1 Bóugudin tuéi lúmari Salomón to liráü urúei Ehiptuna, aba hínsiñedun amu würiña terencha lun Salomón: Moábüna, Edomuna, Sidonna hama Étüna; 2 würiña ha uéibaña leweridiraña Aburemei Ísüraelina luéi hamarieidun hama, luéi hachawahaniña eseriwida houn habungiutegu. Gama lumoun aba laganóun Salomón hama. 3 Sédüñanu-san lúmarigu ha maríeiti hama, hama ǘrüwa-san lubúaligu ha egeyedagüdübarun lanigi luéi Bungiu. 4 Dan le wéiyaali lubéi Salomón, aba hadügün lúmarigu lun tegeyedun lanigi hawagun amu búngiugu, lugundun mederegeragunti lungua sunsuinagubei lun Aburemei le Lubungiute, kei buga ladügüni Dawidi le lúguchi. 5 Huduguati Salomón tun Asütárüte, to habungiute Sidonna, luma lun Milükómu le haguariuan Amonna. 6 Adüga lumuti lubeiti Salomón le wuribabei ligibugiñe Bungiu, lugundun méibugunti lau gúnfuli luma Aburemei kei buga Dawidi le lúguchi.

7 Lidan dan ligía, aba lábunagun Salomón aban muna lun Kemosu, le haguariuan Moábüna, luma lun Moloku le haguariuan Amonna, luagu wübü le luéigiñebei oubaü le ñéingiñe lubéi laboucha weyu libiti Herusalén. 8 Ligiaméme giñe ladüga houn sun lúmarigu ha terencha, ha águdahabaña kupali houn habungiutegu, dagagüda hagía houn. 9 Aba lagañidun Aburemei lun Salomón ladüga ladireirun luéi lárigiñe buga arufudaguaali lan lungua lun bián wéiyaasu 10 ariñaga ligía lun lun máhuduragun lan houn amu búngiugu. Gama lumoun madügünti gasu lau le lariñagubei Aburemei lun. 11 Aba lubeiti lariñagun Aburemei lun Salomón:

—Kei óuseraadibu lubéi ítara, magunfulirun bumuti lúrudu le níchugubei bun, nagidaraali arúeihani buéi, ábame níchuguni lun aban hádangiñe ha eseriwidubaña bun. 12 Gama lumoun luagu nínsiñehabu lun Dawidi le búguchi, madügün nubéi lau wínwangidibu lan; gama lumoun nagidarubei luéi biráü. 13 Gama lumoun magida nubéi sun arúeihani luéi: Nígiruba aban türibu lun, ladüga nugudemehabu lun búguchi luma lun Herusalén uburugu le nanúadirubei.

14 Ábati ladügün Aburemei lun liñuragun aban ágani lungua luagun Salomón: Aban Edomuna gíriti Adadü, hádangiñeti liduheñu urúei Edomu. 15 Dan buga lagañeirunbalin Dawidi Edomu, dan le lídinbei Hoabü, le hábuti súdaragu ábunaña ha óunwegubaña wuriburugu, aba láfaraguniña sun wügüriña Edomuna; 16 rédeiti ñein Edomu luagu sisi hati, hau sun Ísüraelina, darí lagumuchun hau sun wügüriña Edomuna. 17 Gama lumoun Adadü le meha ñǘraügilibei lidan dan ligía, aba lanurahan Ehiptun hama fiu lupaisanun ha eseriwidubaña lun lúguchi. 18 Aba háfuridun Madiangiñe, aba hachülürün Parán, aba hanügün fiu wügüriña ñéingiñe lun habúeingume. Hachülürünbei Ehiptu, aba houdin lumoun urúei Ehiptuna, aba líchugun urúei Ehiptuna muna luma éigini houn, edeweha ligía múa houn.

19 Wéiriti lagañeiruni Adadü lufulesein urúei Ehiptuna, aba líchugunu urúei Ehiptuna luguñoun to tamulelua urúei Tapenési lun Adadü lun lúmarime. 20 Aba tagaraüdün tamulelua Tapenési aban wügüri irahü lau Adadü, Genubátü líribei irahü ligía, aba tagüriahani Tapenési tidan lani urúei Ehiptuna palasiu lidan aban hama tirahüñü. 21 Gama lumoun dan laganbunbei Adadü ñein Ehiptu luagu hilá lan Dawidi, hilá Hoabü le hábuti súdaragu, aba lariñagun lun urúei Ehiptuna:

—Ruba üma nun lun nagiribudun nageiroun.

22 Lariñaga urúei Ehiptuna lun:

—Kagia uagu babusenra bagiribudun bageiroun? Anihein funagia bemegeirun ya numa?

