1 Dan le aranseguaali Dawidi lungua tidan lani palasiu, aba lariñagun lun profeta Natán:

—Arihabá san, au, tidan palasiu lautu hibúari naganawa, anhoun lubagüsina lidaradun Bungiu tidanñoun aban kianpu.

2 Aba lóunabuni Natán lariñaga lun:

—Adügabéi le baritagubei, lugundun anihein Bungiu buma.

3 Gama lumoun áriebumeme ligía, aba ladimurehan Bungiu lun Natán, lariñaga lun:

4 —Beiba, bariñagame lun Dawidi le nubúein luagu nariñahare lan au, le Aburemei: "Mámaba buguya ábunagua ténpulu nun lun naganóun tidan. 5 Lúmagiñe weyu le nasagarunbaliña Ísüraelina chülǘ lumoun weyu le uguñe, maganóungidina ténpulurugu luéidigia kiánpurugu luma lídangiñe aban fulasu lidoun amu. 6 Lidan sun dan le hama nubéi, mariñaguntina lun ni aban hádangiñe hábutigu ha níchugubaña lun hagumadiruniña numutuniña lun hábunagun aban ténpulu lautu hibúari nun. 7 Ariñagabá lubeiti lun Dawidi le nubúein, luagu nariñahare lan lun, au, le Bungiu Suntigabafu: "Au asagarubalibu lídangiñe hafarügan mudún, aba nagidarunibu luéi berederun éibugañaha hárigi mudún, lun hábutibadibu lan Ísüraelina; 8 éibugaadina buma sun le ñein lumuti bidin, gumuguagüda naaña sun báganiñu ha ageindagubaña buma, dísegüda naali laganbahóuniwa luagu biri kei laganbahóuniwa hawagu wügüriña wéirigutiña ya ubouagu. 9 Bóugudin luéi lira, aransedina aban ubaraü habá Ísüraelina ha numutuniña, ru naaña ñein lun haganóun lidan hafulasun, le ñein lumuti mananihóunbei lan houn, úame amudiragutiña kei meha furumiñe, 10 dan le níchugunbei meha ábutigu lun hagumadiruniña numutuniña ha Ísüraelina. Nǘnabudagüdübaña sun báganiñu. Nasubudiragüdüñein bun luagu níchuguba lan adügawaguni bun, 11 ani danme lan lachülürün oura lun bounwen, níchuguba aban hádangiñe badügawagun lun larúeihan beweñegua. 12 Ligíaba ábunagua ténpulu nun, nederebudagüdübei lálana larúeihan lun sun dan. 13 Ábanbadina úguchili lun, ligíame aban isaani nun. Magida nubéi nareini luéi kei nadüga lun le meha bubaabei, 14 derebugugüdarügü nubéi lun sun dan tidan nuban luma lidan narúeihan. Derebuguñu luba lálana larúeihan lun sun dan".

15 Aba labahüdaguni Natán sun katei le lun Dawidi, ítara kei larihini luma laganbuni. 16 Ábati lebelurun urúei Dawidi adimureha ligibugiñe Aburemei, lariñaga:

—Bungiu Baba, kátañañadina san, ani kátañanu niduheñu banügünbalina chülǘ ya? 17 Ani lóuguamemegili san le bun Nabureme, adimurehaadibu lubéi giñe hawagu ladügawagun bubuein lubá dan le lunbei liabin ani arihabána kei aban wügüri íñuguti! 18 Kábagia amu nariñaga bun luagu buiti le badügübei nun subudi bumutinagu? 19 Nabureme, adüga baali sun ubuiduni le, kei füramase bani luma kei babusenruni, lun nasubudirubei lan. 20 Nabureme, úati ni aban kei buguya, úati giñe amu Bungiu buéidigia, según sun le aganba wamaalibei. 21 Úatiña amu kei Ísüraelina ha bumutuniña, ladüga hagía banúadirubaña lun bánigume. Sefu bumutiña lun bumutuniñabaña lan, aba laganbahóun buagu lidan sun ubóu lau lubuidun luma lanarime burí katei le badügübei. Sagá bumutiña híbiri néchanigu hagibugiñegiñe bumutuniña ha basagarubaña Ehiptugiñe. 22 Lugundun ragǘ baaña Ísüraelina keisi bumutuniña lun sun dan, ani Aburemei, buguyaba Habungiute.

23 —Ítara liña lubeiti Aburemei, derebugugüdabei füramasei le badügübei nun luma houn tílana nuban, gúnfulibei le bariñagubei. 24 Gúnfulila bani füramasei lidan lubudubu, weirilá lanügǘniwa biri súnwandan, ani ariñawagualá luagu Aburemei lan le Suntigabafu Lubungiutebei Ísüraeli, luagu ligía lan Búngiubei lun Ísüraeli! Derebuguñu hamá ladügawagun Dawidi le bubuein, lábugiñe baríaahan: 25 Bungiu Baba, subudigüda baali nun luagu barúeigüdübaña lan nadügawagun; ligía lau sun lubéi bubuein nan, nadüga aban ayumuraguni bun. 26 Buguya, Aburemei, Bungiu buguya, ani füramasehadibu saragu areini nun, au le bubuein; 27 guentoti amuriahatina buma lun babiniruniña nadügawagun lun lábugiñebaña lan bóunigirun súnwandan. Buguya Aburemei, biní baaña, ani biniwañu haba lun súnwandan.