1 Aba lidin Roboamü Sikemü, ladüga ñǘdünha lan buga sun Ísüraeli ñein lun híchuguni urúeime. 2 Gama lumoun aba laganbuni Heroboamü le liráü Nabatü, dan anihagua lan uburugu Ehiptu le buga ñeinhin lubéi lanuraha luéi urúei Salomón, aba lerederun aganawa ñein. 3 Dan hóunahanbei luagu, aba lidin Heroboamü hau sun lílana Ísüraeli adimureha luma Roboamü, aba hariñagun lun:

4 —Dereti meha dan woun luma búguchi; guentoti, huáliguagüdabawa, ábame weseriwidun bun.

5 Lariñaga Roboamü houn.

—Heiba, hiábinme ǘrüwa weyu lárigiñe le.

Aba houdin, 6 ábati lálügüdahan urúei Roboamü hama wéiyaaña mutu ha meha eseriwidubaña lun Salomón le lúguchi, lariñaga houn:

—Kaba eweridiruni híchiga nun, lun nóunabuniña gürigia ha?

7 Hariñaga lun:

—Ánhabu íchaagua bungua lun beseriwidun houn gürigia ha, óunababañame lau dimurei buiti, heseriwiduba bun súnwandan.

8 Gama lumoun madügünti Roboamü gasu lau le hariñagubei wéiyaaña mutu lun, aba lálügüdüniña irahüñü ha agüriarubaña luma, ha eseriwidubaña lun, 9 lariñaga houn:

—Kaba saminaü híchiga nun, lun nóunabuniña gürigia ha amuriahabaña numa lun nawalidaguagüdüni lidere dan le meha líchugubei núguchi houn?

10 Hariñaga lun:

—Ariñagabá houn gürigia hagía: "Anhein buga deré lubéi núguchi, deretimatina; 11 anhein buga ru lubéi lidere dan hun, níchigatimaba; anhein buga lau lubéi gueru labeichaün, lauba abeihagülei le gawaguti gürabu luagu lígirugu nabeichaün".

12 Luagu lǘrüwan weyu, ábaya liabin Heroboamü hau sun lílana Ísüraeli lumoun Roboamü, kei buga lariñaguni urúei houn. 13 Gama lumoun aba lóunabuniña urúei lau iderei, madügünti gasu lau le hariñagubei wéiyaaña mutu houn; 14 aba lariñaguni le hariñagubei irahüñü lun houn:

—Luagu anhein lubéi buga deré lubéi dan houn luma lúguchi, deretimabei lan dan houn luma, ani anhein lan lau lubéi gueru labeichaña lúguchi, lauba lan abeihagülei le gawaguti gürabu luagu lígirugu labeichaña.

15 Madügünti lubeiti urúei gasu hau gürigia hagía, ladüga aranse laali lan Aburemei lun ítara luba lan, lun lagunfulirun le buga lariñagubei Aburemei lun Heroboamü, le liráü Nabatü, lídangiñe Aíasi le Silona. 16 Dan harihinbei lílana Ísüraeli luagu madügün lan urúei gasu hau, aba hariñagun lun:

«Mánitiwa ni kata luma Dawidi!

Malagantetiwa luma liráü Hesé!

Heiba húbiñoun Ísüraelina!

Góunigilaña Dawidi liduheñu!»

Aba houdin Ísüraelina hábiñoun. 17 Ánhañati Ísüraelina ha aganóubaña lidan uburugu burí le lani Hudá, rédeitiña lábugiñe larúeihan Roboamü. 18 Dan lóunahani Roboamü Adorámü, le arihubei lau wadagimanu fósuarügüti, aba hachamuragun lílana Ísüraeli dübü luagun, aba háfaruni hilagubei. Ábati ládinun urúei Roboamü furese tidoun likarün, aba lanurahan Herusaléun. 19 Ítara liña liñuragun Ísüraeli lungua hawagun ladügawagun Dawidi chülǘ lumoun dan le.

20 Dan haganbunbei lílana Ísüraeli luagu giribuha lan Heroboamü, aba hóunahan luagu lun larufudagun lungua houn lílana fulasu, aba híchuguni urúeime lidan sun Ísüraeli, úatiña erederutiña asigiraña ladügawagun Dawidi haweidigia lani Hudá türibu.

21 Dan lachülürünbei Roboamü Herusalén, aba lóundarun san-gádürü-wein-milu súdara ha buítiña hádangiñe sun liduheñu Hudá, hama lani Benhamín türibu, lun lageindagun luma Ísüraeli, lun lárügüdüni larúeihan lárigoun. 22 Gama lumoun aba ladimurehan Aburemei lun Semaíasi, luwügürin Bungiu, lariñaga lun: 23 «Ariñagabá lun Roboamü, le liráü Salomón, lurúeite Hudá, houn sun liduheñu Hudá luma Benhamín, luma houn híbiri gürigia, 24 luagu nariñahare lan, lun mageindagun hamá hama Ísüraelina ha hábirigu. Lun lan hagiribudun súngubei hábiñoun lugundun ítara liña lan naranseruni».

Dan haganbunbalin le lariñagubei Aburemei houn, aba hagiribudun, kei lariñaguni houn.

25 Ábaya lararamagüdüni Heroboamü uburugu Sikemü, le luágubei luwübüri Éfürain, aba laganóun ñein. Lárigiñe aba giñe lararamagüdüniya Penueli. 26 Gama lumoun lariñaga lúnguarügü: «Gayaraabei hárügüdüniya ladügawagun Dawidi arúeihani, 27 ánhaña ñüdün gürigia ha Herusalén, lun hadagaragüdün litenpulunrugu Bungiu. Hárügüdayabei línsiñe Roboamü, le lurúeite Hudá, ábameti háfarunina ábame hagiribudun lumoun Roboamü, le lurúeite Hudá».

28 Lárigiñe hayanuhan libügürü katei le, aba ladügün urúei bián hayawa bágasu wügüriña lau golu, aba lariñagun houn lílana fulasu:

—Huguya Ísüraelina, gíbeeli hidin Herusalén. Añahán hubungiutegu, ha asagarubalün Ehiptugiñe.

29 Ábati líchugun aban bágasu lauti golu uburugu Beteli, le aban uburugu Dan. 30 Káteiti le, ligía lébunabei hafigouhan Ísüraelina, lugundun ábaha houdin uburugu Beteli luma uburugu Dan, lun háhuduragun houn. 31 Bunaguati giñe sanduariu burí lidan fulasu íñuti, aba líchugun lílana fulasu ha mama Lewitagu fádirigume. 32 Adügati giñe lun ladügün aban fedu sagüráuti weyu keinsi lidan liwidün hati, kei fedu le efeduhóubei Hudá, ligía guánarügü adagaragüdati luagu latarü. Beteli ladügei katei le, adagaragüda houn bágasu ha ladügübaña, luma líchugun fádirigu tidan burí hatenpulun gibe tubungiutegu to ladügüboun. 33 Weyu lubeiti keinsi lidan liwidün hati, aba ladagaragüdün Heroboamü luagu latarü le ladügübei uburugu Beteli. Ligía lihatiribei fedu le ladügübei luagu labusenrun, aba líchuguni kei fedu sagüráuti houn Ísüraelina, lememe hati le lamudeirúnbei águdaha kupali luagu latarü.