1 Lidan buga dan ligía, ábanmeme iñeñein hadimurehabei sun gürigia. 2 Dan le háfuridunbei lídangiñe oubaü le ñéingiñe lubéi laboucha weyu, aba hadarirun aban fulasu mawübüriti lóubawagu Sinarü, aba herederun aganóua ñein. 3 Luagu aban weyu aba hariñagun hámagua:

—Wadaagua ladiríyu, ábame wábouguni lau watu gemeti.

Ítara liña hayusurunbei ladiríyu leweñegua dübü, aba hóuserun barama lun háfadahani ladiríyu. 4 Lárigiñe aba hariñagun:

—Wábunagua aban uburugu luma aban wáyelesi le achülürüti sielu, aganbahóua láamuga wawagu, merederun wamaamuga giñe chagagu ubouagu.

5 Gama lumoun aba lararirun Bungiu arihei uburugu luma wáyelesi le uágubei hawadigimarida. 6 Aba lasaminarun:

—Kei ábanmeme lubéi ageiraü hagía, ábanmeme luwuyeri iñeñein hariñagubei; ani gumese hamaali wadagimanu, úaali ni kata ubouaguna lunti lararamuniña. 7 Buítimabei lun wararirun, ábame wadügün lun ua lan gunfurandagua hamá hámagua.

8 Ítara liña lubeiti lafanreinraguniña Bungiu ubouagu, aba lerederun hábunaguni uburugu ligía. 9 Aba lámuñedaguagüdüni Bungiu hererun lílana fulasu ligía hawariuagua, aba lachagaraguniña lidoun sun ubóu, ligía Babeli lubéi líribei uburugu ligía.

10 Añahán meha ladügawagun Semü. Bián irumu lárigiñe labuinchun ubóu lau duna, dan le san lubéi irumu lau Semü, ligía lágurahoun liráü le gíribei Arüfasádü. 11 Aba labagaridun Semü seingü-san irumu lárigiñe, ábaya garahüñü lan.

12 Darandi-seingü irumu lau Arüfasádü, ligía lágurahoun liráü le gíribei Sela. 13 Aba labagaridun Arüfasádü gádürü-wein-ǘrüwa irumu lárigiñe, ábaya garahüñü lan.

14 Darandi irumu lau Sela ligía lágurahoun liráü le gíribei Éberü. 15 Aba labagaridun Sela gádürü-san-ǘrüwa irumu lárigiñe, ábaya garahüñü lan.

16 Darandi-gádürü irumu lau Éberü ligía lágurahoun liráü le gíribei Pelegü. 17 Lárigiñe aba labagaridun Éberü gádürü-san-darandi irumu, ábaya garahüñü lan.

18 Darandi irumu lau Pelegü ligía lágurahoun liráü le gíribei Reú. 19 Lárigiñe aba labagaridun Pelegü bián-san-nefu irumu, ábaya garahüñü lan.

20 Darandi-biama irumu lau Reú, ligía lágurahoun liráü le gíribei Serugu. 21 Lárigiñe aba labagaridun Reú bián-san-sedü irumu, ábaya garahüñü lan.

22 Darandi irumu lau Serugu, ligía lágurahoun liráü le gíribei Naoru. 23 Lárigiñe aba labagaridun Serugu bián-san irumu, ábaya garahüñü lan.

24 Wein-nefu irumu lau Naoru, ligía lágurahoun liráü le gíribei Tera. 25 Lárigiñe aba labagaridun Naoru san-disinéfu irumu, ábaya garahüñü lan.

26 Ǘrüwa-wein-diisi meha irumu lau Tera, ligía hágurahoun lirahüñü ha gíribaña Abürámü, Naoru luma Arán.

27 Añahán ladügawagun Tera, le meha lúguchi Abürámü, Naoru luma Arán. Arán le lúguchi Lotu. 28 Aba lounwen Arán lubaragiñe lúguchi lidan uburugu Uru lídanmeme fulasu le ñein lubéi lágurahoua. 29 Aba lamarieidun Abürámü tuma Saraí, Naoru tuma Milüká. Milükáti tuma Isüká lirahüñü Arán. 30 Siñatiti tagaraüdün Saraí ladüga maraüheitu.

31 Aba lidin Tera Úrugiñe lun uburugun Kanán lau Abürámü le liráü, Lotu le libari tuma Saraí to lídiñu. Gama lumoun dan le hachülürünbei lidoun fulasu le gíribei Arán, aba herederun aganawa ñein. 32 Aba lounwen Tera ñein uburugu Arán lídanbei bián-san lan irumu lau.