1 Átiri dan lárigiñe aba lounwen Naasü le harúeite Amonna, aba larúeihan liráü leweñegua. 2 Ábati laritagun Dawidi luagu lunti lan lóuseruni Anún le liráü Naasü lau areini, ladüga areidati meha lúguchi Anún lun Dawidi, ábati lóunahan Dawidi fiu wügüriña lumoun Anún lun híchuguni ligarigu lun luagu lounwen lúguchi. Gama lumoun dan hachülürünbei lánigu Dawidi úfisigu hageiroun Amonna. 3 Aba hariñagun ábutigu Amonna lun Anún:

—Haritaguatibu san luagu lóunahañanu lan Dawidi wügüriña ha íchigei ligarigu bun? Lúnrügü lariñagun luagu gagarigu lan luagu lounwen búguchi, hayabiña ha aríaahei fulasu!

4 Ábati líchugun Anún dimurei lun hadaürawagun lani Dawidi úfisigu, sáwagua hagíame. Héiriwaguame hadaüragun chülǘ lumoun hañuuragüle. Lárigiñe aba lóunahaniña. 5 Dan le lariñawagúnbei le asuseredubei houn wügüriña hagía lun Dawidi, aba lóunahan gürigia habaroun, lugundun buin haña lau busiganu, lun lan hariñagun houn lun herederun Herikó, darimeya labouchun hádiuma lubá hagiribudun.

6 Aba hasubudiruni Amonna luagu iyereeguhaaña lan lun Dawidi ladüga katei le ladügübei Anún, aba lubeiti lóunahan Anún hama Amonna sügǘ lau ǘrüwa-wein-katorusu-milu-widü-san líburu pülata lun háhayahan karü lánina wuribu hama súdaragu gabayuagutiña Mesopotamia, Siria, Maaká luma Sobá, 7 aba háhayahan darandi-bián-milu karü lánina wuribu, fayei haméi lurúeite Maaká hau luwügüriñanigu lun houdin hama. Aba hayabin, aba híchugunu hakianpun ligibugiñe Medebá. Aba giñe háfuridunga Amonna haburuguterugugiñe lun hageindagun lidan wuribu. 8 Gama lumoun aba lasubudiruni Dawidi, aba lóunahani Hoabü hau sun lisudaranigu. 9 Aba hawanserun Amonna, aba hesetirun lun wuribu lubenari guánarügü uburugu. Urúeigu ha ñǘbuinbaña aba herederun áraabu. 10 Dan larihinbei Hoabü luagu añate lan luagun ligibugiñegiñe luma lanagangiñe, aba lanúadiruniña habuidun-agei súdaragu Ísüraelina, aba laranserun lun lageindagun hama Síriana. 11 Lárigiñe aba líchuguniña híbiri lánigu lun Awisái le líbiri lun hageindagun hama Amonna. 12 Lariñaga lun:

—Ánhaña gabafu Síriana nuéi, biábinme íderaguana, ánhaña gabafu Amonna buéi, nídiba íderaguabu. 13 Gaguraasunbá, wageindagua lau anigi luagu wanechanin luma luagu burí luburugute Wabungiute adügaléi Aburemei le buítimabei lidan laritagun!

14 Aba lawanserun Hoabü hau luwügüriñanigu lun hageindagun hama Síriana, gama lumoun aba héibaagun luéi. 15 Dan harihinbei Amonna héibaagun Síriana, aba giñe héibaagun luéi Awisái le líbiri Hoabü, aba hebelurun uburugun. Ábati lagiribudun Hoabü Herusaléun.

16 Dan hasubudirunbalin Síriana luagu gañei laali lan Ísüraeli wuribu hama, aba hóunahan hawagu Síriana ha loubafurugubaña duna Éufüratesi. Sofakü, le hábuti luwügüriñanigu Adadü-éserü haubei. 17 Gama lumoun aba labahüdawagún katei le lun Dawidi, aba lidin hawagu hau sun Ísüraelina, aba lánhiñuraguni duna, aba houdin hawagun. Aba lafileiruniña Dawidi lánigu lun hageindagun hama Síriana, aba lagumeserun wuribu, 18 gama lumoun lagumuhóun oura, aba héibaagun Síriana ladüga áfaraali buga Dawidi bián-wein-milu súdaragu ha eibu-umutiña hama sedü-milu tídangiñe karü lánina wuribu, áfara lumuti giñe Dawidi Sofakü le hábuti súdaragu Síriana. 19 Dan harihinbei lánigu Adadü-éserü luagu gañei hamaaña lan Ísüraelina, aba hederegeragun houngua lun Dawidi. Lúmagiñeti dan ligía, máhaaña Síriana híderaguniña Amonna.