1 Aba laganbun Hakobu luagu hariñahare lan lirahüñü Lawán:

—Barüla Hakobu sun le meha lani wáguchi, lau larisida.

2 Aba giñe larihini Hakobu luagu Lawán luagu mabuidunhali lan larihin luagun kei meha furumiñe. 3 Ábati lariñagun Bungiu lun Hakobu:

—Giribubá lageiroun búguchi le ñein habéi biduheñu, nídiba buma.

4 Aba lóunahan Hakobu tuagu Rakeli tuma Lía lun hayabin le ñeinhin lubéi hau lilügüniña mudún, 5 lariñaga houn:

—Ariha numuti luagu móuserun láadina lan húguchi kei meha furumiñe, gama lumoun éibugati Lubungiute núguchi numa súnwandan. 6 Subudi humuti luagu nadagimeinhaadina lan lun húguchi le lubuidun-agei niyaraati. 7 Gama lumoun ligía, yeeda láadina, danmeme sansi laali nafayeiruaha. Lau sun lira mígirunti Bungiu lun ladügün ni murusun wuribani nun; 8 lubaragiñe lira danha le lariñagun: "Nafayeirubadibu hau animaalu singa", súngubeiha aba hemeilihan singa. 9 Ítara liña lagidaruniña Bungiu libiñanigu luéi lun líchuguniña nun.

10 Luagu aban weyu dan le lidaani hawariruniña animaalu wügüriña animaalu würiña, aba gewenedü nan luagu singa hamá gábara wügüriña ha awarirubaliña gábara würiña. 11 Lidan uénedü ligía aba lagúarun lani Bungiu ánheli nun lau niri, nariñaga lun: «Anahán ya». 12 Lariñaga nun: «Arihabá buidu barihuba luagu sun lan animaalu wügüriña ha awarirubaliña animaalu würiña, singa, ladüga ariha naali sun le ladügübei Lawán bun. 13 Au Bungiu le arufudagubei lungua bun Beteli, le ñein lubéi bíchiga garaba luagu dübü, aba badügün aban füramasei nun. Saraba beiba lídangiñe fulasu le; giribubá lidoun fulasu le ñein lubéi bágurahoua».

14 Ábati hóunabun Rakeli tuma Lía:

—Wagia malagantehaadiwa lúbiñe wáguchi. 15 Lubaragiñe lira óuserarügü lumutiwa kamá hamuga terencha wagía. Darí lun laluguruniwa, aba lerederun lau le bafayeirubei lun luagu bamarieidun wama! 16 Lidan linarün katei, sun irisini le lagidarubei Bungiu luéi wáguchi, wani hau warahüñü. Adügabéi lubeiti le lariñagubei Bungiu bun.

17,18 Aba laranserun Hakobu lun lagiribudun lárigoun Kanáun, le ñein lubéi buga laganawa Isaakü le lúguchi. Aba lawariragüdüniña lirahüñü hama lúmarigu hawagun kameyu, barüléi sun lúmati aba líchuguniña luagu üma hama sun animaalu ha buga libihubaña luagu luadigimari, Padán-aramü. 19 Dan le lídinbei Lawán ásaraña lilügüniña mudún, aba tíweruhaniña Rakeli liguariuan. 20 Ítara liña leyeeduni Hakobu Lawán le Aramüna lau masubudiragüdünlani lun luagu léibuga lan. 21 Aba lidin lau sun le lúmati. Málüti, aba lánhiñuraguni duna le Éufüratesi, aba lasigirun lubaruaguóun luagun burí luwübüri Galaadü.

22 Ǘrüwa weyu lárigiñe, aba lasubudiruni Lawán luagu ñǘdünha lan Hakobu. 23 Aba lidin lárigi hau liduheñu luma, aba lárügüdüni luagun burí luwübüri Galaadü, sedü weyu lárigiñe. 24 Gama lumoun aba larufudagun Bungiu lungua lun Lawán le Aramüna áriebu ligía lidan luénedü, lariñaga lun:

—Madimurehabátia lun Hakobu lau irofuni.

25 Aba lárügüdüni Lawán Hakobu luagu burí luwübüri Galaadü le ñein lubéi lemeraagua Hakobu. Ñéinmeme giñe lemeraagua Lawán hau liduheñu. 26 Aba lariñagun lun Hakobu:

—Ka badügübei? Kame beyeedana? Barǘ baña nirahüñü kamá hamuga adaürǘtiña ha lánina wuribu! 27 Ka uagu beyeedana aba biabin aramudaguarügü mariñagunga ni kata nun? Lun hamuga subudinani nóunahañadibu hamuga lau ugundani, lau lamuri garanwoun tuma árüpa. 28 Mígirungubeitibu lun nachuuruniña nirahüñü hama nibañan. Adügaadibu aban libidiounigan aau! 29 Gayaraati hamuga nadügün wuribati hun sun huguya guentó, gama lumoun adimurehati Lubungiute búguchi nun áriebu buga, lariñaga nun: "Madimurehabátia lun Hakobu lau irofuni". 30 Gama lumoun anhein buga weiri lubéi babusenrun bagiribudun lúbiñoun búguchi, ani ligía lébubei bidin, kámegia bíweruhaña nubungiutegu?

