1 Átiri dan lárigiñe, aba libihin Abüsalón aban karü to lánina wuribu hama gabayu, aba líchugun dimí-san wügüriña lun hóunigiruni. 2 Ábaha saragia lan aba lararamun laru üma lubenari uburugu, súntiha le ñǘbuinti lun laguserun luma urúei, ábaha lagúarun Abüsalón lun, aba lálügüdüni halíagiñe lan uburugu liabin. Anhein ariñaga luagu hádangiñeti lan aban hádangiñe lani Ísüraeli türibu, 3 aba lariñagun Abüsalón lun: «Búmagiñebei lúrudu, ladüga richatibu, gama lumoun úati kaba lan etenira bun luéigiñe lóubadina urúei». 4 Ábaha lariñagun: «Áudügü hamuga aguseragüdüti lidan fulasu le, lun hamuga hayabin sun ha gawuribunbaña le richati numoun, níchuguñein hamuga haricha houn». 5 Dan giñeha liabin gürigia abusura lun, ábaha labouchagun Abüsalón lúhaburugu luma, aba lóuburuni, aba lachuuruni. 6 Ítara liña ladüga houn sun Ísüraelina ha ñǘdüntiña lun líchuguni urúei haricha houn, ábatiha lagañeiruniña ítara.

7 Gádürü irumu lárigiñe, aba lariñagun Abüsalón lun urúei:

—Amuriahatina huma, urúei, lun híchugun üma nun lun nidin Ebürón, agunfulirei füramasei le nadügübei lun Wabureme. 8 Dan meha le Gesuruñein lubéi le lani Siria hubúein, urúei, füramasetina meha lun Wabureme luagu anhein lan adüga lun nagiribudun Herusaléun, náhuduraguba lan lun.

9 Lariñaga urúei lun:

—Beiba darangilu.

Ábati lidin Abüsalón Ebürón. 10 Gama lumoun aba giñe lóunahan ariñaga houn sun lani Ísüraeli türibu lun danme lan haganbuni tumalali fidu, aba lanme hasubudiragüdüni luagu hurúaguaali lan Abüsalón lun urúeime Ebürón. 11 Amisurahati giñe bián-san wügüriña Herusaléngiñe, aba houdin luma lau ugundani ibidiñounga ni kata houn luáguti le laransehabei. 12 Óunahati giñe Abüsalón luagu aban hádangiñe lani urúei eweridihatiña gíriti Aitoféli, le aganóubei uburugu Giló, le lageira lun luma lan sun aniha lan Abüsalón adagaragüda. Aba lubeiti éredeina lan eledeguni, aganwoundeina lánigu Abüsalón.

13 Aba lidin aban lauti uganu ariñaga lun Dawidi luagu añaha lan Ísüraelina ñǘdüngua lúmagiñe Abüsalón. 14 Ábati lariñagun Dawidi houn sun úfisigu ha lúmabaña Herusalén:

—Anuraha wamá furese, ánhawa adarasaha, siñabei wesefurun luéi Abüsalón! Keimoun, furese humá, ragüliñeliwa, adügaliñein saragu wuribani woun, áfaragualañame sun lílana uburugu tau eféin.

15 Aba hariñagun lun urúei:

—Aransetiwa lun wadügüni sun le hariñagun.

16 Aba lubeiti láfuridun urúei hau sun ha lúmabaña lúbiñe, díisirügüñanu hádangiñe lubúalinigu lígira lun hóunigirunu palasiu. 17 Lárigiñe láfuridun urúei hau sun ha úarabaña luma, aba hararamagun tidan tagumuhóun muna to uburuguboun. 18 Aba herederun sun lani úfisigu lóubagiñe, sunti Keretüna hama Peletüna ha lúniri, hama sisi-san Étüna ha afalarubalin uburugugiñe Gatü, aba houdin lubá lubá. 19 Lidan oura ligía, aba lariñagun urúei lun Itái, le uburuguna Gatü:

—Ka uagu biábinbei giñe wama? Buítimati lun bagiribudun lun berederun luma iseri urúei, lugundun aban terencha abugúti lageiragiñe buguya. 20 Sun liña bachülürün gúñaarü, ida lubagia nariñagun bun lun bidin wama, ibidiñegubeihali nun ni haliñounbadina lan? Buítimati lun bagiribudun, banügañame bupaisanun búmagua. Binilabu Wabureme, buma ligíame súnwandan!

