1 Aba lasigiruni Hakobu lémeri, aba háfuridun átiri lani Bungiu ánheligu lubaroun. 2 Dan le larihinbaliña Hakobu, aba lariñagun:

—Lisudaranigu Bungiu ha.

Ligía líchugunbei liri fulasu ligía Manaímü. 3 Aba lóunahan Hakobu wügüriña lubá lidoun fulasu le gíribei Seirü lóubawagu Edomu, lun hariñagun lun líbugaña luagu lachülürüba lan, 4 lariñaga houn: Hariñagame lun níbugaña Esaú: «Lóunahaña hamulen Hakobu ariñaga hun: Aganawaadina luma Lawán sun dan le, 5 añahein bágasu numa, burigü, mudún, hama idamuni. Nóunahañein uganu le hun niyubudiri, agurabatina nagañeiruni hugundan».

6 Dan le hagiribudun ounahóutiña, aba hariñagun lun Hakobu:

—Ñǘdüntiwa arihei bíbugaña Esaú, anitén bubaroun lun leresibirunibu, úara hama gádürü-san wügüriña.

7 Dan le laganbunbalin Hakobu katei le, aba lanufudedagun, aba ladiheridun saragu. Aba lafanreinraguniña Hakobu gürigia ha lúmabaña, bágasu, mudún, hama kameyu lidan biama, 8 aba lasaminarun: Anhein ñübuin Esaú lun lageindagun hama ha tídanbaña aban kianpu, gayaraabei tesefurun to aban kianpu.

9 Aba lagumeserun afurieida, lariñaga:

—Bungiu, Lubungiute náruguti Abüraámü, luma núguchi Isaakü, buguya le ariñagubei nun lun nagiribudun nageiroun hamoun niduheñu, luagu badügüba lan lun buídubei lan nuéiyasun. 10 Madüna numuti areini le aubei bóuserana. Hiñugua numuti duna Hordán le, manügünga ni kata luéidigia nubadun, guentó biánguaru nikianpun-agei. 11 Adügabá fulesei nun, sefubána luéi níbugaña Esaú! Hanufudetina luéi liabin ageindagua numa, láfaraguañame würiña ha hau irahüñü ha. 12 Ariñaga baali furangu luagu badügüba lan lun buidu lan lidin nun, luma giñe gíbebaña lan nadügawagun kei sagoun le, gíbebaña nege darí lun siñabei lan habahüdǘn.

13 Aba larumugun Hakobu ñein áriebu ligía, aba lanúadahan idewesei lídangiñe lumegen lun líchuguni lun Esaú le líbugaña: 14 Bián-san gábara würiña, wein gábara wügüriña, bián-san mudún würiña, wein mudún wügüriña. 15 Darandi kameyu würiña ha sun liña hemeilihan hau sun harahüñü, bián-wein bágasu, diisi harahüñü bágasu, wein burigü würiña, hama diisi burigü wügüriña: 16 Ábati lafanreinraguniña lidan bián sétanu, aba líchuguniña houn lumusun, lariñaga houn:

—Heiba nubá hadisedaguaraüme hubaruagua, aban sétanu lubá le aban.

17 Lariñaga lun le lóunahabei furumiñe:

—Danme ladunragun níbugaña Esaú buma, danme lálügüdünibu ka lan baburemebei, haliñounbadibu lan, ka lan ilügüniña animaalu ha búmabaña, 18 bóunabeime: "Idewesei, nabureme Esaú, lóunahan hubúein Hakobu hun. Anitén wárigi wárigi".

19 Ariñaga ligía lun le habiaman lóunahan, lun háürüwan luma houn sun ha ñǘdünbaña hau sun animaalu hagía:

—Danme hadunragun luma Esaú, ligiamemelá hariñaga lun, 20 hariñagame giñe lun: "Anitén bubuein Hakobu wárigi wárigi".

Aba lasaminarun Hakobu: «Nagalumarubei ligañi lau burí idewesei le nóunahabei lun, lárigiñeme ábame nadunragun luma. Háfuga leresibirubadina buidu ítara». 21 Aba lubeiti lidin idewesei furumiñe, ligía aba lerederun ásügürei áriebu tidan likianpun.

22 Aba lásaarun Hakobu áriebumeme ligía, aba lanügüniña bián lúmarigu, bián lubúaligu hama unsu lirahüñü aba lánhiñuraguni duna Haboku hau, 23 labu sun le lúmabei. 24 Dan le lerederunbei Hakobu lábugua, aba lageindagun aban wügüri luma darí larugadun. 25 Larihinbei wügüri ligía luagu siñagua lan lungua luma Hakobu, aba labuleseiruni liranaagua aba ladiliragun ñein lun Hakobu sun aniha lan ageindagua luma. 26 Ábati lariñagun wügüri ligía lun:

—Ígiragüdabana, larugada.

Aba lóunabuni Hakobu:

—Mígiragüdün nubadibu ánhana mabinirun ban.

27 Lariñaga wügüri ligía lun:

—Ka biri?

Aba lóunabuni:

—Hakobu níribei.

28 Lariñaga wügüri ligía lun:

—Mámaalime Hakobu biri. Ísüraeli ligíaba biri, ladüga ageindaguaadibu luma Bungiu luma hama wügüriña, ani gáñeitibu.

29 Lariñagati Hakobu lun:

—Ariñagabéiti nun ka lan biri guentó.

Lariñaga wügüri ligía lun:

—Kámegia bálügüdaha luagu niri? Aba labiniruni wügüri ligía ñein.

30 Aba láchuni Hakobu fulasu ligía Penueli, ladüga lariñagun:

—Ariha naali Bungiu igibu luma igibu lau sun lira wínwangidina.

31 Láfuriduña Hakobu Penueligiñe ligía láfuachun weyu, adamaheina liñati lárigi ladiliragun liranaagua. 32 Ligía chülǘ lubéi lumoun dan le, meigin hamuti ladügawagun Hakobu iranaaguaü ladüga labuleseirun ñein lun Hakobu.