1,2 Dan hasubudirunbalin gürigia luagu layahuahañein lan urúei lounwen Abüsalón, aba houdin ariñagei lun Hoabü. Ábati lasansirun ugundani luagu agañeiruni weyu ligía lun lébuname íruni. 3 Ábati houchun súdaragu haramuduni hebelurun uburugun: Hebelura lau busiganu, kamá hamuga anuraharügütiña wuriburugugiñe. 4 Anihánti buga urúei, aba ladouragun lau ligibu, lagúaraha: «Abüsalón, niráü! Abüsalón, niráü, niráü!»

5 Ábati lidin Hoabü palasiurugu, aba lariñagun lun urúei:

—Uruei, ru humaaña hubúeingu lidoun busiganu, ha esefurubalin hibagari uguñe hau sun hirahüñü, húmarigu hama hubúalinigu. 6 Arufuda humaali uguñe, urúei, luagu meberesen humá hau ábutigu hama úfisigu; ladüga hínsiñetiña ha iyereehabúbaña hun hun, hiyereeguda ha hínsiñehabubaña hun. Ariha naali guentó luagu himei humani hamuga lun winwan lan Abüsalón wagía hamuga óunwegua. 7 Furila lubeiti guentó lun líchugun gurasu houn lánigu lau ladimurehan, lugundun anhein madügün lan ítara, fiñutina lun lidan liri Wabureme, luagu meredebei lan ni aban hádangiñe lánigu luma áriebu le. Wuribatimabeiti lira lun sügǘ lau sun wuribani le susereelibei lun lúmagiñe liñüraü darí lumoun dan le.

8 Ábati lásaarun urúei aba lidin añuura lubenari uburugu. Danti hasubudirunbalin gürigia luagu anihein lan urúei ñun lubenari uburugu, aba houdin súngubei arufudagua houngua ligibugiñe.

Sun bugati Ísüraelina ñǘdünha buga hábiñoun. 9 Hariñagati sun lani Ísüraeli türibu: «Sefu lumutiwa urúei Dawidi hawéi Filistéana ha wáganiñu; gama lumoun, anuraha fulasurugugiñe ladüga Abüsalón. 10 Abüsalón le buga wíchugubei warúeiteme, hilá wuriburugu. Kati wagurabubei lun wagiribudagüdüni urúei Dawidi?»

11 Aba lachülürün hererun Ísüraelina le, lúbiñoun urúei Dawidi. Ábati lóunahan ariñaga houn fádirigu Sadoku luma Abiatárü: «Hadimureha hama ábutigu Hudaana hálügüdañame ka lan uagu hadarasaha lun hagiribudagüdünina tidoun nani palasiu. 12 Ariñaga humá houn luagu mébuna lan lun hagíaba lan agumuhóuni agiribudagüdana, lugundun níbirigu hagía, lílana ábanmeme türibu wagía». 13 Ariñagati giñe lun lariñawagún lun Amasá: «Ábanmeme hitaü au buma, lúmagiñe lubeiti guentó, buguyaba hábuti nisudaranigu leweñegua Hoabü. Anhein magunfulirun nan nererun bun, béilana Wabureme here».

14 Ítara liña lagañeiruniña sun lánigu Hudá. Aba hóunahan ariñaga lun urúei lun lagiribudun hau sun lani úfisigu. 15 Ábati lagiribudun urúei, aba lachülürün luagun duna Hordán. Aba houdin Hudaana Gilügáli lun heresibiruni luma lun híderaguni ánhiñuraguei duna Hordán. 16 Afuresehati giñe Simí le liráü Gerá le lídangiñebei lani Benhamín türibu, le lílana Baurimü aragacha hama lánigu Hudá lun lidin eresibirei urúei Dawidi. 17 Ñǘdüntiña milu wügüriña lánigu Benhamín luma. Aba giñe liabin Sibá le habúein liduheñu Saulu, hau keinsi lirahüñü úara luma hama wein lidamun, aba lachülürün luagun Hordán lubaragiñe urúei. 18 Aba lánhiñuraguni fulasu le mahulilinbei libiti duna lun líderaguniña liduheñu urúei ánhiñuragua, lun lerederun buidu luma urúei. Dan laranserunbei urúei lun lánhiñuraguni Hordán, aba labuluchagun Simí ligibugiñe, 19 aba lariñagun lun:

—Ayumuraguatina hun urúei, lun habulieiduni le nadügübei au le hubúein hun weyu meha le háfuridunbei Herusaléngiñe. Magüüra humá wuribani nubá, 20 lugundun au guánarügü, subudi numuti nidurun, ani hádangiñe sun lánigu Hosé, au furumiñebei áfurida eresibirei urúei uguñe.

21 Ábati lariñagun Awisái le liráü Seruiá:

—Ma lunti lounwen Simí luéigiñe líñaraguni urúei le lanúadirubei Wabureme?

