1 Sügüti ǘrüwa irumu úouga wuribu hadan Síriana hama Ísüraelina. 2 Gama lumoun luagu lǘrüwan irumu, aba lidin Hosafátü le lurúeite Hudá ebeluha lumoun lurúeite Ísüraeli. 3 Lariñaga lurúeite Ísüraeli houn lánigu:

—Subudi humuti luagu yu lan Ramotu le lani Galaadü woun. Ariha wamá lubeiti kaba lan wadüga lun wasagaruni lábugiñegiñe lugumadin lurúeite Siria.

4 Aba lariñagun lun Hosafátü:

—Bídiba san numa ageindagua hama lílana Ramotu le lani Galaadü?

Lariñaga Hosafátü lun:

—Au, kéigubeirügü nisudaranigu, búmañadiwa luma hama bumutiña. 5 Gama lumoun álügüdahaba furumiñe kaba lan lariñaga Bungiu.

6 Aba lóundaruniña lurúeite Ísüraeli profetagu, yarafa lun gádürü-san, lariñaga houn:

—Neiba san ageindagua hama lílana Ramotu le lani Galaadü?

Hariñaga lun:

—Anha, lederegerubaña Aburemei bun.

7 Lariñaga Hosafátü lun:

—Úati san ámuya lani Aburemei profeta ya le giñe gayaraati wálügüdüni?

8 Lariñaga lurúeite Ísüraeli lun Hosafátü:

—Aniheingua aban le ídangiñebei gayara lan wálügüdüni Bungiu. Mikaíasi, le liráü Imülá. Gama lumoun iyereeguti nun ladüga súnwandan lan líchugun ñunsu wuribati nun.

Lariñaga Hosafátü lun:

—Madimurehabá ítara.

9 Aba lagúarun lurúeite Ísüraeli lun aban úfisi, lariñaga lun:

—Beiba anügei Mikaíasi nun, óufuda.

10 Dandu lurúeite Ísüraeli kei Hosafátü le lurúeite Hudá, hawaguñoun hageindaguagüle, ñun hañati luagu hala lubenari Samaria, añahati sun profetagu adimureha hagibugiñe. 11 Adügati Sedekíasi le liráü Kenaaná ganchu lauti gürabu, aba lagúarahan ariñaga:

—Ítara liña lariñagun Bungiu: Lauba ganchu le báfaraguaña Síriana darí bagumuchun hau!

12 Ligiaméme giñe hariñaga sun profetagu. Hariñaga lun urúei:

—Ábürühaba luagun Ramotu le lani Galaadü, bagañeirubei wuribu, lederegerubei Aburemei uburugu ligía bun.

13 Le bugati ounahóubei anügei Mikaíasi, aba lariñagun lun:

—Sun profetagu óunabaaña luagu lufulesein urúei. Ayumuraguatina lubeiti bun, lun ítara lan badimurehan kei sun hagía, lun luagu lan lufulesein urúei badimureha.

14 Lariñaga Mikaíasi lun:

—Fiñutina luagu Aburemei luagu le lan lariñagun Aburemei nun, ligíaba lan nariñaga.

15 Ábati liabin lumoun urúei, aba lariñagun urúei lun:

—Mikaíasi, ábürüha wamá san hawagun lílana Ramotu le Galaadüna, odi moun lumuti?

Lariñaga Mikaíasi lun:

—Beiba, bagañeirubei wuribu, lederegerubei Aburemei uburugu ligía bun.

16 Lariñaga urúei lun:

—Átiribei san wéiyaasu nariñagun bun lun inarünirügü lan bariñaga nun ligibugiñe Aburemei lau fiñún?

17 Ábati lariñagun Mikaíasi:

«Ariha naaña sun Ísüraelina

chagagu luagu burí wübü,

kei mudún móuniritiña.

"Ani ariñagaali Bungiu:

Maburemetiña ha;

giribu hamá kada aban hábiñoun lau darangilaü" ».

18 Lariñaga lurúeite Ísüraeli lun Hosafátü:

—Ma nan bun luagu káteirügüñein lan wuribati lariñaga wügüri le nun?

19 Lariñaga Mikaíasi:

—Ladüga katei le bariñagubei, aganbabéi lererun Bungiu: Aba narihini Aburemei ñun luagu lálana larúeihan, añaha sun súdaragu ha siélubaña rara lurugabu, luéigiñe lóunwenren luma luéigiñe lubaünan. 20 Ábati lálügüdahan Aburemei kaba lan ñüdün ínchahei Aabü lun lábürühan luagun Ramotu le lani Galaadü lun lounwen ñein, híbiriti ariñaga aban katei, híbiri ariñaga amu. 21 Aba liabin aban sífiri ligibugiñoun Bungiu, aba lariñagun lun luagu ladügübei lan. Aba lálügüdüni Aburemei ida luba lan ladügüni, 22 aba lariñagun sífiri ligía luagu ládaruba lan iyeeni hadoun sun lani urúei profetagu. Ábati lariñagun Aburemei luagu lasusereduba lan ítara kei lariñaguni, lun lan lidin adügei. 23 Subudi báaliti guentó luagu rúhali lan Aburemei sífiri yeeti hayumulugun sun bani profetagu ha, ani aranseli lan Aburemei günringuaü bubá.

24 Ábati lagayuahan Sedekíasi le liráü Kenaaná luagu Mikaíasi, lariñaga lun:

—Halíagiñe láfurida lani Aburemei sífiri nuéi lun ladimurehan bun?

25 Lariñaga Mikaíasi lun:

—Basubudirubei lídanme weyu le berederun aramudagua tídangiñe aban muna lun tidoun amu.

