1 Ábati lóundaraguagüdüniña Salomón sun ábutigu Ísüraelina Herusalén sun hábutigu türibu, hama sun ha wéirigubaña Ísüraeli, lun tásügüragüdüniwa lubagüsina daradu lúmagiñe Sióngiñe, le luburugute Dawidi. 2 Aba hóundaragun sun Ísüraelina laganagua tufedun dibasein, lidan hati le gíribei Etanímü, le lisedün hati. 3 Danbei hachülürün sun ábutigu, aba hanügünu fádirigu lubagüsina daradu. 4 Aba hanügünu úara tuma kianpu lánina óundaruni luma Bungiu luma sun burí umegeguni sagüráuti le tídanbei, le burí hanaagubei fádirigu hama Lewitagu. 5 Aba hóundarun sun Ísüraelina luma urúei Salomón tigibugiñe lubagüsina daradu, aba burí hadagaragüdün saragu mudún hama bágasu, gíbetiña darí lun siñá lan habahüdǘniwa. 6 Lárigiñe aba hanügünu fádirigu lubagüsina lidaradun Aburemei turageirugun ténpulu, lidoun Fulasu Sándutimati, lábugiñe harüna kátaña garünatiña, 7 ha burí tulegubaña arüna ligibuagu fulasu le ñein tubéi bágüsi, darugu liña tau bágüsi labu lau índanu le tanaahagüle. 8 Gama lumoun migifeti burí índanu le tanaahagüle darí lun arihúa lan lígirugu lúmagiñe lídangiñe Fulasu Sánduti, ligibugiñe Fulasu Sándutimati, lau sun marihin lan bóugudigiñe, ani ítara liña lerederun chülǘ lumoun weyu le uguñebei. 9 Turageirugu bágüsi biámarügüñein fulansu lauti dübü le líchugubei Moisesi tidoun, lidan wübü Orebü, fulansu lánina daradu le ladügübei Aburemei hama Ísüraelina danbei le háfuridun Ehiptugiñe.

10 Danbei le háfuridun fádirigu lídangiñe Fulasu Sánduti, aba tabuinchun litenpulun Aburemei lau dúeri, 11 ani lídangiñeti tabuinchun ténpulu lau huánriñu merede habéi fádirigu lun hadügüni kultu, ladüga buinha buga ténpulu lau luéirigun Aburemei.

12 Ábati lariñagun Salomón:

«Buguya, Nabureme, ariñagaadibu luagu lidan lan luburiga baganawa.

13 Gama lumoun adügaadina aban ténpulu bun lun baganóun ñein,

aban fulasu lun ñein lan baganawa lun súnwandan».

14 Lárigiñe aba lagararaagun urúei aba lararamun hagibugiñe sun Ísüraelina. Aba labiniruniña, 15 ariñageina:

—Biniwalá Aburemei, Lubungiute Ísüraeli, le agunfulirubalin le füramase lubéi lun Dawidi, le núguchi, danbei lariñagun lun: 16 "Lúmagiñe weyu le nasagarunbaliña Ísüraelina ha numutuniña Ehiptugiñe, manúadirungidina yebe ni aban uburugu lídangiñe sun lani Ísüraeli türibu lun ñeinba lan tábunawagua aban ténpulu lun lúbanme niri. Gama lumoun anúadira numuti Dawidi lun ligíaba lan agumadirei nageira le Ísüraeli". 17 Ani busenti yebe meha Dawidi le núguchi lun ladügün aban ténpulu lun Aburemei, le Lubungiute Ísüraeli. 18 Gama lumoun aba lariñagun Aburemei lun: "Maribanti babusenrun badügün aban ténpulu nun; 19 gama lumoun mámaba buguya adügoun nitenpulun, biraüba ábunaguoun ténpulu nun".

20 —Guentoti gúnfulihali Bungiu lau lani füramasei. Ítara kei lariñaguni, ragüna lubara Dawidi le núguchi, ani áuhali urúei Ísüraeli, ani adügaadina aban ténpulu lun Aburemei le Lubungiute Ísüraeli. 21 Bóugudin luéi lira, rúhadina aban fulasu turageirugu ténpulu tun lubagüsina daradu le ladügübei Aburemei hama wagüchagu danbei le lasagaruniña Ehiptugiñe.

22 Lárigiñe aba lararamun Salomón ligibugiñe lani Bungiu latarü, lidan hañúarü sun Ísüraelina, aba liñuruni lúhabu sielun, 23 aba lagúaragun:

—Aburemei Lubungiute Ísüraeli: Ni sielu, ni ubouagu úati ni aban Bungiu kei buguya, le agunfulirubalin lidaradun, arufudaléi lubuidun hama sun ha eseriwidubaña lun tau sun hanigi, 24 gúnfuli baali le füramase bubéi lun bubuein Dawidi, le núguchi, gúnfuli baali lidan weyu le uguñebei sun dimurei le aubei füramase ban. 25 Ítara liña lubeiti, Aburemei, Lubungiute Ísüraeli, gúnfulibei giñe le füramase bubéi lun bubuein Dawidi le núguchi: Luagu memegeirúnbei lan aban ladügawagun lidan arúeihani, Ísüraeli, góunigirügü hamaali ligía héibugun, óusera hagíame bigibugiñe kei lóuserun. 26 Ítara liña lubeiti, Aburemei Lubungiute Ísüraeli adügabá lun lagunfulirun füramasei le badügübei lun núguchi Dawidi, le bubuein.

