1 Dan lárigiñe, aba houdin sun lani Ísüraeli türibu Ebürón adimureha luma Dawidi, hariñaga lun:

—Ábanmeme hitaü wagía buma, 2 lidan dan le sügühalibei danbei le Saulu lan meha warúeite, huguya meha abugurubalin Ísüraeli wuriburugu. Lumoun lira, ariñagaali Wabureme hun luagu huguyaba lan buga alidihei ani abugura humeime lageira.

3 Ítara liña lubeiti aba houdin sun ábutigu Ísüraelina uburugu Ebürón adimureha luma Dawidi, aba ladügün aban daradu hama, aba líchuguni Wabureme kei gefenti libügürü daradu ligía. Ábati háhurudaguni Dawidi keisi lurúeite Ísüraeli. 4 Darandi irumu lau Dawidi dan le lagumeserunbei arúeiha, aba larúeihan bián wein irumu. 5 Rédeiti lurúeiteme Hudá uburugu Ebürón luagu sedü irumu dimí, lárigiñe aba larúeihani Ísüraeli luma Hudá uburugu giñe Herusalén luagu darandi-ǘrüwa irumu.

6 Aba lidin urúei Dawidi habu lisudaranigu lun hageindagun luma Herusalén. Hebusuna meha awinwandubaña ñein. Aba yebeti haritagun Hebusuna luagu lásiñarubaña lan agañeira. Aba lubeiti hariñagun lun:

—Siñabei bebelurun ñahoun, buídurügütiña marihintiña hama danimatiña lun hararamunibu luéi bebelurun.

7 Gama lumoun aba lárügüdüni Dawidi uburugu derebuguti le lani Sión, aba lasansiruni liri luagu luburugute Dawidi. Ítaga liña lasuseredun katei. 8 Weyu ligía aba lariñagun Dawidi houn lisudaranigu:

—Le busenti láfaraguniña Hebusuna, fugiabugu marihintiña hama danimatiña hagía ha iyereegubaña nun, belula luéigiñe lichanilin duna.

Ñéingiñe lubeiti liabin dimurei le: «Ni marihintiña, ni danimatiña, siñati hebelurun litenpulunrugun Wabungiute». 9 Aba lubeiti lerederun Dawidi awinwanda lidan uburugu derebuguti ligía, aba labadiseiruni kei luburugute Dawidi. Lárigiñe aba layaraaguni lau dübü, lúmagiñe luéigiñe wáyelesi Milu darí tuagun palasiu.

10 Aba aganwoundeina lan lubafu Dawidi, lugundun lúmañein lan Wabureme le Lubungiute. 11 Ligía lóunahanbei Iramü le lurúeite uburugu Tiru óunagüleigu lumoun Dawidi, óunahati giñe fulansu hibúari, sarafangei hama nadagimeintiña dübü aba hadügünu luban Dawidi. 12 Ábati gunfurandalani Dawidi luagu ru laali lan Wabureme lun urúeime sunsuinagubei uburugu Ísüraeli, luagu giñe lawanseragüdüñein lan larúeihan luagu hafulesein Ísüraelina ha lumutuniña.

13 Lárigiñe láguyun Dawidi Ebüróngiñe lun Herusaléun, aba lanügün hanwoun lúmarigu hama lubúalinigu, aba hagaraüdagun hanwoun lirahüñü. 14 Anihán hiri lirahüñü ha águrahoubaña Herusalén: Samúa, Sobabü, Natán, Salomón, 15 Ibarü, Elisúa, Néfegü, Hafia, 16 Elisamá, Eliadá luma Eliféletü.

17 Dan haganbunbei Filistéana luagu hurúaguaali lan Dawidi keisi urúei, aba houdin súngubei áluahei; gama lumoun aba lasubudiruni Dawidi, aba lidin lidoun uburugu baríeiruati. 18 Ábati hawanserun Filistéana aba hárügüdüni fulasu wayati le lani Refaímü. 19 Ligíati lálügüdahanbei Dawidi luma Wabureme, lariñaga lun:

—Gayaraati san nageindagun hama Filistéana? Bagañeiragüdübei san wuribu nun?

Lariñaga Wabureme lun:

—Bageindagua hama, nagañeiragüdübadibu.

20 Aba lachülürün Dawidi Baali-perasímü, aba lagañeiruni wuribu hawagu Filistéana ñein. Ligía lariñagunbei:

—Daraali Wabureme üma nun hadan náganiñu kei aban léibaagun duna héreti.

Aba lagúaruni fulasu ligía Baali-perasímü. 21 Aba hígiruniña Filistéana haguariuan, aba labudahaniña Dawidi hama lánigu.

22 Gama lumoun ábaya hárügüdüni Filistéana fulasu wayati Refaímü,

23 ábati lálügüdahan Dawidi luma Wabureme, lariñaga Wabungiute lun:

—Mageindaguabá hama hagibugiñe, geyeguabá hau, ábame bábürühan hawagun hanagangiñe danme bachülürün tumoun burí tídibu bálüsamu. 24 Danme baganbuni areinchuni lóugiñe tídibu burí wewe, ábame bábürühan hawagun, mini lan lira luagu anangüra lan bubá bubá lun náfaraguniña hasudaranigu Filistéana.

25 Aba ladügüni Dawidi le lariñagubei Wabureme lun, aba lagañeiruni wuribu hawagu Filistéana lúmagiñe Gabaóngiñe darí Géserü.