibugiñe Dawidi. 22 Ábati lariñagun Dawidi lun Orunán:

—Rubei fulasu le ñein lubéi béfereha türigu nun, lun nadügün aban latarü lun Bungiu ñein, alugurabéi nun luagu lebegi, gidá láamuga sandi fulasurugugiñe.

23 Lariñaga Orunán lun:

—Barǘ huméi fulasu nurúeite, adüga huméi le habusenrun lau. Níchugubaña bágasu wügüriña hun lun adagaragüdüni gudawarügüti, fulansu lun watu tuma türigu lun idewesei. Níchugubei sun le hun, nurúeite.

24 Gama lumoun lariñaga Dawidi lun:

—Seremei numutibu, gama lumoun gasu nagañeihani sun le luagu lebegi, magida nubéi le bani buéi lun níchuguni lun Bungiu keisi adagaragüdüni gudawarügüti le mafayeihantina ni kata luagu.

25 Aba lubeiti lafayeiruni Dawidi lebegi fulasu ligía lun Orunán, keinsi líburu golu, 26 ábati ladügün Dawidi aban latarü lun Bungiu aba líchugun adagaragüdüni gudawarügüti luma adagaragüdüni le lánina arandaruni. Lárigiñe aba lamuriahan ídemuei luma Bungiu, lóunabeiti Bungiu lau watu gemeti le siélugiñeti ligibuagun latarü le ñein lubéi adagaragüdüni. 27 Ábati lariñagun Bungiu lun ánheli lun lareidunu lefeinte.

28 Lidan oura ligía, dan larihinbei Dawidi luagu óunaba laali lan Bungiu lidan fulasu le ñein lubéi léfereha Orunán türigu, aba ladagaragüdün ñein. 29 Lau sun anuhein lan buga muna to ladügüboun Moisesi lun Bungiu lidan fulasu mageirawati, liabin latarü le lebu adagaragüdüni gudawarügüti tídanñein sanduariu to Gabaónboun, 30 Siñati lidin Dawidi ñein lun lálügüdahan luma Bungiu, lugundun buinha buga lau anufudei lau larihinu lefeinte lani Bungiu ánheli.