27 —Gama lumoun inarüni funa san Bungiu Núguchi luagu gayara lan baganóun waganagua, ya ubouagu? Anhein ñüraü lubéi sielu bun, lau lanarime lueirin, gúbudigiame ténpulu to, to nábunuboun bun! 28 Bungiu Nabureme, bubueintia au. Aganbabéi nafurieidun, teni buguyame lun nebegirun bun uguñe. 29 Arihabá tuagun ténpulu to áriebu wéyuagu, fulasu le uágubei bariñaga: Ñeinbei niri lun afurieiduni le ladügübei bubuein luagu fulasu le. 30 Aganbabéi nayumuragun luma hayumuragun bumutuniña danme hafurieidun ariheina luagun fulasu le. Aganbabéi sielun, fulasu le ñein lubéi baganawa, ani rubeime bani ferudun woun.

31 —Danme ladügün gürigia wuribati lun gürigia líledi, ani ábame hanügüni lau éregu ligibugiñoun latarü tidan ténpulu to lun láfiñurun, 32 aganbabéi lúmagiñe siélugiñe, ábame badügün irichaü houn bubueingu. Siadibéi gadurunti, lau bábürügüdüni labeichún luagun ladüga luriban lóuserun, adüga buguyame irichaü lun madurunti según le yuubei lun.

33 —Danme le lagañeiruni ágani Ísüraeli le bageira ladüga lafigouhan bigibugiñe, anhein agiribuda bun furese ani aba lalawahani biri, ayumuragua ligíame bun tidan ténpulu to, 34 aganbabéi lúmagiñe siélugiñe, ferudunabéi lifigoun, ani giribugüdabei lidoun fulasu le bíchugubei houn lagüchagu.

35 —Danme ñein lan aban lumabeigan, máhuyun ligíame ladüga hafigouhan bumutuniña bigibugiñe, ánhaña ayumuragua furese lau hagibu luagun fulasu le, alawaha haméi biri, ani asaküriha hagíame luagu hafigoun ladüga babeichuniña, 36 aganbabáña lúmagiñe siélugiñe, ferudunabéime hafigoun bubueingu ha bumutuniña Ísüraelina, ani arufudabéi üma buiti le lunbei hasigiruni houn. Óunahabeime giñe huya lidan ubóu le, le bíchugubei kei alagan houn bumutuniña.

37 —Danme ñein lan ilamaü lidan ageiraü, odi igei o lamabeidun tídibu burí wewe ladüga lárouga, o hayabingua igei ha chagagaru; danme le legeyedaguni ágani waburugute ábame lábürühan luagun, o liabin furumiñeguarügü lamiselu o sandi, 38,39 baganbeime sun afurieiduni o ayumuraguni le ladügübei furumiñeguarügü gürigia, o le hadüga sun bumutuniña Ísüraelina, ladüga danme la harihini halamiserun luma hagarigu ábame hínchuni háhabu lidan hafurieidun tuagun ténpulu to. Aganbabá lúmagiñe siélugiñe, lúmagiñe fulasu le ñein lubéi baganawa, rubei bani ferudun woun; ñǘbuinba ábanme bíchugun lun kada aban según le yuubei lun ligaburi lóuserun, ladüga buguyarügüñein asubudirei lisaminan tuma lanigi gürigia. 40 Ítara luba híchugun uéiriguni bun sunme añahán lan aganawa lidan múa le, le bíchugubei houn wagüchagu.

41 —Íbini anhein aban lubéi terencha, aban le mama hádangiñeti bumutuniña, ladügame laganbahoun luagu biri ábame liabin lídangiñe múa díseti, 42 ani aba lafurieidun ariheina tuagun ténpulu, keime laganbahóuba lan layanuhóun luagu luéirigun biri luma luagu óunwenbu bubafu, 43 aganbabéi lúmagiñe siélugiñe, lúmagiñe fulasu le ñein lubéi baganawa, subudi hamaamugabu néchanigu ubouagu ani rubeime le lamuriahan buma ru hagíame uéiriguni bun kei hadügüni bumutuniña Ísüraelina, ani gunfuranda hamaamugei luagu wawa lan biri tidan ténpulu to, to nábunaguboun bun.

44 —Danme hafurieidun bumutuniña ageindagua hama háganiñu, le ñein lumuti bóunahaña, ánhaña ayumuragua bun lau hagibu luagun uburugu le banúadirubei, luma tuagun ténpulu to nábunaguboun bun. 45 Aganbabéi hafurieidun luma hayumuragun lúmagiñe siélugiñe, ani ageindaguabá haweigiñe.

