1 Ábatima laweiridagun ilamaü fulasurugu, 2 lárigiñe lubeiti héigini Hakobu hau sun lirahüñü lagumuhóun türigu le erederubei lídangiñe le buga hanügübei Ehiptugiñe, lariñaga Hakobu houn:

—Héibaya agañeiha türigu woungua.

3 Lariñaga Hudá lun:

—Ariñagati meha wügüri ligía woun furangu: Anhein manügün humá hamulen le agumuhóuni ñahoun, miábingubei humá arihana. 4 Anhein lubeiti bígira lun lidin wama, wóudiba agañeiha türigu bun; 5 gama lumoun anhein mígirun ban, mídinbadiwa.

6 Lariñagati Hakobu:

—Ka uagu hadüga saragu wuribani nun ítara? Kame san hariñaga lun gürigia ligía luagu aniheingua lan ábanya hamulen?

7 Ábati hóunabuni:

—Ladüga lálügüdaguniwa saragu wawougua luma hawagu waduheñu. Lariñaga woun: "Gáguchigidün? Gamuletün amu?" Ábati wóunabuni luagu le uágubei lálügüdaha. Kábagia yebe wasubudira luagu labusenruba lan wanügüni wamulen lun?

8 Lariñaga Hudá lun Hakobu le lúguchi:

—Anhein busenwabei wabagaridun, ígiraba lun lidin Benhamín lábugiñe naríaahan, ábame woudin. Ítara luba móunwegun wamá ni buguya, ni wagía ni warahüñü. 9 Auba óunaba luagu; auba afayeira bun luagu le asusereduti lun. Anhein magiribudagüdün nan bun lídanmeme fulasu le, auba gadurun bigibugiñe súnwandan. 10 Lun hamuga madarasahan wamá ya saragu, ñǘdünhadiwa hamuga bián wéiyaasu, giribuya.

11 Ábati lóunabun háguchi:

—Kei ua lubéi amu árani, adüga huméi le: Barǘ humá idewesei lun wügüri ligía tidan hisagüte. Barǘ humá le lubuidun-agei katei le yaana fulasurugu lun: Murusun bálüsamu, murusun sírudu, mira, nuésesi, alüméndüra. 12 Barǘ humá giñe dóbuli seinsu, ábame hederegeruni seinsu le agiribudawagüdübei hun; háfuga bulíeiguaü. 13 Barǘ huméi hamulen, héibaya lumoun wügüri ligía. 14 Gudemegüdalaün Bungiu Suntigabafu lun, gayara láamuga lígiragüdüni le aban híbiri luma Benhamín. Ánheinti au, anhein lunti lubéi nerederun marahüñüga, nerederuba marahüñüga.

15 Aba hanügüni lirahüñü Hakobu idewesei, luma dóbuli seinsu, luma Benhamín, aba houdin Ehiptu. Dan hachülürün ligibugiñe Hosé, 16 aba larihin Hosé luagu anihán lan Benhamín hama, aba lariñagun lun túniri luban:

—Barübaña gürigia ha núbiñoun. Áfaraba aban bágasu, baranserounme, ladüga héigiba numa amidirugu le.

17 Aba ladügüni túniri muna kei lariñaguni Hosé lun, aba lanügüniña ligía guánarügü, 18 gama lumoun hagía aba halouchun ladüga hanügǘn lúbiñoun Hosé, aba hariñagun hámagua:

—Luéigiñetia seinsu le meha hagiribudagüdübei woun hanügawa ñahoun. Hábürüha wawagun, ábame hanügüniwa lun wawadigimaridun kei idamuni, úara hama walügüniña burigü.

19 Dan lubeiti hachülürün tubenari muna, aba hayabin lumoun túniri muna lun hadimurehan luma, 20 hariñaga lun:

—Arihabá san! Aba wayabin agañeiha türigu lügürabuga, 21 gama lumoun dan wachülürün lidan fulasu le ñeinba lubéi wásügürei áriebu, aba wadaarunu wasagüte, ñeinñein liseinsun kada aban luagu tiyuma lisagüte. Dayarüñu liña seinsu, barǘ wamutiti guentó lun wáguyugüdüni, 22 barütiwa giñe amu seinsu lun wagañeihan türigu. Gama lumoun ibidiñeti woun ka lan íchugubalin furumiñeti waseinsun tidoun wasagüte.

23 Aba lóunabun túniri muna:

—Ragügua humá hungua, manufudeda humá. Mosu le lan Hubungiute, le giñe Lubungiute húguchi íchugubalin seinsu tidoun hisagüte, ladüga au, resibi numuti seinsu le hafayeirubei.

Aba lasagaruni túniri muna Simeón, aba lanügüni ñeinhin habéi líbirigu; 24 lárigiñe aba lanügüniña súngubei lúbiñoun Hosé, aba líchugun duna houn lun hachibuni hagudi, ru ligía éigini houn halügüniña burigü. 25 Aba haranseruni idewesei, aba hagurabun lachülürün Hosé amidirugu kei aganbaaña lubéi luagu ñeinba lan heiga lánina amidi. 26 Dan lachülürün Hosé múnadoun, aba híchuguni idewesei le hanügübei lun, aba habuluchagun darí ladagarun herebe múarugu. 27 Aba lálügüdüniña Hosé ida haña lan, aba giñe lariñagun houn:

—Ida liñagia húguchi, weiriei mutu le uágubei hayanuha nun? Wínwangili?

28 Aba habuluchagun, aba hariñagun:

—Anihein wáguchi, le hubúein, magadiñeti. Ani wínwangili.

29 Aba larihin Hosé geyegua lau, aba larihini Benhamín le lamulen le liráü lúguchi tau lúguchu, lariñaga:

—Anihán san hamulen le agumuhóuni le uágubei hadimureha nun? Binilabu Bungiu, niráü!

Dan lariñaguni Hosé lira, 30 aba lasandiragun lungua lau ugundani lau larihini lamulen, aba labusenrun layahun. Aba lebelurun lirumunrugun, aba layahun. 31 Dan rédeihali layahun, aba lachibuni ligibu, aba láfuridun, aba lariñagun:

—Seriwi huméi éigini!

32 Aba heseriwiduni Hosé luagu aban dábula, lhoun líbirigu luagu amu, luáguya amu ha Ehiptuna háñaha éigibaña luma Hosé; ladüga máhawati lun heigin Ehiptuna hama ebüréugu. 33 Aba lañuuragüdüniña Hosé líbirigu según harumudiri, lúmagiñe íbugañaü lumoun amuleñein, wéirituti hanigi, aba haríagun hawouguoun. 34 Aba líchugun Hosé éigini houn lídangiñe le luágubei lidabulan, aba líchugun gíbetimati lun Benhamín luéi houn híbiri. Aba latun Hosé hama líbirigu darí lun hagundaarun.