1 Luagu aban weyu, aba lariñagun Bungiu lun Abürámü:

—Ígirabei bufulasun, biduheñu tuma luban búguchi, ñüdün báamuga lidoun fulasu le lunbei narufuduni bun. 2 Nadügüba aban óunwenbu néchani hau badügawagun; nabinirubadibu, naganbahagüdüba buagu, ábanbadibu abinirúni houn amu gürigia. 3 Nabinirubaña ha abinirutibu, íñaraguanañame ha íñaragutibu, habinirúba gürigia ubouagu bídangiñe.

4 Aba láfuridun Abürámü Arangiñe kei lariñaguni Bungiu lun. Ǘrüwa-wein-keinsi irumu lau dan le láfuridunbei ñéingiñe lun lidin Kanán. 5 Barǘ lumutu Saraí to lúmari lúmagua lau sun Lotu le liraühaña lau sun katei le hámabei hau sun gürigia ha lúmabaña uburugu Arán. Dan le hachülürünbei Kanán, 6 aba lásügürün Abürámü lamidanguagiñe fulasu ligía darí lachülürün Sikemü, le ñein tubéi tídibu ensina to sagüráuboun Moré. Ñein méhati haganawa Kananna lidan fulasu ligía. 7 Ñein larufudagua Bungiu lungua lun, aba lariñagun lun:

—Níchugubei múa le houn badügawagun.

Ábati ladügün Abürámü aban latarü lun Bungiu ñein, ladüga larufudagun lungua lun ñein. 8 Lárigiñe aba lidin luagun wübü le luéigiñebei oubaü le ñéingiñe lubéi laboucha weyu libiti uburugu Beteli, ñein líchigoun likianpun. Luéigiñe oubaü le ñéingiñe lubéi lálüda weyu lun fulasu le ñein lubéi líchigoun likianpun leredera uburugu Beteli, anhein uburugu Ai luéigiñeñein oubaü le ñéingiñe lubéi laboucha weyu. Adügayati giñe Abürámü aban latarü lidan fulasu ligía ani aba lagúaruni liri Bungiu. 9 Lárigiñe aba lasigiruni lémeri, murusun murusun, lóubawagun Négebü.

10 Lidan dan ligía, aba ladagarun aban óunwenbu ümi fulasurugu, aba lidin Abürámü aganawa Ehiptu luagu átiri dan, ladüga lúan éigini lidan fulasu le ñein lubéi laganawa. 11 Dan le achülüreinaaña Ehiptu, aba lariñagun Abürámü tun Saraí to lúmari:

—Subudi numuti luagu magadiñe ban, 12 danme le harihinibu Ehiptuna hariñaguba: «Lúmari wügüri le würi to». Ábameti háfarunina hilagubei, ábame hígirunibu lau ibagari lun herederun bau. 13 Bariñagame lubeiti houn luagu nitu ban, buidu láamuga lidin nun, máfarun hamaamugana hilagubei buéigiñe.

14 Dan lachülürün Abürámü Ehiptu, aba harihin Ehiptuna luagu weiri lan tumagadiñen Saraí. 15 Aba giñe harihinu lánigu urúei, le lurúeite Ehiptu, aba houdin abahüdagua lun luagu lueirin tumagadiñen würi to. Aba lubeiti hanügünu tidoun luban urúei.

16 Aba lóuseruni urúei Abürámü buidu luéigiñe tóubadina Saraí, aba ledewehan mudún lun, bágasu, idamuni, burigü hama kameyu. 17 Gama lumoun bei lumuti giñe Bungiu urúei hau sun liduheñu hau saragu igei tuéigiñe Saraí. 18 Ligía lébubei lóunahan urúei luagu Abürámü, aba lariñagun lun:

—Kame badügei le nun ítara? Ka uagu mariñagun bubalin nun luagu búmari lan würi to? 19 Ariñagatibu luagu bitu lan, ítagaraü yebe nanügünu númarime, badüga. Anuhán búmari, barüboun, beiba!

20 Ábati lariñagun urúei houn luwügüriñanigu lun hasagaruni Abürámü tau sun lúmari, lau sun le lúmabei.