1 Irumu lárigiñe, lidan lidaani burí meha háfuridun urúeigu ageindagua, aba lóunahani Dawidi Hoabü hama lani úfisigu hau sun súdaragu Ísüraelina, aba hagünrinchaguniña Amonna aba hegeyedaguni uburugu Rabá. Ánheinti Dawidi, aba lerederun Herusalén.

2-4 Luagu aban rábounweyu dan lásaarun Dawidi tídangiñe ligabanan aba lerederun asariñaha tábulugu lani palasiu, aba larihin aban würi magadiñetu ñéingiñe, tágounña. Sun liña lígirunu tidaani. Aba lóunahan Dawidi álügüdaha katoun lan, aba hariñagun lun luagu Betüsawé lan tíribei, liráü Eliamü, lúmari Uríasi le Étüna. Ábati lóunahan Dawidi ariñaga lun hanügünu lun, aba lagamaridunu, lárigiñe aba tagiribudun túbiñoun.

5 Aba tadageinadun würi tuguya, aba tasubudiragüdüni lun Dawidi. 6 Ábati lariñagun Dawidi lun Hoabü lun lóunahan anügei Uríasi lun, aba lóunahan Hoabü anügei. 7 Dan lachülürünbei Uríasi ligibugiñe Dawidi, aba lálügüdüni Dawidi ida liña lan Hoabü hau sun súdaragu luma ka lan uganubei luáguti wuribu. 8 Lárigiñe aba lariñagun lun lun lidin lúbiñoun ábame lan lemeraagun; aba láfuridun Uriasi; aba lóunahan Dawidi idewesei lun lúbiñoun. 9 Gama lumoun lubaragiñe hamuga lidin lúbiñoun, rédeirügü ligía ásügürei áriebu tubenari palasiu hama súdaragu ha óunigirubarun palasiu. 10 Dan lariñawagúnbei lun Dawidi luagu midin lan Uríasi lúbiñoun, aba lariñagun Dawidi lun:

—Ka uagu midin bubéi búbiñoun lárigi wéiyaasu le badügübei?

11 Lariñaga Uríasi lun:

—Dandu bágüsi to sagüráuboun kei sun lisudaranigu Ísüraeli luma Hudá tídanñanu dibasein; dandu giñe Hoabü le nábuti, hama lani urúei úfisigu, áraabu harumuga; áumeti lun nebelurun núbiñoun lun neigin luma lun natun luma lun narounrun tuma númari? Madügün nubéi!

12 Gama lumoun aba lariñagun Dawidi lun:

—Rédeimemeba uguñe, harugame bidin.

Ítara liña lerederun Uríasi Herusalén darí larugan. 13 Aba lagunbirahani Dawidi lun leigin luma lun latun luma, aba labacharuadagüdüni. Gama lumoun guñoun, aba láfuridun Uríasi aba lidin arumuga hama súdaragu ha óunigirubarun palasiu, gama lumoun mídinyati lúbiñoun.

14 Larugan binaafin, aba labürühan Dawidi aban gárada lun Hoabü, aba lóunahanu luma Uríasi. 15 Lariñahare tidan gárada tuguya: «Ru huméi Uríasi igibugiñoun lidan ubaraü le ñein lubéi deretima lan wuribu, lárigiñeme ábame hígiruni lábugua áfara hamaamugei».

16 Ítara liña lubeiti, dan legeyedagunbalin Hoabü uburugu lun lábürühan luagun, aba líchuguni Uríasi le ñein lubéi subudilani luagu ñéinñanu lan súdaragu ha ganigitimabaña; 17 lídanti aban oura dan le háfuridunbei áganiñu ha óunigirubalin uburugu lun hageindagun luma Hoabü, aba háfaragun fiu hádangiñe lani Dawidi úfisigu, labu giñe Uríasi.

18 Aba lóunahan Hoabü asubudiragüdei luáguti wuribu lun Dawidi, 19 lariñaga lun le lóunahabei:

—Danme lásurun basubudiragüdüni luáguti wuribu lun urúei, 20 háfuga lagañiduba urúei, ábame lariñagun bun: "Kame hayarafada saragu dan le hábürühan luagun uburugu? Ibidiñeti funagia hun luagu chamugua hamá katei burí luéigiñe baríeiru, 21 ítara kei dan le táfaruni aban würi Abimélekü uburugu Tebesi lau tachüürün aban lidübüri amuligülei luagun luéigiñe baríeiru? Kámeti hayarafada saragu lun baríeiru?" Bariñagameti lun: "Hilati giñe Uríasi le Étüna, le bani úfisi".

22 Aba lidin le laubei uganu, dan lachülürün aba labahüdaguni sun le lariñagubei Hoabü lun, lun urúei. 23 Aba lariñagun lauti uganu lun:

—Aba hawanserun súdaragu ha áfuridubaña ageindagua wama wawéi, gama lumoun aba wabaküragüdüniña chülǘ luagun lubenari uburugu. 24 Dan le hachüühanu ha táubaña gimara hagimaran luéigiñe baríeiru hawagun lisudaran urúei, aba hóunwegun fiu hádangiñe lani urúei úfisigu, hilati giñe Uríasi hadan.

25 Ábati lariñagun Dawidi lun anügüti uganu:

—Ariñagabá lun Hoabü lun madiheridun lan saragu luagu katei le, lánina wuribu sun le. Gama lumoun ageindagualá hama lílana uburugu lau anigi darime lun lagünrinchaguni. Buguyati, ruba gurasu lun.

26 Dan taganbunbei lúmari Uríasi luagu hilá lan túmari, aba tamuiserun lárigi; 27 gama lumoun lárigiñe tágurun ludu, aba lóunahan Dawidi tuagu, aba leresibirunu tidan lani palasiu, aba lanügünu lúmarime, aba tagaraüdün aban wügüri irahü lau. Gama lumoun magundanti Wabureme lau katei le ladügübei Dawidi.