26 Ábati lariñagun lurúeite Ísüraeli:

—Ragǘ huméi Mikaíasi, barǘ huméi adaüra lumoun Amón le agumadirubalin uburugu, luma lumoun Hoasi, le niráü! 27 Hariñagame houn luagu nariñahare lan lun hádaruni furisunrugun, híchigame murusunrügü fein luma murusunrügü duna lun darí nagiribudun séfuñu lau magadiñein.

28 Lariñaga Mikaíasi:

—Ánhabu agiribuda lau magadiñein ani séfuñu, madimurehanti Aburemei nídangiñe.

29 Ábati lidin lurúeite Ísüraeli luma Hosafátü le lurúeite Hudá lun hageindagun hama lílana Ramotu le lani Galaadü. 30 Aba lariñagun lurúeite Ísüraeli lun Hosafátü:

—Nadaüra amu daüguaü lun nebelurun wuriburugun, buguyame tau badaüragun to ladaüragun urúei.

Ábati ladaürün lurúeite Ísüraeli amu daüguaü, aba lebelurun wuriburugun. 31 Gama lumoun ariñagaali bugati lurúeite Siria houn lani darandi-biama abugahatiña karü to lánina wuribu, lun máfarun hamá ni aban luéidigia lurúeite Ísüraeli. 32 Danti harihinbalin abugahatiña karü Hosafátü, aba haritagun luagu ligía lan lurúeitebei Ísüraeli, aba hegeyedagun lau lun hábürühan luagun. Ábati lagúaragun Hosafátü amuriaha líderawagun, 33 danti harihinbei luagu mama lan lurúeite Ísüraeli, aba lerederun héibaahani. 34 Gama lumoun aba lachüürünu aban súdara ligimaran meseneihanga ni ka uagun, aba tadagarun luagun lurúeite Ísüraeli, aba tebelurun luagun lídangiñe táfadaragun ladaüragun to lageindaguagüle. Ábati lariñagun lun le abugahabarun likarün:

—Gararaguabá, sagabana wuriburugugiñe, ladüga mirawaguaadina.

35 Dereti wuribu weyu ligía, aba lerederun urúei rara tidan likarün hagibugiñe Síriana. Gama lumoun rábounweyu, aba lounwen: Aba láwiyuhan lita tídangiñe karü. 36 Luagu lálüdün weyu, aba léibaagun dimurei hadan súdaragu:

—Kada mutu hageiroun, 37 ladüga hilá urúei!

Ábati lanügǘn urúei Samarioun, aba labunún ñein. 38 Lárigiñe aba hachibunu karü lidan fusu Samaria le ñein lubéi hágawa horu, aba héheluhani ounli lita Aabü, kei buga lariñaguni Bungiu.

39 Le líbiri asusereduti luáguti Aabü luma sun katei le buga ladügübei, palasiu lautu marüfíli luma burí uburugu le lábunagubei, anihein bürüwañu tidan liliburuna asusereduti hawaguti lurúeitegu Ísüraeli. 40 Lárigiñe lounwen Aabü, aba larúeihan Okosíasi, le liráü leweñegua.

41 Lidan ligadürün lirumudiri larúeihan Aabü Ísüraeli, ligía lagumeserun Hosafátü, le liráü Asá arúeiha Hudá. 42 Darandi-seingü irumu lau dan ligía, arúeihati wein-seingü irumu Herusalén. Asubá tíribei lúguchu, liráü Silí.

43 Buiti lóuserun Hosafátü lidan sun katei kei buga Asá le lúguchi. Úaraguati ligibugiñe Bungiu. Lau sun lira magidarúntu ténpulu to burí ñein lubéi hadagaragüda lílana fulasu águdaha hagía kupali houn guáriuagu.

44 Adügati Hosafátü aban daradu lánina darangilaü luma lurúeite Ísüraeli. 45 Le líbiri asusereduti luáguti Hosafátü, luma burí katei le ladügübei, wuribu burí le gádanbalin, anihein bürüwañu tidan liliburuna asusereduti hawaguti lurúeitegu Hudá. 46 Hosafátü asagarubaliña ha adaagubalin ahoruhani kei aban kultu ha erederubaña fulasurugu lúmagiñe lidan lidaani lúguchi. 47 (Lidan buga dan ligía, úatiha urúei lidan ageiraü le Edomu, luéidigia gumadimati.)

48 Adügati giñe Hosafátü waporu tibe to burí Tárüsisiboun, lun yebe tanaahan golu uburugugiñe Ofirü; gama lumoun mídintu, ladüga tabouchagun uburugu Esión-géberü. 49 Ábati lariñagun Okosíasi, le liráü Aabü lun Hosafátü lun lígirun lun houdin lumadulunigu tidan waporu hama lumadulunigu Hosafátü, gama lumoun máhati Hosafátü.

50 Aba lounwen Hosafátü, aba labunún luburuguterugu Dawidi, le lagücha, aba larúeihan Horamü, le liráü leweñegua.

51 Lidan irumu disedü lidan larúeihan Hosafátü Hudá, ligía lagumeserun Okosíasi le liráü Aabü arúeiha luagu Ísüraeli, uburugu Samaria, aba larúeihan bián irumu. 52 Gama lumoun mabuidunti lóuserun ligibugiñe Bungiu, lugundun falá lumuti lagübüri hémeri lagübürigu, luma lémeri Heroboamü, le liráü Nabatü, le afigougüdübalin Ísüraeli. 53 Bóugudin luéi lira, huduguati lun Baali, kei buga ladüga lúguchi, agañidagüdei Aburemei le Lubungiute Ísüraeli.