1 Aba tidin Dina to tiráü Lía lau Hakobu ebeluha hamoun würiña irahüñü ha lílana fulasu ligía, 2 gama lumoun aba larihinu Sikemü le liráü Amoru le Eweuna, le ábuti lidan fulasu ligía, aba lafosurunu lun tarounrun luma. 3 Gama lumoun aba tínsiñedun lun saragu, aba louchun lagañeiruni tínsiñehabu. 4 Ábati ladimurehan luma Amoru le lúguchi, lariñaga lun:

—Beiba Amuriahei túhabu irahü to nun. Busentina namarieidun tuma.

5 Aba lasubudiruni Hakobu luagu lafosurunu Sikemü Dina to liráü lun tarounrun luma, gama lumoun kei añahein lubéi buga lirahüñü ha wügüriña áraabu habu habiñanigu, mariñagunti ni kata darí hagiribudun. 6 Ábati lidin Amoru le lúguchi Sikemü arihei Hakobu lun ladimurehan luma. 7 Dan le hagiribudun lirahüñü Hakobu áraabugiñe, aba haganbuni le asuseredubei, aba hagañidun, ladüga aban lan busiganu wéiriti lun Hakobu larounrun Sikemü tuma liráü. Aban katei lira le moun lumuti yebe ladügǘn! 8 Gama lumoun aba ladimurehan Amoru hama, lariñaga houn:

—Wéiriti tínsiñe hitu lun niráü Sikemü; fulesei humana, ígira humoun lun tamarieidun luma, 9 ábame gaduheñugua humá wama; ábame gayara lan wamarieidun hama hirahüñü, huguyame hama warahüñü. 10 Redei humá aganawa wama. Anihán wageira le hadüga lidan, aganawa humá ya, hadaagua marasun, hagañeiha fulasu.

11 Lárigiñe aba lariñagun Sikemü lun túguchi Dina luma houn tíbugañanu:

—Ayumuraguatina hun lun hánharun. Níchugubei le hamuriahan numa hun. 12 Meberesegúntina anhein íñubei lubéi le lunbei níchuguni tuagu, sügǘ lau le uágubei wéchuda, odi saragu lan idewesei, níchugubei hun, ígirarügü humaaru ligía würi to lun tamarieidun numa.

13 Keiti fosu laaru lan buga Sikemü Dina lun tarounrun luma, aba hóunabuni lirahüñü Hakobu Sikemü lau sun lúguchi lau iyeeni, 14 hariñaga houn:

—Siñati wíchugunu watu lun aban wügüri le michugúnti seini tuagu lóustarun, ladüga busiganubei lira woun. 15 Ánhaüngubeirügü ítarada kei wagía, lun lichugún seini tuagu hóustarun súngubei wügüriña hidan. 16 Ítararügübei gayara lan hamarieidun hama warahüñü, maríei wagíame hama hirahüñü, ábame waganóun huma ábame aban wamá gürigia. 17 Gama lumoun anhaün máharun lun ítara luba lan, wóudiba yáagiñe barǘ wamounme watu.

18 Aba lánharun Amoru lau sun Sikemü le liráü lun le hariñagubei lirahüñü Hakobu. 19 Meferidirunga dan, aba líchugun Sikemü seini tuagu lóustarun ladüga wéiriti lan tínsiñe liráü Hakobu lun. Sikemü meha inebewatimabei hadan liduheñu Amoru le lúguchi.

20 Aba lidin ligía luma Amoru le lúguchi luagun lubenari uburugu, le ñein lubéi burí ladaawagúa marasun, aba hariñagun houn lílana fulasu:

21 —Wügüriña ha, wamadagu, haganóuba lidan fulasu le, adaagua hagíame marasun ya, anihein saragu múa houn ya; gayaraabei wamarieidun hama harahüñü, hagíame amarieida hama warahüñü. 22 Gama lumoun lun ábanmemebadiwa lan gürigia, ánhatiña lun haganóun wadan, gama lumoun gasu lichugún seini tuagu hóustarun sun wügüriña ha wádanbaña ítara kei hagía. 23 Sun hamegen, sun habiñanigu, wánibaña. Lérügüñein lunbei wadügüni, wariñagun houn, "Anha". Ábame herederun aganawa wadan.

24 Aba hánharun sun wügüriña ha lílana uburugu ha gayaraahalibei hasudarahan, aba hánharun lun le lubeibei Sikemü luma lúguchi aba lichugún seini tuagu hóustarun. 25 Aba liabin Simeón luma Lewí, lirahüñü Hakobu, tátinu Dina, ǘrüwa weyu lárigiñe, dan le gárigili lárigi lichugún seini tuagu hóustarun wügüriña hagía, aba háfaraguniña sun hagía tau eféin, deregüdagu hagía habá. 26 Aba háfaruni Amoru lau sun Sikemü tau eféin, aba hasagarunu Dina lúbiñegiñe Sikemü, aba houdin. 27 Aba giñe hachülürün híbiri lirahüñü Hakobu, aba hásügürün hagibuagugiñe hilaguaaña, aba hanügüni le hadarirun fulasurugu, lun haguburahani tibusigari hatu.

28 Barütiña mudún, bágasu, burigü luma sun le ñeinbei uburugu luma áraabu; 29 íweruha hamuti sun le burí tídanbei muna barǘ hamaña sun irahüñü hama würiña. 30 Ábati lariñagun Hakobu lun Simeón luma Lewí:

—Ru humaadina lidoun turobuli. Guentó neyereeguduba houn lílana fulasu le, Kananna hama Féresüna. Hóundaraguba ábame hábürühan nuagun, keiti mibe habéi nuwügüriñanigu, háfaraguaadiwa hau sun waduheñu.

31 Hariñaga lun:

—Kámeti liabin óuseroun watu kei aban horu?