1 Ñeinñein aban wügüri wuribati lídangiñeti lani Benhamín türibu, gíriti Sebá, liráü Bikürí uburugu Gilügáli. Aba liñuraguagüdüniña Sebá ligía gürigia houngua lun hariñagun:

—Wagía, mafanrantiwa, malagante wagía luma Dawidi, le liráü Hesé! Heiba sun Ísüraelina hábiñoun!

2 Sun lánigu Ísüraeli aba hígiruni Dawidi lun hafalaruni Sebá, le liráü Bikürí. Ánhañati lánigu Hudá gúnfulitiña luma harúeite lúmagiñe luéigiñe Hordán chülǘ Herusalén.

3 Dan lagiribudunbei Dawidi tidoun lani palasiu Herusalén, aba lanügüniña diisi lubúalinigu ha buga lígirubaña óunigiroun palasiu, aba ládaruniña tidoun aban muna, aba líchugun hóuniri. Aba hasigirun lábugiñe lererehan, gama lumoun magamaridun laaña. Aba herederun aganawa keisi würiña ha hilaaña hámari darí hóunwegun.

4 Lárigiñe aba lariñagun urúei lun Amasá:

—Óundaraguabaña lánigu Hudá, ábame biabin hau ñahoun ǘrüwa weyu lárigiñe le.

5 Aba lidin Amasá óundaraña, gama lumoun gíbeti dan lanügün sügǘ lau le ariñawagúbei lun. 6 Ábati lariñagun Dawidi lun Awisái:

—Ladügüba Sebá saragu wuribani woun sügǘ lau Abüsalón. Ragübei lubeiti gumadi hau nisudaranigu, beiba lárigi, daridügüliñein uburugu le gabarieirunti, ábame lesefurun wawéi.

7 Aba háfuridun luwügüriñanigu Hoabü, hau Keretüna hama Peletüna hama habuidun-agei súdaragu luma Awisái Herusaléngiñe, lun héibaahani Sebá. 8 Dan lubaduhaña óunwenbu dübü le uburugubei Gabaón, aba láfuridun Amasá habaroun. Luáguñoun Hoabü ladaüragun to lánina wuribu, gürañu aban béliti liranaagua, aba eféin gágeitu lóubawagu to ménrengunti tasagarún. 9 Ábati lárügüdüni Hoabü Amasá luéigiñe láribugu lun lachuuruni, aba lariñagun lun:

—Buiti lidin dan bau níbiri?

10 Metenititi Amasá tun eféin to lúhaburuguboun Hoabü. Sódini aba límiruni Hoabü tau lurageirugun, aba láfuridun lisasa. Aba lounwen. Aba lasigirun Hoabü luma Awisái éibaahei Sebá le liráü Bikürí. 11 Ábati lararamun aban hádangiñe lisudaranigu Hoabü lóubagiñe lúgubu Amasá, aba lariñagun:

—Le lúmagiñebei Hoabü luma Dawidi, falalei Hoabü!

12 Gama lumoun anihánmeme bugati Amasá lamidan üma lárigi labalabahóun lidan lita; keiti larihin súdara ligía luagu sun lan gürigia ráramaguatiña aríaguei Amasá, aba ladireiruni lóubawagun üma, aba ladouragun lau. 13 Lárigiñe ladireiruni luéi üma, aba hásügürün sun ha úarabaña luma Hoabü éibaahei Sebá.

14 Aba lásügürün Sebá hádangiñe sun lani Ísüraeli türibu darí Aweli-betü-maaká, aba hóundaragun sun ladügawagun Bikürí, aba hebelurun lárigi uburugun. 15 Dan hachülürünbei lánigu Hoabü uburugun Aweli-betü-maaká, aba hadügün aban üma lun awariruni bóugudigiñe libiti baríeiru, aba hálugun háguruni ayarawaguni lauti dübü súngubei hagía. 16 Sódini aba tagúaragun aban würi luéigiñe lubarieirun uburugu, tariñaga:

—Aganba humana! Ariñaga humá lun Hoabü lun layarafadun nun ñahoun, luagu busén nan nadimurehan luma.

17 Dan layarafadunbei Hoabü tun würi tuguya, aba tariñagun lun:

—Hoabü san buguya?

Lariñaga tun:

—Hoabü au.

18 Ábati tariñagun lun:

—Yübü bugaha, hariñahare meha gürigia: "Le busenti lasubudirun somu katei, lálügüdaha uburugu Aweli". Ítara liñatiha laranserun katei. 19 Waburugute, ligía aban lídangiñe uburugu le gálumabei lidan sun Ísüraeli, aban lídangiñe uburugu le wéirigutimabei! Gama lumoun abunha áluaha bagünrinchaguni. Ka uagu babusenra bagünrinchaguni le lani Wabureme?

20 Lariñaga Hoabü tun:

—Maritaguabéi lira! Masaminaruntina nagünrinchaguni, ni lun nagumuchaguagüdüni. 21 Mama ligía náluahabei, gama lumoun anihein aban wügüri Éfürainna gíriti Sebá iñuraguti lungua luagun urúei Dawidi. Derege huméi nun lábugua, ábame nadisedun uburugugiñe.

Tariñaga würi tuguya lun Hoabü:

—Wígiragüdaali lábulugu bun luéigiñe baríeiru.

22 Lárigiñe aba tidin agañeiraña sun lílana uburugu lau tibibun, aba hadürürüni lichügü Sebá, aba hachüürüni lun Hoabü. Ábati líchugun Hoabü dimurei houn lánigu lun hadisedun uburugugiñe, aba houdin kada aban hábiñoun, aba lagiribudun Hoabü uburugun Herusalén lun ladimurehan luma urúei.

23 Aba lerederun Hoabü kei hábuti sun lisudaranigu Ísüraeli, Benaíasi, le liráü Hoyadá ligía hábuti Keretüna hama Peletüna. 24 Adorámü ligía arihubei hau wügüriña siádiwaaña lun wadagimanu fósuarügüti, Hosafátü le liráü Ailudu ligía lánibei urúei abürühati. 25 Sebá, ligía abürühabalin sun asusereduti, Sadoku luma Abiatárü hagía fádirigubaña. 26 Irá le lílana Hairü, lufadirin giñe Dawidi.