1 Dan le tídanhali lani palasiu urúei Dawidi, ani ru ligía Wabureme darangilaü lun hama sun láganiñu ha geyegubaña lau, 2 aba lariñagun lun Natán le profeta:

—Kei barihini, tidan palasiu lautu hibúari naganawa, anhoun lubagüsin Wabungiute tídanñoun kianpu.

3 Lariñaga Natán lun:

—Adügabéi le baritagubei lugundun íderagua lumutibu Wabureme.

4 Gama lumoun áriebumeme ligía aba lariñagun Wabureme lun Natán:

5 —Beiba, bariñagame lun nubúein Dawidi: Luagu nariñahare lan, au le Aburemei: "Mámaba buguya ábunagua ténpulu nun lun naganóun tidan. 6 Lúmagiñe weyu le nasagarunbaliña Ísüraelina Ehiptugiñe, chülǘ lumoun dan le, maganóungidina ténpulurugu, tidan burí kianpu neredera. 7 Lidan sun dan le naubei éibuga huma, ni aban wéiyaasu mariñaguntina lun ni aban hádangiñe hábutigu, ha níchugubaña lun hadundehaniña nánigu ha Ísüraelina, lun hábunagun aban ténpulu lautu hibúari nun". 8 Ariñagabá lubeiti lun nubúein Dawidi: Lariñahare Aburemei Suntigabafu: "Au asagarubalibu tanagangiñe haban mudún, aba nagidarunibu luéi béibugun hárigi hárigi mudún, lun hábutibadibu lan numutuniña; 9 ñǘdünhadina buma sun le ñeinhin lumuti bidin, gumuguagüda naaña sun báganiñu ha agagibudagubaña buma, ani adügaadina lun ladimurehoun buidu buagu kei ladimurehoun buidu hawagu wügüriña wéirigutiña ha lánina ubóu le. 10 Bóugudin luéi lira, aransedina aban ubaraü habá Ísüraelina ha numutuniña, ani ru naaña ñein lun haganóun lidan aban ubaraü le hani, le ñein lumuti úabei lan añawarihati houn, míchugun hagíame gürigia wuribatiña lidere dan houn kei meha, 11 dan le níchugunbei ábutigu lun habuguruniña Ísüraelina ha numutuniña. Nadügüba lun furangu ban hawéi sun báganiñu. Ani nasubudiragüdüñein bun luagu níchuguba lan badügawagun, 12 lun danme lan lachülürün dan lun bounwen, níchuguba aban hádangiñe badügawagun lun larúeihan. 13 Ligíaba ábunagua ténpulu nun, ábame níchuguni larúeihan lun magumuchadi lan. 14 Ábanbadina úguchili lun, ligíame aban isaani nun. Danme ladügün duru, nabeichubei kei ladüga sun úguchili lun liráü; 15 gama lumoun magida nubéi nareini luéi kei nagidaruni luéi Saulu, le nagidarubei lun níchugunibu leweñegua. 16 Chóurubei barúeihan luma harúeihan badügawagun lábugiñe naríaahan súnwandan; ani magumuchadibei barúeihan".

17 Aba labahüdaguni Natán sun katei le lun Dawidi, ítara kei larihini luma laganbuni. 18 Ábati lebelurun urúei Dawidi lun ladimurehan ligibugiñe Wabureme, aba lariñagun:

—Wabureme, kátañadina san, ani kátañanu niduheñu banügünbalina chülǘ ya? 19 Ani lóuguamemegili san le bun Nabureme, adimurehaadibu lubéi giñe hawagu ladügawagun bubuein lubá dan le lunbei liabin! Úati ni aban wügüri adügüti le badügübei, Nabureme! 20 Kagia amu gayaraabei nariñagun bun Nabureme, subudi bumutinagu? 21 Adüga baali sun ubuiduni le, kei füramase bani luma kei babusenruni, lun nasubudirubei lan; 22 wéiriti lubeiti buéirigun Nabureme! Ladüga úati ni aban kei buguya, úati giñe amu bungiu buéi, según sun le aganba wamaalibei. 23 Úati amu kei Ísüraeli ha bumutuniña, úati amu kei ligía, ladüga ligíarügüñein néchani ubouagu! Buguya Wabungiute, buguya esefurubalin lun bánigubei lan, aba badügün lun ladimurehoun buidu luagu lau badügün katei wéinamuburiti luma hanarimeguti luagu lufulesein. Chagá bumutiña híbiri néchanigu hau sun habungiutegu hagibugiñe bánigu ha basagarubaña Ehiptugiñe; 24 ladüga aranse baali lun bánigubei lan Ísüraeli lun sun dan, ani buguyaba lan Labureme luma Lubungiute.

25 —Ítara liña lubeiti Wabureme Wabungiute, gúnfulibei le bariñagubei nun, au le bubuein luma houn nadügawagun. 26 Rualá uéiriguni lun biri súnwandan, ariñawagúa ligíame luagu Wabureme lan le Suntigabafu Lubungiutebei Ísüraeli! Deregüdagu hamá ladügawagun Dawidi le bubuein lábugiñe baríaahan! 27 Wabureme Suntigabafu, subudigüda baali nun luagu badügüba lan lun magumuchadi lan arúeihani tídangiñe nuban; ligía namuriahanbalin katei le buma lau sun bubuein nan. 28 Guentoti, Wabureme, buguya Búngiubei, ani inarüniti bererun, ani füramasehadibu saragu areini nun; 29 binibaña lubeiti ladügawagun bubuein lun lábugiñe hamá baríaahan súnwandan. Buguya ariñagubalin Nubungiute, ani lau babiniragüle, biniwañu haba ladügawagun bubuein súnwandan.