1 Lárigiñe le, aba lariñagun Hosé lun túniri luban:

—Buíngüda humóun hasagüte gürigia ha lau sun türigu le hayaraati anüga, híchigeime liseinsun kada aban hádangiñe luagu tiyuma lisagüte. 2 Ru huméi giñe nuerun le pülata luagu tiyuma lisagüte le agumuhóuni úara luma seinsu le lafayeirubei luagu türigu.

Aba ladügüni túniri muna le lariñagubei Hosé lun. 3 Aba lóunahaniña Hosé líbirigu úara luma labouchun weyu, hau sun halügüniña burigü. 4 Madisegiña luéi uburugu, ligía lariñagun Hosé lun túniri luban:

—Beiba hárigi gürigia ha, danme bachülürün hamoun, bariñagame houn: "Kame hafayeira buiti lau wuribati? Kame híweruhei weru le pülata. 5 Le layusurubei niyubudiri lun latun luma lun legesihan? Wuribati hadüga!"

6 Dan lachülürün túniri muna hamoun aban láguyuguagüdüni dimureimeme le houn, 7 hariñaga lun:

—Kame badimureha woun ítara? Madügündügüwabei katei le! 8 Anhein giribu wabéi Kanangiñe agiribudagüdei seinsu le wadarirubei tidan wasagüte, ida liña hamugagia wíweruhan pülata luma golu lúbiñegiñe babureme? 9 Hilala furumiñeguarügü wádangiñe le úmati ladarirúa weru ligía, redei wagíame hidamunme.

10 Ábati lariñagun túniri muna:

—Ladügǘwa kei hariñaguni, gama lumoun lérügüba úmati ladarirúa weru eredera nidamunme; ha híbiri, madurunbaña.

11 Aba larariragüdünu kada aban hádangiñe lisagüte furese, aba ladaaragunu. 12 Aba láluahan túniri muna tidan kada sagü, lagumesera túmagiñe lisagüte íbugañaü darí tumoun lisagüte amuleñein, aba ladariruni weru tidan lisagüte Benhamín. 13 Ábati haheiridagunu hadaüragun lun larihín hagarigu. Aba híchuguni kada aban hanügün lanagawagun halügün burigü, aba hagiribudun uburugun.

14 Dan lachülürünbei Hudá hau líbirigu lúbiñoun Hosé, ñéingili. Ábati habuluchagun ligibugiñe darí ladagarun herebe múarugu, 15 sun anihán lan Hosé ariñaga houn:

—Ka san hadügübei? Ibidiñeti san hun luagu garíaahadi nan?

16 Aba lóunabun Hudá:

—Kábagia wóunabagüle bun? Ida lubagia warufuduni madurun wamá? Darí laadiwa Bungiu lidan figóu. Awanhán búhaburugu; bidamun wagía lau sun le buga gámabalin weru.

17 Lariñaga Hosé houn:

—Mama luba. Lérügübei buga gámabalin weru nidamun. Ha híbiri gayaraati hagiribudun lúbiñoun húguchi darangilañu, mañawarihanbei ni aban hun.

18 Ábati layarafadun Hudá lumoun Hosé, lariñaga lun:

—Ayumuraguatina bun, lun bánharun lun nariñagun aban katei aramudaguati bun. Fuleseibana, magañidabátia numa, ladüga buguya kéigubeirügü urúei ban 19 álügüda bumutiwa meha anhein gáguchi wabéi o anihein lan amu wamulen, 20 aba wóunabun luagu gáguchi wamá aban weiriei mutu, ani gamulen wamá aban ñǘraügili, le águrahoubei lidan lueiyan wáguchi. Ariñagatiwa giñe bun luagu weiri lan línsiñe wamulen ligía lun wáguchi, ladüga ligíarügüñein liráü erederuti lun hádangiñe tirahüñü aban hádangiñe lúmarigu, hilati le aban líbugaña. 21 Ábati bariñagun woun lun wanügüni bun, ladüga busén ban basubudiruni. 22 Aba wariñagun bun luagu siñá lan lígiruni irahü ligía lúguchi, ladüga anhein lan ligira, lóunweba lan lúguchi. 23 Gama lumoun aba bariñagun woun luagu anhein lan miabin wama, meresibirun bubadiwa lan.

24 —Dan wagiribudun lumoun wáguchi, aba wabahüdaguni sun le bariñagubei woun lun. 25 Lariñagati wáguchi woun: "Héibaya agañeiha murusun türigu", 26 wariñaga lun: "Siñati woudin ánheingubeirügü ñüdün wamulen le agumuhóuni wama; ladüga anhein midin wama, siñabei warihini wügüri ligía". 27 Lariñaga núguchi woun: "Subusi humuti luagu garáü tan buga númari to úmaboun namarieida bián irahüñü nau; 28 aba lidin aban hádangiñe nuéi, ani lúmagiñe dan ligía marihin nágili. Chouru numuti luagu áfarala lan aban animaalu áraabuna. 29 Ánheinya hanüga le aban niráü nuéi, lasuseredame somu katei wuribati lun, huguyaba gadurun luagu láfarunina íruni".

30 —Wéiriti lubeiti línsiñe irahü le lun núguchi, darí lun anhein lan magiribudún numa, 31 lóunweba wáguchi danme marihin lani. Wagíabati gadurun lau láfaruni íruni wáguchi. 32 Ariñagatina lun núguchi luagu nóunigirubei lan irahü le, ariñagatina giñe lun: "Anhein magiribudagüdün nan bun, auba gadurun bigibugiñe lun sun dan". 33 Ligía lubeiti nayumuragunbei bun, lun au lan eredera bidamunme leweñegua. Ígiraba lun lidin hama líbugañanu. 34 Ladüga, ida lubagia nagiribudun lun núguchi anhein midin irahü le numa? Mabusenruntina narihini wuribati le lunbei lasufuriruni núguchi.