21 Lariñaga Itái lun urúei:

—Fiñutina luagu Wabureme luma luagu urúei luagu le lan ñein lumuti urúei lun yebe ibagari, lun yebe óunweni, ñéinbadina giñe.

22 Lariñaga Dawidi lun:

—Keimoun wama.

Ítara liña lidin Itái luma Dawidi úara hama luwügüriñan hama gürigia ha úaradubaña luma. 23 Aba houdin súngubei ayahuaheina. Aba hánhiñuraguni liraüraü lidunari Sedurón; lárigiñe aba lánhiñuragun urúei, aba hasigirun sun hagía lubá lubá luagu lémeri fulasu mageirawati. 24 Ñǘdünti giñe Sadoku hama hau sun Lewitagu ha táubaña lubagüsina lidaradun Wabungiute, to hígiruboun lurugabu Abiatárü darí háfuridun súngubei uburugugiñe. 25 Gama lumoun aba lariñagun urúei lun Sadoku:

—Giribubá tau lubagüsin Wabungiute uburugun, ladüga ánhana líderagua Wabureme, ladügüba lun nagiribudun, lun narihinu lidan tubara. 26 Gama lumoun anhein ariñaga nun luagu magundan lan nau, anahán, adügaléi le labusenrun nau.

27 Ariñagati giñe urúei lun Sadoku le fádiri:

—Buguya luma Abiatárü, giribu humá darangilu uburugun hau biángubei hirahüñü. Buguya lau biráü Aimaasi, Abiatárü lau Yónatan le liráü. 28 Au, nerederuba luagu fulasu mawübüriti lidan fulasu mageirawati darime lachülürün uganu nun huagu.

29 Aba hagiribudun Sadoku luma Abiatárü tau lubagüsin Wabungiute Herusaléun, aba herederun ñein. 30 Aba lamudeiruni Dawidi wübü Oliwu, masabadunga, ayahuaheina, darugu lau lichügü, le liseinin igarigu. Sun gürigia ha úarabaña luma, darugu liña giñe lau hábulugu ani ayahuaheina giñe hamudeira. 31 Dan lariñawagúnbei lun Dawidi luagu Aitoféli lan aban hádangiñe ha eledegubaña luma Abüsalón, aba layumuragun Dawidi lun Wabureme lun lagünrinchaguni laransehan Aitoféli.

32 Dan lachülürünbei Dawidi lábulugu wübü, le ñein lubéi láhudurawagua lun Wabungiute, aba liabin Usaí le hádangiñebei Arükítagu lubaroun, tau ladaüragun huchecheeru, lau kaliki lábulugu. 33 Aba lariñagun Dawidi lun:

—Ánhabu ñübuin numa, ábanbadibu ihürü nun; 34 gama lumoun ánhabu agiribuda Herusaléun, bariñagame lun Abüsalón: "Urúei, neredera eseriwida hun kei meha neseriwidun lun húguchi", bíderagubadina agünrinchaguei laransehan Aitoféli, 35 añahein fádirigu Sadoku luma Abiatárü ñein. Subudigüdabei sun le baganbun palasiurugu houn súnwandan. 36 Anihein giñe Aimaasi luma Yónatan ha hasaanigu ñein, hóunahame lubeiti asubudiragüdei sun le hasubudirun nun hama.

37 Aba lachülürün Usaí le lumada Dawidi uburugun Herusalén lidan oura le lebeluruña lan Abüsalón uburugun.