1 Lagumeseruña aguñeda dan le hachülürünbei bián lani Bungiu ánheli hagía Sodoma. Ñun liña Lotu bénabu libiti uburugu, ñein lubeiha hóundaragua gürigia. Dan le larihinbaliña, aba lásaarun eresibiraña, aba labuluchagun darí ladagarun lerebe múarugu, 2 lariñaga houn:

—Amuriahatina huma lun hásügürüni áriebu núbiñe. Gayaraabei hachibuni hugudi ñein, ábame hasigiruni héibugun haruga binaafin.

Hariñaga lun:

—Uá, teinki waña bun. Wásügürübei, áriebu ǘmadarugu ya uburugu.

3 Ábaya lagiribuhan Lotu saragu, aba hánharun lun houdin luma lúbiñoun. Dan le hachülürünbei, aba laranserun Lotu éigini houn, aba hadügün fein to maganatu lébini, aba heigin. 4 Marounrungiña yebe ligía hegeyedagunu sun wügüriña Sodomana luban Lotu, lúmagiñe le ñǘraütimagilibei dagá lumoun le wéiyatimahalibei, 5 aba hagumeserun agúaraha lun Lotu:

—Hagaña wügüriña ha ñǘbuinbaña búbiñoun guñoun to? Sagabaña! Busentiwa wagamariduniña!

6 Ábati láfuridun Lotu adimureha hama, gama lumoun aba ladouruni bena buidu dan le láfuridun, 7 lariñaga houn:

—Adüga humá fulesei nun numadagu, madüga huméi katei wíyeti le. 8 Añahán bián nirahüñü würiña mámarigiña, nasagaraaña hun lun hadügüni le habusenrun hau, gama lumoun madüga humá ni kata hau wügüriña ha ladüga nagunbirahan núbiñoun ani mosu nóunigiruniña.

9 Aba hariñagun lun:

—Gidaba ñéingiñe! Lúnrügaali buga liabin aban terencha kei buguya agumadirawa. Wuribatimabei wadüga bun sügǘ hau guentó.

Aba hagumeserun Sodomana óuserei Lotu wuriba, aba houdin luagun bena lun háguruni, 10 aba hínchuni bisidatiña ha lúbiñebaña Lotu háhabu, aba hebelaagüdüni Lotu, aba hadouruni bena, 11 aba marihingüda hamaniña bisidatiña ha lúbiñebaña Lotu wügüriña ha bóugudibaña. Sun hagía lúmagiñe le ñǘraütimagilibei dagá lumoun le wéiyatimahalibei, aba labuchadun hawagu áluahei bena.

12 Ábati hariñagun bisidatiña hagía lun Lotu:

—Añaheingua amu biduheñu ya? Barübaña birahüñü, bibarimugu, luma sun le bánibei lidan uburugu le, sagabaña, beiba hau dise yáagiñe, 13 ladüga wagünrinchaguaali fulasu le. Gíbeeli laganbahoun hawagu lílana uburugu le, ligía lóunahanbaliwa Bungiu agünrinchaguei.

14 Ábati lidin Lotu hamoun libarimugu ha hadarigu lirahüñü, aba lariñagun houn:

—Sará humá furí humá lídangiñe fulasu le, ladüga lagünrinchaguaali Bungiu!

Gama lumoun mafiñeruntiña lun le lariñagubei Lotu houn.

15 Keiti, arugadeina liña lubéi, aba hariñagun lani Bungiu ánheligu lun Lotu:

—Furesebá! Saraba, barüboun búmari hau bián birahüñü würiña yáagiñe, anhein mabusenrun bubéi bounwen danme le wagünrinchaguni uburugu le.

16 Keiti ladarasahan Lotu, aba hárügüdüni lani Bungiu ánheligu lúhabu, ladüga lagudemedagun lun Bungiu. Barǘ hamutu giñe lúmari hama lirahüñü würiña aba hasagaruniña uburugugiñe lun hesefurun. 17 Dan le furihaña lubéi uburugugiñe, aba lariñagun aban hádangiñe lani Bungiu ánheligu:

—Éibaaguaba, sefubá! Madigiraguabatia bárigoun, mararamagun buguyame luagu ni kata lidan fulasu wayati. Beiba luagun burí wübü anhein busén bubéi besefuruni bibagari.

