1 Aba labahüdüniña Dawidi lisudaranigu, aba líchugun hábutigu milu súdaragu ru ligía hábutigu san. 2 Aba ladügün ǘrüwa sétanu hau híbiri, aba lóunahan aban sétanu lumoun Hoabü, aban lumoun Awisái le lamulen Hoabü, aban lumoun Itái le lílana Gatü. Aba lariñagun houn sun súdaragu:

—Nídiba huma wuriburugu.

3 Gama lumoun aba hariñagun lun:

—Madügabéi katei le urúei, lugundun meberesegúnti ágani ánhawa anuraha o hóunwegun lan hamidan wádangiñe, ánheinti urúei gebegiti kei hebegi diisi-milu wádangiñe. Buítimati lubeiti lun bíderaguniwa uburugugiñe.

4 Ábati lariñagun urúei:

—Nadügübei le hariñagun. Aba lararamun urúei bénabu, sun añaha lan sun lílana fulasu áfurida, san san, luma milu milu súdaragu.

5 Aba lariñagun urúei lun Hoabü, Awisái luma lun Itái:

—Óusera humeitia Abüsalón buidu luéigiñe nóubadina.

Aganba hamuti sun lílana fulasu lariñaguni urúei katei le houn ábutigu libügürü Abüsalón. 6 Aba lubeiti háfuridun lánigu Dawidi ageindagua hama Ísüraelina,

Aba lagumeserun wuribu luagu luwübüri Éfürain, 7 aba heferidiruni Ísüraelina wuribu hama lánigu Dawidi, aba háfarun wein-milu wügüriña hádangiñe Ísüraelina. 8 Aba laweiridagun wuribu, gíbetiña láfaragun dabíara sügǘ hau táfaragun eféin. 9 Wariñu liña Abüsalón tuagu aban mile, sódini aba ladariragun lungua hagibugiñe lánigu Dawidi. Ábati tebelurun mile lau tábugiñoun aban óunwenbu tídibu wewe, aba ladahiragun lábulugu Abüsalón luagu tilimun; keiti aba lan tasigiruni mile téibugun, aba lerederun Abüsalón dibiñu. 10 Le arihubalin katei le, aba lidin ariñaga lun Hoabü:

—Ariha naali Abüsalón dibiñu tuagu aban tídibu wewe.

11 Lariñaga Hoabü lun:

—Anhein arihabubalin, kagia uagu máfarun bubalin ñein guánarügü? Níchuguña hamuga diisi murusun pülata bun luma aban béliti.

12 Lariñaga wügüri ligía lun Hoabü:

—Íbini hamuga bíchugun milu seinsu pülata nun, máfarun numuti hamuga liráü urúei; lugundun aganba wamuti lariñagun urúei bun, lun Awisái luma lun Itái lun máfarun humani Abüsalón. 13 Ábaya katei, anhein hamuga náfara, málati hamuga, ladüga úati ni kata aramudaguati lun urúei, ani buguya, madügüntibu hamuga ni kata lun badouragun nau.

14 Lariñaga Hoabü lun:

—Meferidirunhadina dan buma; aba lanügün ǘrüwa gimara, aba lácharunu tuagun lanigi Abüsalón, kei wínwangili lan yebe dibiñu tuagu tídibu wewe. 15 Lárigiñe, aba hegeyedagun diisi lánigu Hoabü lau Abüsalón, aba háfaruni hilagubei. 16 Lárigiñe aba línwinragüdünu Hoabü fidu, aba lerederun héibaahaniña lisudaranigu Dawidi Ísüraelina, ladüga lararamuniña Hoabü. 17 Ábati hanügüni lúgubu Abüsalón aba híchuguni lidoun aban óunwenbu huyu ñein áraabu, aba híchaagun saragu dübü ligibuagun. Lárigiñe aba hanurahan sun Ísüraelina hábiñoun.

18 Dan meha wínwangili Abüsalón adügagüdati meha aban aritaguagülei lauti dübü lidan fulasu wayati le lani urúei, aba líchuguni liri luagu, ladüga maráü lan lun lanügüni liri. Chülǘ lumoun dan le ligía líribei «Aritaguagülei luagun Abüsalón».

