1 Aba láfuridun Abüraámü lídangiñe fulasu le ñein lubéi buga, aba lidin lóubawagun Négebü, aba lerederun aganawa uburugu Gerarü, labadinagua Kádesi luma Suru. 2 Sun anihán lan ñein, aba lariñagun luagu litu lan Sara to lúmari. Ábati lóunahan Abimélekü le urúeibei uburugu Gerarü anügoun Sara lun yebe lanügünu lúmarime; 3 gama lumoun áriebu ligía aba lariñagun Bungiu lun Abimélekü lidan aban uénedü:

—Bounwe, ladüga würi to banügüboun, maríeitu.

4 Keiti marounrungili lan tuma, aba lóunabun:

—Nabureme, haritaguatibu funagia báfarun aban gürigia le madügünti ni kata wuribati? 5 Abüraámü guánarügü ariñagubei nun luagu litu lan würi to, ariñaga tuguya giñe luagu tati lan ligia; lau lubéi yebeti taruman nanigi nadügei le, afiñetina madügüntina wuribati.

6 Ábati lóunabuni Bungiu lidan luénedü:

—Subudi numuti luagu lau lan taruman banigi badügei. Ligía mígirun nubéi lun barounrun tuma, luéi bafigouhan nigibugiñe. 7 Guentó, ruboun lúmari wügüri le lun tárigoun ladüga profeta ligía, lafurieiduba buagu lun babagaridun, gama lumoun anhoun míchugun ban lun, bóunweba hau sun biduheñu.

8 Larugan binaafin aba lásaarun Abimélekü, aba lagúarun houn luwügüriñanigu, aba labahüdaguni luénedü houn. Dan le haganbunbalin, aba hanufudedagun. 9 Lárigiñe aba lagúarun Abimélekü lun Abüraámü, lariñaga lun:

—Arihabá badüga woun! Kagia wuribati nadügübei bun, lun banügübei lan óunwenbu figóu le nuagun hau sun numutuniña? Adügaadibu aban katei nun le moun lumuti ladügǘn. 10 Ka baritagubei dan le badügünbalin sun le? Ítara liña ladimurehan Abimélekü lun Abüraámü.

11 Aba lóunabuni Abüraámü:

—Haritaguatina yebe luagu minebenwa lan Bungiu lidan fulasu le, ani luagu háfarubadina lan tuéigiñe númari. 12 Gama lumoun inarüni luagu nitu lan tuguya; liráü núguchi, gama lumoun mama tiráü núguchu, ligía namarieidunbei tuma. 13 Dan le lasagarunbalina Bungiu lúbiñegiñe núguchi, aba namuriahan tuma lun sun lan fulasu ñein lumuti wachülüra lun tariñagun luagu tati lan au.

14 Ábati líchugunu Abimélekü lúmari Abüraámü lun tárigoun. Edeweha ligía mudún lun, bágasu, hama idamuni, 15 lariñaga lun:

—Anihán numúan, anúadahabei fulasu le hínsiñeti bun lidan lun baganóun ñein.

16 Lariñaga tun Sara:

—Milu murusun pülata lebegibei sun le níchugubei lun bati, leseriwiduba lun labuiduragüdüni ladimurehoun buagu hagibugiñe sun ha búmabaña. Úabaña adimurehatiña wuriba buagu.

17 Ábati lafurieidun Abüraámü lun Bungiu aba lareidaguagüdüni Bungiu Abimélekü tau sun lúmari. Areidaguagüda lumutiña giñe tumusuniña ha würiña lun gayara lan hagaraüdün, 18 ladüga adügaali yebe Bungiu lun ua tan würi agaraüdütu hádangiñe ha lúbiñebaña Abimélekü tuéigiñe Sara.