1 Wéiyaalimetiha urúei Dawidi saragu, lau sun meha darúagua tan sidi lau buidu, diliigamémeti lun. 2 Aba lubeiti hariñagun lubúeingu lun:

—Lunti talugúniwa aban nibureintu to mámarigiru lun urúei lun teseriwidun lun luma lun tóunigiruni, arumuga tuguyame luma urúei, lun tabacharaguagüdüni.

3 Ábati hálugun aban nibureintu magadiñetu lidan sun lumúan Ísüraeli, aba hadarirun aban gíritu Abiságü to Sunemüna, aba hanügünu lun urúei. 4 Magadiñetu meha Abiságü, aba tóunigiruni urúei, seriwitéi, gama lumoun magamaridun lumutu urúei ni aban wéiyaasu.

5 Ábati liñuragun Adoníasi le liráü Dawidi tau Agitü lungua, aba lariñagun luagu ligíaba lan urúei. Aba lóundaragun karü to lánina wuribu, hama gabayu, hama dimí-san wügüriña lúnirigume. 6 Lidan sun libagari mererehanti meha lúguchi lun ni aban wéiyaasu: Málügüdünlei ka uagu badügei le badügübei? Adoníasi, le lárigili Abüsalón, wéiriti meha lumagadiñen. 7 Adügaali bugati aban daradu luma Hoabü, le liráü Seruiá, luma fádiri Abiatárü, aba húaradun biama ha luma. 8 Ánheinti fádiri Sadoku, ni Benaíasi, le liráü Hoyadá, ni profeta Natán, ni Simí, wügüriña lemenigin urúei, ni habuidun-agei lisudaranigu Dawidi, mídintiña lúmagiñe Adoníasi.

9 Lidan dan ligía, aba ladügagüdün Adoníasi aban adineruni lubadu dübü le Soeletü, le lubadubei lísensen duna le gíribei Rogeli. Aba láfarun mudún, hama bágasu wügüriña ha ñǘbürigiña ha dibunetimatiña, aba lamisurahaniña sun líbirigu ha lirahüñü urúei, hama sun wügüriña ha Hudaana ha lubúeingu urúei; 10 gama lumoun mamisurahan lumuti profeta Natán, ni Benaíasi, ni lisudaranigu Dawidi, ni Salomón le líbugaña. 11 Ábati ladimurehan Natán tuma Betüsawé to lúguchu Salomón, lariñaga tun:

—Mefentibu san luagu rúguaali lan Adoníasi le tiráü Agitü, lungua urúeime ibidiñounga lun urúei Dawidi? 12 Higabu lubeiti, níchiga aban saminaü bun, gayara láamuga besefuruni bibagari, luma libagari Salomón le biráü. 13 Beiba lumoun urúei Dawidi, bariñagame lun: "Fiñutün meha nun, urúei, luagu Salomónba lan le niráü arúeiha heweñegua, luagu lañuuruba lan luagun haláü lánina arúeihani kati uagu, anihán lubéi Adoníasi arúeiha?" 14 Danme le abunha lan adimureha luma urúei, ábame nebelurun, ábame nariñagun inarüni lan le bariñagubei.

15 Ábati tidin Betüsawé arihei urúei lirumunrugu. Wéiyayaaliti urúei, Abiságü to Sunemüna óunigirubalin. 16 Aba tabuluchagun Betüsawé ligibugiñe urúei, dagá terebe múarugu, aba lálügüdünu urúei:

—Ka suserebei bun?

17 Aba tóunabuni:

—Fiñutün meha nun, urúei, luagu liri Hubungiute luagu larúeihaba lan Salomón le niráü heweñegua, ani lañuuruba lan luagu haláü le lánina arúeihani. 18 Gama lumoun rugua Adoníasi lungua urúeime ani mefentün luagu. 19 Áfaraali bágasu wügüriña, hama bágasu ñǘbürigiña hama saragu mudún, agunbirahalaaña lirahüñü urúei; agunbiraha lumuti giñe fádiri Abiatárü luma Hoabü le hábuti súdaragu, gama lumoun magunbirahan lumuti Salomón le hubúein, urúei. 20 Guenleti lagurabahaña sun Ísüraeli lariñagun urúei kaba lan arúeiha leweñegua. 21 Anhein mítaran, danme lounwen urúei, wasiadirúba lun wáfarawagun hilagubei nuguya luma niráü Salomón.

22 Dan anuhán lan adimureha luma urúei, aba lachülürün profeta Natán, 23 aba hasubudiragüdüni lun urúei. Dan liábinbei profeta Natán ligibugiñoun urúei, aba labuluchagun ligibugiñe dagá lerebe múarugu, 24 Ñéingiñe aba lálügüdüni:

—Uruei san íchugubei lúrudu lun larúeihan Adoníasi leweñegua? 25 Lugundun Adoníasi uguñe, áfaragüdaali bágasu wügüriña hama bágasu ñǘbürigiña hama saragu mudún agunbirahalaña lirahüñü urúei, hábutigu súdara luma fádiri Abiatárü. Añaheinti ñein eiga, ata luma, ani añaha agúaraha: "Gabagarilá urúei Adoníasi!" 26 Gama lumoun mamisurahan hamutina, ni fádiri Sadoku, ni Benaíasi le liráü Hoyadá, ni Salomón le hiráü. 27 Odi írida humaali, mariñagunga huméi lun hubúein, kaba lan arúeiha heweñegua?

