1 Aba hageindagun Filistéana hama Ísüraelina, aba héibaagun Ísüraelina hawéi, ladüga gíbetiña hádangiñe óunwegutiña luagu wübü Gilübóa. 2 Aba héibaahani Filistéana Saulu hama lirahüñü, aba háfaruni Yónatan, Abinadábü luma Malükisúa. 3 Lárigiñe aba hageindagun lúmarügü Saulu, aba hímiruni, chügua hagía gimara luagun. 4 Ábati lariñagun lun le anaahabarun lárumate:

—Sagaboun befeinte, miraguabána tau, miabin hamaamuga gibe tubungiutegu ha áhurera nau.

Gama lumoun máhati láfaruni ladüga lanufude. Ábati lárügüdünu Saulu lefeinte, aba lígiraguagüdün lungua tuagun. 5 Dan larihinbei le íderagubalin Saulu luagu hilá lan, aba giñe lígiraguagüdün lungua tuagun lefeinte, aba lounwen. 6 Ítara liña lounwen Saulu weyu ligía, ǘrüwa lirahüñü hama sun liduheñu. 7 Danti harihinbei sun Ísüraelina ha meha aganóubaña lidan fulasu wayati luagu anuraha lan, ani hilá lan Saulu hau lirahüñü aba hígiruni uburugu aba giñe hanurahan. Ábati hayabin Filistéana aba herederun aganóua haburuguterugu Ísüraelina hagía.

8 Larugan, dan le houdin Filistéana asagarahaña hilaguaaña, aba hadariruni Saulu hama lirahüñü riwagu luagu wübü Gilübóa. 9 Ábati haragachunu ladaüragun luéi, aba hanügüni lichügü tuma lárumate, aba hóunahan láutiña uganu lidoun sun lumúan Filistéa lun hasubudiragüdüni houn sun lílana fulasu luma houn habungiutegu. 10 Lárigiñe aba híchugunu lárumate Saulu hatenpulunrugun habungiutegu, aba hadibiragüdüni lichügü litenpulunrugu Dagón.

11 Dan le haganbunbei lílana Habesi le lani Galaadü luagu le hadügübei Filistéana lun Saulu, 12 aba húaradun sun wügüriña ha ganigibaña, aba hanügüni lúgubu Saulu luma hágubu lirahüñü uburugun Habesi. Aba hábununiña ñein tábugiñe aban tídibu wewe. Lárigiñe aba hayunarun sedü weyu.

13 Ítara liña lounwen Saulu ladüga lisalufurin, lugundun afigouhati lau ladüraaguni le lubeibei Bungiu, luma lau lálügüdahan tuma aban garíaahatu 14 lubaragiñe hamuga lálügüdahan luma Bungiu. Ligía lébubei lagidaruni Bungiu libagari, aba líchuguni arúeihani lun Dawidi le liráü Hesé.