1 Átiri dan lárigiñe aba lounwen Naasü le harúeite Amonna, aba larúeihan Anún le liráü leweñegua. 2 Ábati laritagun Dawidi luagu lunti lan lóuseruni Anún le liráü Naasü buidu kei meha lóuseruni Naasü Dawidi, aba lóunahan fiu hádangiñe lani úfisigu lun híchuguni ligarigu lun Anún luagu lounwen lúguchi. Gama lumoun dan hachülürünbei lani Dawidi úfisigu hageiroun Amonna, 3 aba hariñagun ábutigu Amonna lun Anún le harúeite:

—Haritaguati san urúei luagu lóunahañanu lan Dawidi wügüriña ha lun híchuguni ligarigu lun, odi lúnrügü híchugun inebesei lun lúguchi urúei? Lóunahañanu lun haríaahani uburugu, lárigiñeme ábame hagünrinchaguni!

4 Ábati líchugun Anún dimurei lun hadaürawagun lani Dawidi úfisigu, luma lun lásarawagun aban louba hádiuma héiriwaguame hadaüragun íñugiñe tibiti darí lumoun hede. Lárigiñe aba hóunahaniña hárigoun. 5 Dan lasubudirunbalin Dawidi, aba lóunahan gürigia habaroun ladüga wéiribei busiganu hawagu, aba hariñagun houn lun herederun Herikó, darime lan labouchun hádiuma ligía lanme buga hagiribudun.

6 Aba gunfuranda hamani Amonna luagu iyereeguhaaña lan lun Dawidi, aba lubeiti hafayeirun wein-milu súdaragu Síriana Betü-reobugiñe luma Sobagiñe, milu wügüriña lúmagiñe lurúeite Maaká, hama duusu-milu lúmagiñe Isütóbu. 7 Gama lumoun aba lasubudiruni Dawidi, aba lóunahani Hoabü hau sun lisudaranigu. 8 Aba hawanserun Amonna, aba haranserun lun wuribu lubenari uburugu, ánhañati súdaragu Síriana Sobagiñe luma Reobugiñe, lisudaraniguti Isütóbu luma Maaká aba hesetiragun houngua áraabu. 9 Dan larihinbei Hoabü luagu hábürühaba lan luagun dandu ligibugiñe keisi lanagangiñe, aba lanúadiruniña habuidun-agei súdaragu Ísüraelina lun lageindagun hama Síriana. 10 Aba líchuguniña híbiri súdaragu labun laríaahan Awisái le lamulen lun lageindagun hama Amonna, 11 aba lariñagun lun:

—Ánhaña here Síriana nuéi, biábinme íderaguana, ánhaña here Amonna buéi, ábame nidin íderaguabu. 12 Ragüba gurasu, wageindagua lau anigi luagu wageira luma luagu burí luburugute Wabungiute. Adügaléi Wabureme le labusenrun!

13 Aba lawanserun Hoabü hau lisudaranigu lun lageindagun hama Síriana, gama lumoun aba héibaagun luéi. 14 Dan harihinbei Amonna héibaagun Síriana, aba giñe héibaagun luéi Awisái aba hebelurun uburugun. Ábati lerederun lageindagun Hoabü hama Amonna aba lagiribudun Herusaléun.

15 Dan harihinbei Síriana luagu gañei laaña lan Ísüraeli, ábaya hóundaragun. 16 Aba lóunahan Adadü-éserü hawagu Síriana ha loubafurugubaña duna Éufüratesi, aba hayabin uburugun Elamü, lábugiñe lagumadihan Sobakü, le hábuti lisudaranigu Adadü-éserü. 17 Gama lumoun aba labahüdawagún katei le lun Dawidi, aba lánhingichagun furese hau sun Ísüraelina, aba hánhiñuraguni duna Hordán, aba hachülürün Elamü. Aba hageindagun Síriana luma Dawidi ñein, 18 gama lumoun lagumuhóun oura, aba héibaagun hawéi Ísüraelina, ladüga bián wein míluñanu súdaragu láfarun Dawidi hádangiñe ha hawagutiña gabayu hama sedü-san ha táutiña karü to lánina wuribu; áfara lumuti giñe Dawidi Sobakü le hábuti súdaragu Síriana ñein. 19 Dan harihinbei sun urúeigu ha lúmagiñebaña Adadü-éserü luagu gañei hamaaña lan Ísüraelina, aba hebelurun lidoun úarani hama Ísüraelina aba herederun lábugiñe habafu. Lúmagiñe dan ligía, hanufudeeña Síriana híderaguniña Amonna.