31 Ábati lóunabuni Hakobu Lawán:

—Ladüga nanufudedun. Naritagun yebe luagu busenbadibu lan bagidaruniña birahüñü nuéi lau erei. 32 Gama lumoun anhein añahein lubéi biguariuan luma aban hádangiñe ha yáabaña, hilala! Waduheñu guánarügü hagíaba gefén. Ariñagabéi nun anhein gemegen bubéi numa, barübei.

Gama lumoun ibidiñeti yebe lun Hakobu luagu Rakeli lan íweruhabaliña liguariuan túguchi.

33 Aba lebelurun Lawán likianpunrugun Hakobu, lárigiñe, tidoun tikianpun Lía, luma giñe tidoun hakianpun bián idamuni, gama lumoun madari lumutiña guáriua. Dan láfuridun tídangiñe tikianpun Lía, aba lebelurun tidoun tikianpun Rakeli, 34 aba tanügüniña guáriua aba tíchuguniña lidoun lisadilin kameyu, aba tañuurun hawagu. Áluahati Lawán tidan sun kianpu, madari lumutiña. 35 Ábati tariñagun Rakeli lun:

—Núguchi, magañidabátia luagu siñá lan násaarun bigibugiñe, gama lumoun láuñadina nidaani.

Keiti láluahaniña Lawán guáriua, madari lumutiña. 36 Aba lagañidun Hakobu, aba lariñagun lun Lawán:

—Ka duru nadügübei? Ka nifigounbei lanarimebei béibaahanina? 37 Asagaraha baali sun nílagu, kagia bumegen badarirubei lidan nílagu? Rubei ya hagibugiñe biduheñu hama niduheñu, ariñaga hamaamugei ka lan wádangiñe richaguabei! 38 Sun wein irumu le nuadigimaribei buma, magüriagúntiña bilügüniña mudún, ni bilügüniña gábara; meigin au ni aban hádangiñe bilügüniña mudún, 39 manügün numutiña mudún ha burí háfarubaña animaalu áraabuna, lubaragiñe lira ábaha nafayeiruniña. Dan le burí híweruhoun bilügüniña áriebu yebe, wéyuagu yebe, aguburaha bumutiña nuéi. 40 Láfarahanaha lárouga wéyuagu, láfarahana lidiliga áriebu, dariha lun madabu lan nagu! 41 Wein irumu nau búbiñe ani anihán le yuubei nun. Nadagimeintina katorusu irumu buma hawagu bián birahüñü, sisi irumu hawagu bilügüniña animaalu, ani danmeme sansi baali nafayeiruaha. 42 Lun hamuga ua lan Lubungiute Abüraámü numa, Bungiu le Lubungiutebei núguchi Isaakü, chouru numuti luagu bóunahañadina lan hamuga málouga núhabu. Gama lumoun ariha lumuti Bungiu nirun, luma lebegi nuadigimari, aba ladeinhan bun áriebu buga.

43 Ábati lóunabuni Lawán Hakobu:

—Irahüñü nirahüñü, ibañani nibañan; mudún nilügüniña; sun le barihubei ya, nani! Lau sun lira, kagia gayaraabei nadügün guentó houn nisaanigu o houn lan hasaanigu nirahüñü? 44 Ligía lubeiti wadüga lubéi aban daradu le lunbei leseriwidun kei gefenti wadan wagía biángubei.

45 Ábati lanügün Hakobu aban dübü, aba líchuguni úaragua kei aban pilarü; 46 aba lariñagun houn liduheñu:

—Óundaragua humá dübü!

Aba hóundaragun sun hagía dübü, aba híchaaguni lidan aban, aba heigin ñein lurugabu dübü-agei ligía. 47 Aba líchugun Lawán liri fulasu ligía lidan lererun. «Hegarü Saadutá», líchigati Hakobu liri lidan lererun; Galaadü. 48 Ábati lariñagun Lawán:

—Gefenti dübü burí le wadan uguñe.

Ligía Galaadü lubéi liri fulasu ligía, 49 aba giñe híchugun liri fulasu ligía Misüpá ladüga lariñagun Lawán:

—Óunigirala Bungiu wadan lubá danme le siñaali waríagun woungua. 50 Ánhaña bóusera nisaanigu wuriba, o ánhabu lan amarieida hama amu würiña hanwoun, íbinime ua lan ni aban kei gefenti wadan, gefenti Bungiu guánarügü.

51 Aban lasigirun Lawán ariñaga lun Hakobu:

—Anihán dübü-agei le níchugubei wádangua wagía biángubei, 52 ligíaba gefenti luagu mánhiñuragun lubéi lan ni aban wádangiñe lun wañawarihan wóuniwagua. 53 Bungiu le Lubungiute báruguti Abüraámü, le giñe Lubungiute náruguti Naoru ligía lun larihin wadan.

Ábati láfiñurun Hakobu luagu Lubungiute Isaakü le lúguchi. 54 Aba ladagaragüdün Hakobu luagu wübü, aba lagúarun houn liduheñu lun heigin, hóutiña sun hagía, aba hásügürüni áriebu luagu wübü. 55 Larugan binaafin, aba lásaarun Lawán, aba lachuuruniña libañan hama lirahüñü; lárigiñe aba labiniruniña, aba lagiribudun lageiroun.