19 Lárigiñe aba lariñagun Aimaasi le liráü Sadoku lun Hoabü:

—Ayumuraguatina bun lun bíchugun üma nun lun nidin éibaagueina ariñaga lun urúei luagu sefulá lan Wabureme lídangiñe habafu láganiñu.

20 Lariñaga Hoabü lun:

—Mama buguya lunbei banügüni uganu le lun urúei uguñe. Banügüba uganu lun lidan amu dan, gama lumoun mama uguñe, lugundun hilá liráü urúei.

21 Aba lariñagun Hoabü lun aban súdara Etiopíana:

—Beiba asubudiragüdei katei le barihubei lun urúei.

Aba labuluchagun Etiopíana ligía ligibugiñe Hoabü, aba lidin éibaagueina. 22 Ábaya lariñagun Aimaasi lun Hoabü:

—Lau sun luwuyeri, ruba üma nun lun néibaagun lárigi Etiopíana.

Lariñaga Hoabü lun:

—Ka san uagu babusenra bidin, mibihinbadibugu idewesei luagu banügüni uganu?

23 Lariñaga Aimaasi lun:

—Meberesegúntina, néibuga éibaagueina.

Lariñaga Hoabü lun:

—Éibaaguaba den.

Ábati léibaagun Aimaasi lidan fulasu wayati, aba lásügürüni Etiopíana. 24 Anihánti buga Dawidi ñun labadinagua bián lubenari uburugu, ábati lawarirun le óunigirubei tábulugun muna lóugiñe lubenari baríeiru. Dan liñuruni óunigiruti larihin aba larihin aban wügüri éibaagueina lábugua, 25 aba lagúaragun ariñagei lun urúei. Lariñaga urúei:

—Anhein lábuguarügüñein lubéi, uganu buiti lanügübei.

Dan ayarafadeina lan wügüri ligía, 26 aba larihin óunigiruti ábanya wügüri éibaagueina, aba lagúaragun lun le óunigirubei luagu bena:

—Aniteya aban wügüri éibaagueina!

Lariñaga urúei:

—Mosu giñe uganu lan buiti lanügübei.

27 Lariñaga óunigiruti:

—Laganóun nun kamá Aimaasi le furumiñebei, luagu ligaburi léibaagun.

Lariñaga urúei:

—Wügüri buiti Aimaasi, chóuruti luagu uganu lan buiti lanügübei.

28 Aba lachülürün Aimaasi, aba labuluchagun chülǘ múarugu ligibugiñe urúei, aba labusurun lun, aba lariñagun lun:

—Biniwalá Wabureme le Lubungiute urúei, lugundun gumuguagüdalá ha iñuragubaña houngua luagun urúei.

29 Aba lariñagun urúei:

—Magadiñeti san Abüsalón?

Lariñaga Aimaasi lun:

—Arihatina aban óunwenbu chagaguaü lidan oura le lóunahanbalina Hoabü, gama lumoun ibidiñeti nun ka lan asuseredubei.

30 Ábati lariñagun urúei lun. Ráramaba luagu aban oubaü ábame berederun ñein. 31 Lidan oura ligía, aba lachülürün Etiopíana, aba lariñagun lun:

—Resibi huméi uganu buiti le uguñe, urúei:

—Adügaali Wabureme irichaü uguñe hun, urúei, lau lesefurunün lídangiñe habafu háganiñu.

32 Aba lálügüdüni urúei Etiopíana, lariñaga lun:

—Magadiñeti san Abüsalón?

Lariñaga Etiopíana lun:

—Ítara hamuga hagumuchun sun láganiñu urúei kei lagumuchun Abüsalón.

33 Aba lírudagun urúei, aba lamudeirun lirumunrugun to lóugiñeboun bena, aba layahun. Anihánti éibuga, aniha ariñaga lidan layahun:

—Abüsalón, niráü! Abüsalón niráü! Áugubeihali hamuga ounwe beweñegua! Niráü, Abüsalón, niráü!