22 Lariñaga Dawidi:

—Lirahüñü Seruiá, mama hani bísinisi le! Subudi naali buidu guentó luagu au lan lurúeitebei Ísüraeli, úabei lubeiti ni aban afarúti Ísüraeli uguñe.

23 Aba láfiñurun lun Simí luagu mafarúnbei lan.

24 Ñǘdünti giñe Mefi-bosetü le liráü Saulu eresibirei. Lúmagiñe weyu le láfuridunbei urúei darí lumoun weyu lagiribudun, machibun lumuti Mefi-bosetü lugudi, másaragun ligía, machibunloun ladaüragun. 25 Danti le liábinbei eresibirei urúei uburugu Herusalén, aba lariñagun urúei lun:

—Mefi-bosetü, ka uagu midin bubéi numa?

26 Lariñaga lun:

—Ladüga leyeedunina nubúein, urúei. Kei danima nubéi, aba nariñagun lun lun laranserun aban burigü nun lun nawariruni lun nidin luma urúei. 27 Ani adimurehaali wuriba nuagu ligibugiñe urúei. Gama lumoun ítara liña urúei kei aban lani Wabureme ánheli, ladügübei le buítimabei lidan laritagun. 28 Ani lau sun lunti lan yebe buga láfaraguniña urúei sun niduheñu luéigiñe núguchi, amisuraha lumutina urúei lun neigin luagu lidabulan. Kábagia amu katei namuriaha luma urúei?

29 Lariñaga urúei lun:

—Hebé wadimurehan. Ariñagaadina lun hafanreinhani múa hídangua buguya luma Sibá.

30 Lariñaga Mefi-bosetü lun:

—Rédeila lau súngubei. Le aubei wagundaara luagu hagiribudun lau magadiñein tidoun hani palasiu.

31 Bárüsilai, le Galaadüna ragati Rogelímügiñe lun lidin íchaahei urúei dan le lánhiñuraguni duna Hordán. 32 Wéiyaali Bárüsilai ligía saragu, gádürü-wein irumu lau, sun dan le laubei urúei uburugu Manaímü, ru lumuti sun le lemegeirubei urúei lun, lugundun rísiti buga saragu. 33 Ábati lariñagun urúei lun Bárüsilai:

—Keimoun numa Herusaléun, ábame nanügünibu labun naríaahan ñein.

34 Lariñaga Bárüsilai lun:

—Málaali nidin buma Herusaléun, lugundun málühadina hilá; 35 gádürü-wein irumu nau guentó; masandi naali lisemén le néigibei luma le nátubei, siñaali nariñagun anhein semé lubéi lumoun mesemén lan; siñaali giñe naganbuni hamalali eremuhatiña. Kábati uagu nidin ábanme ihürügu lun urúei? 36 Anhein néibugarüga lubéi luma urúei lúnrügü lánhiñuraguni Hordán, kagia uagu habusenra híchuguni afayeiruahaü le nun? 37 Amuriaharügütina luma urúei lun lígirunina lun nagiribudun nageiroun lun nounwen ñein, ábame nabunún lidan hamúaha nagübürigu. Gama lumoun anihán Kimamü le niráü. Leiba luma urúei, ábame ladügüni le uágubei baritagua lun.

38 Lariñaga urúei:

—Ñǘbuinla Kimamü numa, nadügübei le babusenrun nadügün lun. Sun le bamuriahan numa, níchugubei bun.

39 Aba hánhiñuraguni sun lánigu urúei duna Hordán. Dan lánhiñuragunbei urúei aba layouragun lun Bárüsilai lau aban chuti. Ábati lagiribudun Bárüsilai lidoun fulasu le ñein lubéi laganawa. 40 Aba lidin urúei Gilügáli lau Kimamü hama sun lánigu Hudá hama hamidan lánigu Ísüraeli úara luma. 41 Ábati houdin sun Ísüraelina arihei urúei, aba hariñagun lun:

—Ka san uagu wábiriguba lubéi ha Hudaana eredera kei laburiña urúei, ani hagía giñe óunigirei urúei hau sun liduheñu hama sun lisudaranigu lidan lánhiñurawagun Hordán?

42 Hariñaga sun Hudaana houn Ísüraelina:

—Ladüga yarafagua lan waduhegua luma urúei. Gama lumoun mama lunti hagañidun. Urúei funagia éigagüdübaliwa, odi barühadiwa somu katei woungua?

43 Hariñaga lánigu Ísüraeli houn:

—Garichatiwa luagu urúei diisi wéiyaasu sügǘ hau. Bóugudin luéi lira, kei türibu, íbugañaü wagía hun. Kati uagu hanügawa kei ni kata? Ma funagia wagía furumiñebei ariñaga lun lagiribudun warúeite?

Gama lumoun héretimati hasigenehan lánigu Hudá sügǘ hau lánigu Ísüraeli.