1 Dan le lagumeserunbei sun katei, aba ladügüni Bungiu sielu luma ubóu. 2 Magaburigili meha ubóu; larihín meha keisi aban barana huliliti daruguñu luburiga lau, anihánti buga lani Bungiu Sífiri ánhinha ligibuagu duna.

3 Ábati lariñagun Bungiu:

—Harugoungalá!

Ábati larugoungadun. 4 Lídanbei larihini Bungiu luagu buidu lan larugounga, aba lafanreinraguni larugounga luéi luburiga, 5 aba líchugun liri larugounga «wéyuagu», líchiga liri luburiga «guñoun». Ítara liñati buga lagunfulirun furumiñeti weyu.

6 Lárigiñe lira, lariñaga Bungiu:

—Ñeinlá aban fánreinguaü labadinagua duna, lerederame líbiri duna ǘnabu líbiri iñu. Aba lasuseredun ítara.

7 Aba lubeiti lafanreinraguni Bungiu duna, leredera líbiri ǘnabu líbiri iñu. 8 Ábati líchugun liri fánreinguaü, lagúara lun «sielu». Ítara liñati buga lagunfulirun libiaman weyu.

9 Ábayati lariñagun Bungiu:

—Óundaraguala duna le lábugiñebei sielu lidan aban, ñein láamuga giñe fulasu mábeiti.

Aba lasuseredun ítara. 10 «Múa» lubeiti iri le líchugubei Bungiu luagu fulasu le mábeibei, lagúareiti liri sun duna le óundarubei, «barana». Dan le larihini Bungiu buidu lan katei lira, 11 aba lariñagun:

—Hüchala sun luwuyeri nadü múarugu: Híduru le burí íchuguti ilaü luma burí tídibu wewe le gagindaditi.

Ani ítara liña lasuseredun. 12 Aba labouchun sun luwuyeri nadü ligibuagu múa: Híduru le íchuguti ilaü luma burí tídibu wewe gagindaditi. Aba larihin Bungiu luagu buidu lan sun le. 13 Ítara liñati buga lagunfulirun lǘrüwan weyu.

14,15 Ábayati lariñagun Bungiu:

—Ñeinlá burí leiti sielu lun líchugun larugounga lidoun ubóu, fánreingua láamugei wéyuagu luéi guñoun, seriwi láamuga giñe lun larufuduni burí weyu, irumu luma burí uéyuri.

Ani ítara liña lasuseredun. 16 Adüga lumuti lubeiti Bungiu biángubei leiti. Le wéiritimabei lun líchugun larugounga wéyuagu, le ñǘraübei lun líchugun larugounga guñoun. Adüga lumutiña giñe waruguma. 17 Ru lumuti Bungiu leiti burí ligía siélurugu lun líchugun larugounga lun ubóu 18 wéyuagu kéisigubeirügü guñoun luma lun lafanreinraguni larugounga luéi luburiga, aba larihin luagu buidu lan lira. 19 Ítara liñati buga lagunfulirun ligadürün weyu.

20 Lárigiñe le aba lariñagun Bungiu:

—Güriagualá duna sun hawuyeri animaalu ha abagaridubaña lidan, ñein hamá giñe dunuru lun háhamahan garabalirugu.

Ani ítara liña lasuseredun.

21 Aba ladügüniña Bungiu hanarime burí udu ha baranahabaña, hama sun hawuyeri animaalugu ha líchugubaña duna hama ha aganóubaña lidan, ani hama sun hawuyeri dunuru. Dan larihini Bungiu luagu buidu lan sun lira, 22 aba labiniruniña animaalugu ha ladügübaña, lariñaga lau dimurei le:

—Garahüñügua humá buíngüda huméi barana hau hirahüñü, ñein hamá giñe saragu dunuru ubouagu.

23 Ítara liñati buga lagunfulirun liseingün weyu.

24 Ábati lariñagun Bungiu:

—Ñein hamá sun hawuyeri animaalugu ubouagu dandu ha ibiñanigu kéisigubeirügü ha áraabuna hama ha aduruuharügübaña múarugu.

Aba lasuseredun ítara. 25 Adüga lumutiña Bungiu sun animaalugu ha, aba larihin luagu buidu lan le ladügübei. 26 Aba lubeiti lariñagun:

—Guentoti adüga waméi wügüri. Wenegebei, gabafubei hawagu úduraü, dunuru, ibiñanigu, animaalugu áraabuna hama sun ha aduruuharügübaña múarugu.

27 Dan le ladügünbalin Bungiu wügüri, lenege guánarügü ladügei, adüga lumuti wügüri adüga würi, 28 aba labiniruniña lau dimurei le:

—Garahüñügua humá saragu, buíngüda huméi ubóu hau hirahüñü ani gumadi huméi, gumadi humañame úduraü hama dunuru hama sun animaalugu ha aduruuharügübaña múarugu.

29 Lárigiñe aba lariñagun houn:

—Ru numutu sun nadü to ubouaguboun hun to íchuguboun ilaü luma sun tídibu wewe to gagindadiboun. Leseriwiduba sun le hun lun heigin. 30 Ánheinti houn animaalu ha áraabuna hama ha aduruuharügübaña múarugu hama burí dunuru, híduru níchugubei houn lun ligíaba lan heiga.

Ítara liña lubeiti lasuseredun. 31 Aba larihin Bungiu luagu buidu lan sun le ladügübei. Ítara liñati buga lagunfulirun lisisin weyu.