1 Ábaya lagañidun Wabureme hama Ísüraelina, aba ladügün lun lafigouhaba lan Dawidi, lariñaga Wabureme lun Dawidi:

—Abahüdabaña sun lánigu Ísüraeli hama lánigu Hudá.

2 Ábati lariñagun urúei lun Hoabü:

—Éibugaba hadan sun lani Ísüraeli türibu, lúmagiñe Dan darí Bérüsewa, ábame babahüdüniña, subudi náamugei átiriñanu lan gürigia fulasurugu.

3 Lariñaga Hoabü lun urúei:

—Rula Wabureme le Lubungiute urúei san wéiyaasu hanwoun lánigu, ani gabagarilá urúei lun larihini; gama lumoun, kámegia labusenra urúei labahüdüniña?

4 Gama lumoun héreti lererun urúei lun Hoabü luma houn hábutigu súdara, aba lubeiti lidin Hoabü hama hábutigu súdara lun habahüdüniña gürigia kei lariñaguni urúei houn. 5 Aba hánhiñuraguni duna Hordán, aba hagumeserun Aroerügiñe, luma lídangiñe uburugu le lamidanguabei fulasu wayati, luagun Gadü luma Haserü. 6 Lárigiñe aba houdin Galaadü luma Kadesi, hageira Étüna. Lárigiñe aba hachülürün Dan, Dángiñe aba hagararaagun Sidongiñe. 7 Lárigiñe aba houdin Tiru luma lidan sun haburugute Eweuna hama Kananna, darí háfuridun luagun suru libiti Hudá, luagun Bérüsewa. 8 Lárigiñe nefu hati luma wein weyu, lárigiñe héibuguni sun fulasu, ligía hachülürün Herusaléun. 9 Aba lederegeruni Hoabü átiriñanu lan gürigia fulasurugu lun urúei: Widü-san-míluñanu wügüriña lidan Ísüraeli ha gayaraahali houdin wuriburugu, hama seingü-san-milu hadan Hudaana.

10 Gama lumoun aba lasandiragun Dawidi lungua lau duru luagu labahüdüniña gürigia, aba lagufeserun lun Wabureme, lariñaga:

—Adügaadina aban óunwenbu figóu lau nadügüni katei le. Gama lumoun ayumuraguatina bun, Nabureme, lun ferudunabani nifigoun, lugundun mabuidunti le nadügübei.

11 Larugan binaafin, dan le lásaarunbei Dawidi, aba lariñagun Wabureme lun profeta Gadü:

12 —Beiba arihei Dawidi, bariñagame lun luagu anihán lan ǘrüwa katei níchugun ligibugiñe, lun lanúadahan ka lan lídangiñe labusenrubei lun nadügüni.

13 Aba lidin Gadü arihei Dawidi, aba lariñagun lun:

—Ka babusenrubei: Sedü irumu ilamaü fulasurugu, berederun ǘrüwa hati anuraha hawéi báganiñu, o ǘrüwa weyu lau sandi fulasurugu? Saminabéi, bariñageime nun kaba lan nóunabagüle lun le óunahabalina.

14 Lariñaga Dawidi lun Gadü:

—Anahán lidan aban katei hénrenguti. Gama lumoun buítimati lun wábürühan lúhaburugun Wabureme, lugundun wéiriti lareini, mama lun wábürühan háhaburugun wügüriña.

15 Ábati lóunahan Wabureme aban igei luagun Ísüraeli, lúmagiñe binaafin ligía, darí lagunfulirun ǘrüwa weyu, aba hóunwegun ǘrüwa-wein-diisi-milu gürigia lúmagiñe uburugugiñe Dan, darí Bérüsewa. 16 Dan yebe lagünrinchaguaali lubéi ánheli Herusalén, aba lahürüdün lun Wabureme, aba lariñagun lun ánheli le adügübei damichi lun fulasu:

—Hebé, rédeibei!

Lidan oura ligía, lubaduñein fulasu le ñein lubéi léfereha Arauna le Hebusuna türigu lani Wabureme ánheli. 17 Dan larihinbalin Dawidi ánheli le adügübei damichi lun fulasu, aba lariñagun lun Wabureme:

—Au afigouhabei! Au gadurunbei! Kagia wuribati hadügübei maduruntiña ha? Amuriahatina buma lun nuagun lan luma hawagun niduheñu lábürüha babeihan!

18 Weyuméme ligía, aba lidin Gadü arihei Dawidi, aba lariñagun lun, lun ladügün aban latarü Lun Wabureme lidan fulasu le ñein lubéi léfereha Arauna le Hebusuna türigu. 19 Ábati lidin Dawidi adügei le lariñagubei Gadü lun lúmagiñe Wabureme. 20 Ñeinñein Arauna aríagua dísegiñe, ligía larihin liabin urúei hau lánigu luagun. Ábati lidin Arauna habaroun, aba labuluchagun ligibugiñe urúei, 21 aba lariñagun lun:

—Kagia lébubei liabin urúei bisidana?

Lariñaga Dawidi lun:

—Busentina nagañeihani fulasu le ñein lubéi béfereha türigu, lun nadügün aban latarü lun Wabureme ñein, gumú láamuga sandi fulasurugugiñe.

22 Lariñaga Arauna lun:

—Barǘ huméi le habusenrun lun hadagaragüdün urúei. Añahein bágasu wügüriña ya lun adagaragüdüni gudawarügüti, gayaraabei leseriwidun éfereegülei luma yugu lun wátume. 23 Ru numuti sun le hun urúei!

Aba giñe lariñagun Arauna:

—Agurabatina hagundaaraguagüdüni Wabureme le Hubungiute!

24 Lariñaga urúei lun:

—Seremei numutibu, gama lumoun gasu nagañeihani búmagiñe luagu lebegi, lugundun madagaragüdünbadina adagaragüdüni gudawarügüti le mafayeihantina luagu lun Wabureme.

Ítara liña lagañeihani Dawidi fulasu ligía hau bágasu wügüriña luagu dimí-san murusun pülata, 25 aba ladügün aban latarü lun Wabureme ñein, aba ladagaragüdün adagaragüdüni gudawarügüti luma adagaragüdüni lánina arandaruni. Ábati laganbuni Wabureme layumuragun luagu fulasu, aba lagumuchagun sandi uburugugiñe Ísüraeli.