1 Lidan buga lidaani larúeihan Dawidi, ñeinñein aban ilamaü aduraruti ǘrüwa irumu. Ábati lálügüdahan Dawidi luma Wabureme libügürü. Aba lariñagun Wabureme lun:

—Ilamaü le, luéigiñe áfarahani le buga ladügübei Saulu hau sun liduheñu, lugundun háfaraguniña Gabaónna.

2 Aba lagúarun Dawidi houn Gabaónna, aba ladimurehan hama. (Gabaónna, mama Ísüraelina, fiu meha hádangiñe Amoruna ha erederubaña, aba meha hadügün Ísüraelina aban fiñún houn, gama lumoun le méhati lemeidin Saulu hau lílana Ísüraeli luma Hudá, aba meha lálugun lagumuchun hau Gabaónna.) 3 Lariñaga Dawidi houn:

—Ka gayaraabei nadügün luagu hufulesein? Ida luba gayara lan nagaranihan lun wuribani le adügǘbei hun, lun habiniruniña lánigu Wabureme?

4 Hariñaga Gabaónna lun:

—Mama katei luáguti seinsu le wánibei luma Saulu luma hama liduheñu, mabusenrúntiwa giñe lun lafarún ni aban Ísüraelina.

Lariñaga Dawidi houn:

—Ariñaga humeiti nun ka lan habusenrubei nadügün luagu hufulesein.

5 Hariñaga lun:

—Busentiwa lun hederegerun sedü hádangiñe ladügawagun wügüri le abusenrubei yebe lagumuchun wau, 6 ábame wadibiragüdüniña ligibugiñe Wabureme uburugu Gibeá le lani Saulu le lanúadirubei Wabureme.

Aba lánharun urúei lederegeruniña sedü wügüriña hagía houn, 7 gama lumoun mederegerun lumuti urúei Dawidi Mefi-bosetü le liráü Yónatan luagu meha fiñún le hadügübei hámagua ligía luma Yónatan. 8 Aba lárügüdüniña bián tirahüñü Risüpá to liráü Ayá ha tagaraüdübaña lau Saulu ha gíribaña Arümoní luma Mefi-bosetü, hama seingü tirahüñü Merabü to liráü Saulu ha tagaraüdübaña lau Adüriéli le liráü Bárüsilai le Meolana, 9 aba lederegeruniña houn Gabaónna, aba hátigiruniña luagu wübü ligibugiñe Wabureme. Lidan furumiñeti luéyuri talubahóun sebada lasusereda katei le.

10 Ábati tadaüragun Risüpá to liráü Ayá daüguaü to lánina aluduhani, aba tarounrun luagu aban dübü. Aba terederun ñein lúmagiñe lagumeserun lalubahóun sebada darí lachülürün lidaani huya, mígiruntu lun hayarafadun dunuru houn hilaaña wéyuagu, ni animaalu áraabuna áriebu.

11 Dan laganbunbalin Dawidi katei le tadügübei Risüpá to meha lubúali Saulu, 12 aba lidin, aba lanügüni labu Saulu luma Yónatan hamúanrugugiñe lílana Habesi le lani Galaadü. Híweruhan meha Habesina Betü-sángiñe, le meha ñein lubéi hadibiragüdaña Filistéana le weyu le leferidirunbalin Saulu wuribu uburugu Gilübóa. 13 Aba líchugun Dawidi dimurei lun lanügǘn labu Saulu luma Yónatan; aba giñe hóundaruni habu ha átigirubaña; 14 aba labunún labu Saulu luma Yónatan lidan lumuaha Kisü le lúguchi Saulu, uburugu Selá, lumúanrugu Benhamín. Adügǘwati sun katei kei lariñaguni urúei. Lárigiñe le, aba fuleseihabu lan Wabungiute houn lílana fulasu.

15 Ábaya hawuribuhan Filistéana hama Ísüraelina. Ábati láfuridun Dawidi hau lani úfisigu ageindagua hama. Aba labuchadun luagu Dawidi saragu, 16 aba lálugun aban hígandei gíriti Isübí-benobu láfaruni hilagubei. Sügǘ lau darandi kilu lihürü larufunte, ñeinñoun aban eféin iseri lóubawagu. 17 Gama lumoun aba liabin Awisái le liráü Seruiá íderaguei Dawidi, aba lábürühan luagun Filistéana ligía, aba láfaruni hilagubei. Ábati füramasegüda hamani lánigu Dawidi luagu máfuridundigiaali lan ageindagua luéi lafarún lurúeite Ísüraeli.

18 Lárigiñe ñéinñeinya ábanya wuribu hama Filistéana, uburugu Gobu. Lidan dan ligía, aba láfaruni Siwekái le Usatíta Safü hilagubei, Safü ligía, aban meha hádangiñe hadügawagun hígandei. 19 Lidan ábanya wuribu hama Filistéana ñeinmeme Gobu, aba láfaruni Elanán le liráü Hairü le Belenna Goliadi le Gátüna hilagubei, hanarimeti meha lueirin lebu larufunte Goliadi.

20 Ñéinñeinya aban wuribu uburugu Gatü. Ñeinñein aban wügüri ñein, gágubuti, dúusuñein lifinga lúhabu, duusu lifinga lugudi. Hadügawagun giñe hígandei, 21 gama lumoun aba láfaruni Yónatan le liráü Simá le líbugaña Dawidi. 22 Gádürü buga hígandei ha, ladügawagun buga Refa le Gátüna, gama lumoun áfaragua lumutiña Dawidi hama lani úfisigu.