Lariñaga Adadü lun:

—Úati nemegeirun, gama lumoun amuriahatina buma lun bígirunina lun nagiribudun.

23 Iñuraguagüda lumuti giñe Aburemei Resón le liráü Eliadá luagun Salomón, le meha anurahabei luéi labureme, le Adadü-éserü, le lurúeite Sobá. 24 Óundaraali buga fiu wügüriña, ligíati hábutibei aban sétanu híwerutiña, dan buga le láfaragunbaliña Dawidi lílana Sobá. Lárigiñe aba houdin uburugun Damasüku, aba líchaagun lungua urúeime ñein Damasüku. 25 Láganiñein Ísüraeli Resón sun wínwanñu lan Salomón; lauti le, aba laganwoundun wuribani le ladügübei Adadü, lugundun iyereeguti buga Ísüraeli lun. Ítara liñati lachülürün Resón arúeiha Siria.

26 Iñuraguati giñe Heroboamü, le liráü Nabatü lungua luagun Salomón. Heroboamü, hádangiñeti lánigu Salomón, Seredána, hádangiñeti lani Éfürain türibu. Serúa tíribei lúguchu. 27 Anihán lébunabei liñuragun Heroboamü lungua luagun Salomón: Dan meha le ladügüñein lan Salomón üma, adoureinaléi lubenari luburugute Dawidi le lúguchi. 28 Aban méhati wügüri héreti Heroboamü ganigi ligia; keiti larihin Salomón luagu ganigi lan Heroboamü, aba líchuguni lun ligía lan ariha hau ladügawagun Hosé.

29 Lidoun dan ligía, luagu aban weyu dan láfuridun Heroboamü Herusaléngiñe, aba ladunragun luma profeta Aíasi luagu léibugun, darugu liña Aíasi tau aban idáü iseri. Biánguarügüñanu hagía áraabu, 30 aba lanügünu Aíasi idáü to luáguboun, aba laheiridagunu lidan duusu murusun, 31 aba lariñagun lun Heroboamü:

—Barüba diisi murusun bánime, ladüga lariñahare Aburemei le Lubungiute Ísüraeli bun: "Nagidaraali arúeihani luéi Salomón, níchiga diisi türibu bun. 32 Ábanrügübei türibu nígirun lun Salomón, luagu nínsiñehabu lun Dawidi luma Herusalén, uburugu le nanúadirubei lídangiñe sun uburugu le hani lani Ísüraeli türibu. 33 Ladüga ígira láadina Salomón, aba láhuduragun tun Asütárüte, to habungiute Sidonna; lun Kemosu, le habungiute Moábüna; luma lun Milükómu, le habungiute Amonna. Mabuidunti le ladügübei ligibugiñe nagu, magunfulirun lumuti nilurudun kei ladügüni Dawidi, le lúguchi. 34 Gama lumoun magida nubéi arúeihani luéi súngubei, nígirubei kei agumadihati lidan sun libagari, luagu nínsiñehabu lun Dawidi, le buga nanúadirubei, ani gúnfuli lumuti nugumadin luma nilurudun. 35 Gama lumoun nagidarubei arúeihani luéi liráü, ábame níchuguni diisi türibu ligía bun. 36 Ábanrügübei türibu nígirun lun liráü, lun lerederun lilanpun nubúein Dawidi durungu nigibugiñe súnwandan Herusalén, uburugu le nanúadirubei, keisi luban niri. 37 Nanügübadibu lun barúeihan lóugiñe sun le babusenrun, lun barúeihan Ísüraeli. 38 Ánhabu ñüdün lau sun le nariñagun bun, adügabéime le úaraguabei nigibugiñe, gúnfulibeime sun nilurudun luma nugumadin kei ladüga Dawidi le nubúein, búmabadina, ábame narúeihagüdüniña badügawagun kei nadüga lun Dawidi; ábame nederegeruni Ísüraeli bun. 39 Ánhañati ladügawagun Dawidi, nabeichubaña luéigiñe katei le, gama lumoun mama lun súnwandan".

40 Luéigiñeti katei le, aba louchun Salomón láfaruni Heroboamü hilagubei; gama lumoun aba lanurahan Heroboamü Ehiptun, le buga ñein lubéi larúeiha Sisakü, aba lerederun ñein darí lounwen Salomón.

41 Le líbiri asusereduti luáguti Salomón luma luáguti lichú lau, luma sun katei le ladügübei, anihein bürüwañu tidan líburu to luágutu asusereduti luáguti Salomón. 42 Bián-weinñein irumu larúeihan Salomón luagu sun Ísüraeli, uburugu Herusalén; 43 Danbei lounwen, aba hábununi luburuguterugu Dawidi le lúguchi. Lárigiñe, aba larúeihan Roboamü le liráü leweñegua.