28 Ábati lariñagun urúei Dawidi lun hagúarun tun Betüsawé. Dan tachülürün Betüsawé ligibugiñoun urúei, aba terederun rara ligibugiñe. 29 Ábati ladügüni urúei, áfiñuruni le:

—Fiñutina luagu Aburemei le esefurubalina lídangiñe sun íruni, 30 luagu le lan náfiñurubei bun luagu Aburemei, le Lubungiute Ísüraeli, nagunfuliraali lan bun uguñe: Salomón le biráü, lawarira luagun haláü le lánina arúeihani, ligíaba arúeiha nárigiñe.

31 Aba tabuluchagun Betüsawé ligibugiñe urúei darí ladagarun terebe múarugu, aba tariñagun:

—Gabagarilá nabureme, urúei Dawidi, lun sun dan! 32 Aba lariñagun urúei Dawidi, lun laguarún lun fádiri Sadoku, profeta Natán luma lun Benaíasi le liráü Hoyadá. Dan hayabinbei lun urúei, 33 aba lariñagun houn:

—Heiba úara hama ha nadagimeinbaña lidan arúeihani, warigüda huméi niráü Salomón tuagu nilügün mile, barǘ huméi uburugun Gión; 34 lárigiñeme, láhurudaguni fádiri Sadoku luma profeta Natán lau garaba lun hanúadiruni keisi lurúeite Ísüraeli, ábame hínwinruni liganchun mudún, ábame hagúaragun: "Gabagarilá urúei Salomón!" 35 Lárigiñeme, ábame hiabin lárigi lárigi lun liabin lun lañuurun luagu nala le lálana arúeihani lun larúeihan neweñegua, lugundun suesi naali lun ligíaba lan lábuti Ísüraeli luma Hudá.

36 Aba lóunabuni Benaíasi le liráü Hoyadá urúei:

—Ítarala, ani ítarala lariñaguni Aburemei le Lubungiute nurúeite. 37 Ani ítara kei buga húmañein lan Bungiu, lun giñe luma lan Salomón, ani wéirigüdaleime larúeihan Salomón sügǘ lau harúeihan, nabureme Dawidi.

38 Aba lidin fádiri Sadoku, profeta Natán, Benaíasi, le liráü Hoyadá hama Keretüna hama Peletüna, aba hawariragüdüni Salomón tuagun lilügün urúei Dawidi mile, aba hanügüni uburugun Gión. 39 Ñein aba lanügüni fádiri Sadoku liganchun animaalu le lagei garaba tídangiñe sanduariu aba láhurudaguni Salomón keisi urúei. Lárigiñe aba hínwinruni liganchun mudún, aba hagúaragun súngubei:

—Gabagarilá urúei Salomón!

40 Aba houdin súngubei lárigi lárigi íñaaheina fidu. Wéiriti hagundan, darí lun kamá lan hamuga lafanreinragúa múa lidan bián murusun ladüga lanarime lere hamalali.

41 Sun liñati leigin Adoníasi hama sun ha lamisurahabaña, ligía haganbuni areinchuni ligía. Dan le laganbunbalin Hoabü lumalali liganchun mudún, aba lariñagun:

—Ka funa san uagu aniha lubéi saragu chagaguaü uburugu?

42 Sun aniha lan adimureha, ligía lachülürün Yónatan le liráü fádiri Abiatárü. Lariñaga Adoníasi lun:

—Beluba, ladüga wügüri wéiriguti buguya, mosu uganu lan buiti banügübei.

43 Lariñaga Yónatan lun Adoníasi:

—Mama liña. Rula warúeite Dawidi Salomón urúeime, 44 ani aba lariñagun lun houdin fádiri Sadoku, profeta Natán, Benaíasi, Keretüna hama Peletüna úara luma Salomón; aba hawariragüdüni tuagu lilügün urúei mile. 45 Hurugua laali giñe fádiri Sadoku luma profeta Natán keisi urúei uburugu Gión, aba hagiribudun lau saragu ugundani. Ligía chagaguaü le harihubei luma areinchuni le haganbubei uburugugiñe. 46 Ñuruhali giñe Salomón arúeiha, 47 ani ñǘdünhaña awadigimaridutiña lun urúei Dawidi arufudei hagundan lun Dawidi luagu líchuguni Salomón lun larúeihan leweñegua, aba hayumahan lun laweiridagüdüni Aburemei larúeihan Salomón sügǘ lau larúeihan Dawidi. Dawidi guánarügü, buluguati ligabananrugu lun líchugun inebesei lun Bungiu, 48 aba lariñagun: "Biniwalá Aburemei le Lubungiute Ísüraeli, luagu ladügün lun lañuurun aban nadügawagun arúeiha uguñe, ani arihagüdaléi nun".

49 Aba hadadagarun ha lamisurahabaña Adoníasi; lárigiñe aba hásaarun súngubei aba háluaagun houngua. 50 Ánheinti Adoníasi, le lanufude luéi Salomón, aba lidin Sanduariurugun, aba laramudagun ñein ragüñu luagu liganchun latarü. 51 Aba lidin aban ariñaga lun Salomón:

—Anihein Adoníasi aramudagu latarürugu le lanufude huéi: Amuriahati lun nege háfiñurun lun guentó luagu máfarun hubéi lan hilagubei.

52 Lariñaga Salomón lun:

—Anhein ladüga le hadügübei wügüriña ha gadügadibaña buiti méiguadunbei ni aban lugule lídiburi múarugun; gama lumoun anhein adarirúa wuribati lidan, lafarúba.

53 Lárigiñe aba lóunahan Salomón agidarei luéigiñe latarü. Aba lidin Adoníasi, aba labuluchagun ligibugiñe urúei, aba lariñagun urúei Salomón lun lun lidin lúbiñoun.