1 Luagu aban weyu aba lálügüdahan Dawidi, lariñaga: «Aniheingua san aban hádangiñe liduheñu Saulu, le unti gayara lan nadügün buiti naritaguagüleme luagun Yónatan?»

2 Ñeinñein aban habúein liduheñu Saulu gíriti Sibá, aba hagúarun lun lun lidin lun Dawidi. Dan lachülürünbei Sibá ligibugiñoun urúei, aba lariñagun lun:

—Sibá buguya?

Lariñaga lun:

Anha.

3 Ábati lariñagun urúei lun:

—Aniheingua san aban hádangiñe liduheñu Saulu le unti gayara lan nadügün buiti, lidan liri Wabungiute?

Lariñaga Sibá lun:

—Aniheingua aban liráü Yónatan danimati luéigiñe biángubei lugudi.

4 Lariñaga urúei lun:

—Hageigia?

Lariñaga Sibá lun:

—Anihein Lodebárü, lúbiñe Makirü le liráü Amieli.

5 Ábati lariñagun urúei lun lanügǘn lídangiñe fulasu ligia; 6 danti lachülürünbei Mefi-bosetü le liráü Yónatan, libari Saulu ligibugiñe Dawidi, aba labuluchagun arufudei linebenehabu. Aba lariñagun Dawidi:

—Mefi-bosetü!

Aba lóunabun Mefi-bosetü:

—An nurúeite.

7 Lariñaga Dawidi lun:

—Manufudedabá, nóuserubadibu buidu, naritaguagüleme luagun Yónatan le búguchi. Nadügüba lun lagiribudun sun lumúan Saulu le báruguti bun, ani béigiba luagu nidabulan súnwandan.

8 Gama lumoun aba labuluchagun Mefi-bosetü, aba lariñagun:

—Ka san uagu lariha urúei nuagun, au le ítarabei kei aban ounli hilaali?

9 Aba lagúarun urúei lun Sibá, le meha lubúein Saulu, aba lariñagun lun:

—Derege naali sun le meha lumegenbei babureme lun libari. 10 Ítara liña lubeiti, buguya, birahüñü hama bumusuniña, bábunagubei múa lun, ábame bareiduni le alubahóuti lun hawinwandun liduheñu babureme, ánheinti Mefi-bosetü, le libari luáguba nidabulan leiga súnwandan.

11 Aba lariñagun Sibá le kéinsibaña lirahüñü hama wein lumusuniña lun urúei:

—Ladügǘba sun le lariñagubei urúei nun.

Aba leigin Mefi-bosetü luagu lidabulan Dawidi, keisi aban hádangiñe lirahüñü urúei. 12 Gasaaniti giñe aban ñǘgili gíriti Mikaíasi, sun ha awinwandubaña lúbiñe Sibá seriwitiña lun Mefi-bosetü. 13 Gama lumoun Mefi-bosetü, le dürüwaalibei biámagubei lugudi, Herusalén laganawa, ladüga luagu lidabulan urúei leiga.