1 Lárigiñe sun katei le, aba ladimurehan Bungiu luma Abürámü lidan uénedü le, lariñaga lun:

—Manufudedabatia Abürámü, au óunigirubalibu. Wéiribei bafayeiruaha.

2,3 Aba lóunabuni Abürámü:

—Nabureme Bungiu, kagia hu lan nun lun bíchugun afayeiruahaü nun, subudigabei luagu marahüñü nan? Kei míchugun bubéi isaani nun, Elieserü le Damasükuna le aban hádangiñe numusuniña ligíaba galagantei sun le númabei.

4 Aba lóunabuni Bungiu:

—Biráü guánarüba galagante bárigi, mama aban terencha.

5 Aba lanügüni Bungiu Abürámü bóugudin, aba lariñagun lun:

—Arihabéi sielu buidu, babahüdañame waruguma ánhaña gayara ban. Ítara luba hiibe badügawagun.

6 Afiñeti buga Abürámü luagu Bungiu, ligía leresibirunbalin Bungiu Abürámü keisi gürigia richaguati. 7 Ábati lariñagun lun:

—Au Búngiubei, au asagarubalibu uburugugiñe Uru, lun níchuguni múa le bun balaganteme.

8 —Gama lumoun Nabureme Bungiu, ida luba san nachoururuni luagu nalagantebei lan múa le? —Liña lóunabun Abürámü.

9 Aba lariñagun Bungiu lun:

—Barüba aban tiraüraü bágasu nun, aban gábara luma aban mudún ha ǘrüwaali irumu lau kada aban, barǘ buguyame aban unhun, tuma aban tiraüraü wagugua.

10 Aba lanügüniña Abürámü sun animaalu ha lun Bungiu, aba líbaahaniña hamidan hámagua, aba líchuguniña gagibugu, gama lumoun míbaagun lumutiña dunuru. 11 Aba buriti hararihan wadubi áluaha héiginiña animaalu hilaguaaña ha, aba labugaguniña Abürámü. 12 Dan le lagumeserunbei aguñeda, aba larumugun Abürámü. Sódini aba laburigadun lau, aba lanufudedagun. 13 Ábati lariñagun Bungiu lun:

—Lunti basubudiruni luagu haganóuba lan badügawagun lidan aban ageiraü le mama hageira, luagu giñe idamunibaña lan ñein, houserúba wuriba luagu gádürü-san-irumu. 14 Gama lumoun nasufuriragüdübei giñe ageiraü le lunbei lanügüniña kei idamuni, lárigiñeme, ábame háfuridun badügawagun ñéingiñe lau saragu irisini. 15 Buguyati bóunweba lidan darangilaü danme wéiyaadibu, ábame bóundarun hamoun bagüchagu. 16 Lárigiñeme ligadürün háguyugun badügawagun, hagiribuduba lidoun fulasu le, ladüga machülügili lanme hariban Amoruna lumoun lébeha.

17 Dan le gúñeeli, aba lasaliragun aban régigi ígiragüdati gumuleli, luma aban gudi durungu ásügüreina hamidanguagiñe animaalu ha buga bíwaguañabaña. 18 Weyuméme ligía, aba ladügün Bungiu aban daradu luma Abürámü, lariñaga lun:

—Níchugubei múa le houn badügawagun, lúmagiñe lidunari Ehiptu darí lumoun duna wéiriti le Éufüratesi. 19 Le hamúan Seneuna, Seneseuna, Kadümónna, 20 Étüna, Féresüna, Refaímüna, 21 Amoruna, Kananna, Hérühesina hama Hebusuna.