18 Lariñaga Lotu houn:

—Uá naburemegu, fulesei humana! 19 Gíbeeli fulesei hadüga nun ani buitün numa lau hesefuruni nibagari, gama lumoun siñati nidin luagun wübü ragüliñelina lagünrinchawagun fulasu ǘmadarugu ábame nounwen. 20 Yarafa yáagiñe anihein aban liraüraü uburugu! Ígira humana lun nidin ñeinhin lun nesefuruni nibagari! Lidan linarün katei ñǘraüraüti uburugu ligía!

21 Aba lariñagun aban hádangiñe:

—Aganba náadibu, nadügaali le bamuriahabei. Magünrinchagun nubéi fulasu le uágubei badimureha nun. 22 Gama lumoun óufudaba! Beiba ñeinhin ladüga siñabei nadügün ni kata ánhabu machülü lidoun fulasu ligía.

Ligía Sóarü lubéi líribei fulasu ligía.

23 Dan le harugaali, lárigiñe lachülürün Lotu lidoun fulasu ligía le gíribei Sóarü, 24 aba láhuyagüdün Bungiu watu gemeti luma súfuru luagun Sodoma luma Gomora, 25 aba lagünrinchaguni hau sun ha aganóubaña ñein, gumuguagüdalei sun le áhüchübei ñein lidan fulasu wayati ligía. 26 Ánhounti lúmari Lotu, aba tiabin lárigi lárigi, gama lumoun aba tadigiragun tárigoun, aba tasaliragun ábanme guáriua lautu salu reiti ñein.

27 Larugan binaafin, aba lidin Abüraámü lidoun fulasu le ñein lubéi buga ladimureha luma Bungiu; 28 aba larihin uburugun Sodoma luma Gomora luma luagun fulasu wayati, aba larihin láfurihan gumuleli lídangiñe sun fulasu ligía kamá hamuga aban régigi. 29 Ítara liña lagünrinchaguni Bungiu uburugu burí le lídanbei fulasu wayati le ñein lubéi buga laganawa Lotu. Gama lumoun haritaguati luagun Abüraámü, aba lasagaruni Lotu lídangiñe fulasu le agünrinchawagubei.

30 Lárigiñe aba lanufudedun Lotu lun lerederun aganawa Sóarü, aba lidin aganawa dabíararugu, aba lanügüniña bián lirahüñü würiña lúmagua. Aba haganóun ǘrüwagubei hagía ñein lagadábugiñe dübü. 31 Luagu aban weyu, aba tariñagun íbugañaü tun amuleluaü:

—Wéiyaali wáguchi, ani úati ni aban eyeri ya lidan fulasu le lun lamarieidun wama keisi échuni; 32 wabacharuadagüdaali wáguchi, ábame warounrun luma garahüñü wamaamuga lau.

33 Gúñounmeme ligía aba híchugun diwéin lun háguchi, aba tarounrun to íbugañaü luma; gama lumoun mefenti háguchi luagu tarounrun luma, ni dan le tásaarun. 34 Larugan, aba tariñagun íbugañaü tun amuleluaü:

—Róuntinatia luma wáguchi áriebu, wabacharuadagüdayaali guñoun le roun báamuga luma, garahüñü wamaamuga wagía biángubei lau.

35 Guñoun ligía ábaya híchugun diwéin lun háguchi, aba tidin amuleluaü arounra luma, gama lumoun mefenti giñe Lotu luagu tarounrun luma ni luagu tásaarun. 36 Ábati hadageinadun biángubei lirahüñü Lotu lau. 37 Aba tagaraüdün íbugañaü aban wügüri irahü aba tíchugun Moabü luagu, ligía háguchibei Moábüna guentó. 38 Aba giñe tagaraüdün amuleluaü, aba tíchugun Ben-amí luagu, ligía háguchibei Amonna guentó.