46 —Ani danme hafigouhan bigibugiñe, ladüga úati mafigounhanti, aba hamugati bagañidun aba bederegeruniña houn háganiñu lun hanügüniña kei adaürütiña lun hageiroun, gayaraati dise lan o yarafa lan. 47 Ánhaña agiribuda bun, ayumuragua hagía bun, ani ru hagíame fe luagu adügaaña lan wuribati, íbini lidan hamá ageiraü le ñeinhin lubéi hanügǘwa adaürǘwa. 48 Ánhaña agiribuda bun tau sun hanigi luma tau sun hawani lidan hageira háganiñu le ñeinhin lubéi hanügǘwa adaürǘwa, ani aba hafurieidun bun, lau hagibu luagun múa le, le bíchugubei houn hagüchagu, luagu uburugu le banúadirubei, luma tuagu ténpulu to nábunaguboun bun, 49 aganbabéi hafurieidun luma hayumuragun lúmagiñe siélugiñe, lúmagiñe fulasu le ñein lubéi baganawa, ani ageindaguabá haweigiñe. 50 Ferudunabéi hafigoun bumutuniña luma sun heledegun bigibugiñe. Ani adügabá lun gudeme hamá houn ha asagarubaliña hageiragiñe keisi adaürǘtiña. 51 Ladüga bageira ani yuuti bun, buguya asagarubalin Ehiptugiñe le ítarabei kei aban régigi lánina larürüdaguagüdüniwa gürabu.

52 —Tenibá lubeiti lun lafurieidun bubuein luma hayumuragun bumutuniña Ísüraelina. Aganbabáwa, Bungiu Baba, danme le wayumuragun bun! 53 Lugundun buguya, Aburemei, adireirubaliña hádangiñe sun néchani ha ubouagubaña lun bánigubaña lan según bariñagagüdüni lun Moisesi le bubuein, danbei basagaruniña wagüchagu Ehiptugiñe.

54 Danbei lásurun ladügüni Salomón afurieiduni luma ayumuraguni le, le ladügübei hudugu ligibugiñe latarü, iñureinalei lúhabu lun sielun. 55 Aba lararamun aba labiniruniña sun Ísüraelina ariñageina lau umalali héreti:

56 —Biniwalá Aburemei, le íchugubalin darangilaü houn lumutuniña Ísüraelina, según sun le füramase láalibei ladüga mígirungili ni aban lídangiñe buiti füramasei le ladügagüdübei lun lubúein Moisesi magunfulirunga.

57 —Ani guentó, ñein lan Aburemei le Wabungiute wama ítara kei meha hama lan wagüchagu, lun mígirun lániwa wábugua, 58 lubaragiñe lira lun ladügün lun gaganbadi wamá lun, lun wadügüni le labusenrubei lidan sun wadaagun, gúnfuli wameime lugumadin luma lilurudun le uágubei lariñaga houn wagüchagu lun hagunfuliruni. 59 Lun lidan lan lisaminan Aburemei le Wabungiute sun katei le namuriahabei luma áriebu wéyuagu, lun ladügün irichaü houn lubúeingu luma houn lumutuniña Ísüraelina, según le mégeiti, 60 lun hasubudiruni sun néchanigu ha ubouagubaña luagu Aburemei lan Búngiubei ani uá lan amu luéi. 61 Ítara liña lubeiti furangu humá luma Aburemei le Wabungiute, ani gúnfuli huméi lilurudun, adüga humeime lugumadin kei weyu le uguñe.

62 Lárigiñe le, aba líchugun urúei hama sun Ísüraelina adagaragüdüni lun Aburemei. 63 Aba ledewehan Salomón wein-bián-milu bágasu wügüriña hama san-wein-milu mudún lun Aburemei keisi adagaragüdüni lánina arandaruni. 64 Weyu meha ligía, aba lanúadiruni urúei bürürü le tigibugiñebei litenpulun Aburemei, lugundun ñein líchiga adagaragüdüni gudawarügüti, idewesei le fulúaruauti luma garaba lun adagaragüdüni le lánina arandaruni, ladüga ñüraü lan latarü lauti buronse le ligibugiñebei Aburemei ani mafiditi adagaragüdüni gudawarügüti lidan ni idewesei le fulúaruauti ni garaba lun adagaragüdüni le lánina arandaruni.

65 Lárigiñe le, aba lefeduhani Salomón, Ísüraelina hama sun gürigia ha ñǘbuinbaña lúmagiñe Amatügiñe chülǘ liraüraü duna le lani Ehiptu tuéyuri dibasein lidan liri Aburemei le Wabungiute, lúmaya aban fedu le sédüti weyu, lidan súngubei katorusuñein weyu hefeduhan. 66 Laruganbei aba hóudingua sun gürigia, aba habiniruni urúei, aba houdin hábiñoun lau saragu ugundani luagu sun buiti le ladügübei Aburemei lun Dawidi, le lubúein, luma houn lumutuniña Ísüraelina.