1 Lidan lidisiwídün lirumudiri larúeihan Heroboamü le liráü Nabatü, ligía lagumeserun Abiamü arúeiha Hudá. 2 Arúeihati ǘrüwa irumu Herusalén. Maaká tíribei lúguchu, liráü Abüsalón. 3 Adüga lumuti Abiamü figóu lememe buga ladügübei lúguchi, ani magunfulintu lanigi ligibugiñe Aburemei le Lubungiute, kei meha Dawidi, le lagücha. 4 Gama lumoun luagu línsiñehabu Aburemei lun Dawidi, ígirati lun lasigirun lilanpun durungu uburugu Herusalén, lau líchuguni liráü lun larúeihan leweñegua lun lederebugudun Herusalén; 5 lugundun buiti bugaha lóuserun Dawidi ligibugiñe Bungiu, lidan sun libagari, madireirúnti luéi le lariñagubei Aburemei lun, luéidigia le luáguti Uríasi le Étüna.

6,7 Meredeti hawuribuhan Roboamü luma Heroboamü hámagua sun wínwanñu lan Roboamü. Ñeinñein giñe wuribu hadan Abiamü luma Heroboamü. Le líbiri asusereduti luáguti Abiamü luma sun katei le ladügübei, anihein bürüwañu tidan liliburuna asusereduti hawaguti lurúeitegu Hudá. 8 Aba lounwen Abiamü, aba hábununi luburuguterugu Dawidi. Aba larúeihan Asá, le liráü leweñegua.

9 Lidan lagunfulirun larúeihan Heroboamü wein irumu Ísüraeli, ligía lagumeserun Asá arúeiha Hudá, 10 arúeihati bián-wein-aban irumu Herusalén. Maaká, ligía buga tíribei lagütü, liráü Abüsalón.

11 Buiti lóuserun Asá ligibugiñe Bungiu, kei meha Dawidi. 12 Sagá lumutiña wügüriña ha anügübalin ahoruhani keisi aban kultu fulasurugugiñe, gidá lumutiña giñe guáriua ha meha hadügübaña lagüchagu. 13 Gidá lumuti giñe tubara Maaká to lagütü keisi urúei úguchuru tuéi, ladüga tadügagüdün aban tiguariuan, aba lagünrinchagunu Asá guáriua tuguya, aba lágudunu lubadu liraüraü duna le Sedurón. 14 Lau sun magidarun tan burí ténpulu luéigiñe fulasu íñuti, gúnfuliti Asá luma Aburemei súnwandan, 15 sun golu luma pülata le lederegerubei ligía luma lúguchi lun Aburemei, ru lumuti tidoun litenpulun Aburemei.

16 Meredeti lawuribuhan Asá luma Baasá le lurúeite Ísüraeli. 17 Danbei lamudeirun Baasá lun lageindagun hama lílana Hudá, aba ladügün baríeiru lau Ramá, lun uá hama ebelurutiña ni áfuridutiña hádangiñe lánigu lurúeite Hudá. 18 Ábati lanügüni Asá sun golu luma pülata le litenpulunrugubei Aburemei luma le tídanbei luban urúei, aba lóunahani lun Ben-adadü le lurúeite Siria, le aganóubei Damasüku. Óunahati giñe ariñaga lun: 19 «Adüga wamá aban daradu au buma, kei buga hadüga wagübürigu. Anihán golu luma pülata nóunahan edeweha bun. Halaguabei bidaradun luma Baasá le lurúeite Ísüraeli, ígira láamugana nungua».

20 Aba lánharun Ben-adadü lun le lamuriahabei Asá luma, aba lóunahaniña hábutigu lisudaran ageindagua hama lílana luburugute burí Ísüraeli. Aba lagañeiruni Iyón, Dan, Aweli-betü-maaká, sun Kineretü, luma sun lumúan Nefütalí. 21 Dan laganbubalin Baasá, aba lerederun ladügün baríeiru lau Ramá, aba lagiribudun uburugun Tirüsá. 22 Ábati lóunahan urúei Asá hawagu sun lílana Hudá, aba hayabin súngubei, aba hanügüni dübü luma fulansu le buga layusurubei Baasá lun ladügün baríeiru lau Ramá, aba leseriwidun lun urúei Asá lun ladügün baríeiru lau Geba le lani Benhamín luma Misüpá.

23 Le líbiri asusereduti luáguti Asá luma burí katei le ladügübei luma fulasu burí le lábunagubei, anihein bürüwañu tidan liliburuna asusereduti hawaguti lurúeitegu Hudá. Lidan lueiyan Asá, aba lasandirun lugudigiñe; 24 aba lounwen, aba hábununi hama lagüchagu luburuguterugu Dawidi. Aba larúeihan Hosafátü le liráü leweñegua.

25 Lidan libiaman lirumudiri larúeihan Asá Hudá, ligía lagumeserun Nadabü le liráü Heroboamü arúeiha Ísüraeli, biámañein irumu ladurarun larúeihan. 26 Gama lumoun wuribati lóuserun ligibugiñe Bungiu; adüga lumuti lememe burí figóu le meha ladügübei lúguchi, le burí aubei lafigougüdaña Ísüraelina. 27 Gama lumoun Aba leledegun Baasá le liráü Aíasi, le bugaha hádangiñebei lani Isakárü türibu lubá, aba láfaruni uburugu Gibetón, luburugute Filistéa, le legeyedagubei Nadabü hau sun súdaragu Ísüraelina.

28 Lidan lǘrüwan lirumudiri larúeihan Asá Hudá, ligía láfaruni Baasá Nadabü, aba larúeihan leweñegua. 29 Kei lagumeserun arúeiha, aba láfaraguniña sun liduheñu Heroboamü. Kei buga lariñagagüdüni Aburemei lun Aíasi le Silona, gumuguagüda lumutiña Baasá liduheñu Heroboamü. Mígirunti ni aban hádangiñe wínwanñu. 30 Sun lira, ladüga figóu le buga ladügübei Heroboamü le giñe aubei lafigougüdaña Ísüraelina, agañidagüdei Aburemei le Lubungiute Ísüraeli.

31 Le líbiri asusereduti luáguti Nadabü, luma sun katei le ladügübei, anihein bürüwañu tidan liliburuna asusereduti hawaguti lurúeitegu Ísüraeli.

32 Meredeti bugaha lawuribuhan Asá luma Baasá le lurúeite Ísüraeli.

33 Lidan lǘrüwan lirumudiri larúeihan Asá Hudá, ligía lagumeserun Baasá le liráü Aíasi arúeiha luagu sun Ísüraeli uburugu Tirüsá, arúeihati wein-gádürü irumu. 34 Gama lumoun mabuidunti lóuserun Baasá ligibugiñe Bungiu, adüga lumuti figouméme le burí buga aubei lafigougüdaña Heroboamü Ísüraelina.