1 Aba gaduheñugua lan Salomón luma urúei Ehiptuna, lugundun lamarieidun tuma aban liráü, aba lanügünu luburuguterugun Dawidi, lubaragiñe tóunwenbudun lani palasiu, litenpulun Aburemei luma lubarieirun Herusalén. 2 Lidan burí fulasu íñuti, le ñein lubéi háhuduragua gibe tubungiutegu hadagaragüda lánigu Aburemei lun, ladüga mábunawagungiru meha ténpulu lun Aburemei lidan dan ligía.

3 Hínsiñeti buga Aburemei lun Salomón, gúnfulilei lúrudu burí le lígirubei urúei Dawidi le lúguchi, lau sun dagagüda lan lun Aburemei lidan burí fulasu íñuti, 4 ñǘdünti burí giñe adagaragüda Gabaón, ladüga ligía lan fulasu íñuti le wéirigutimabei; ábaha ladagaragüdün milu adagaragüdüni gudawarügüti lidan fulasu ligía.

5 Luagu aban áriebu, aba larufudagun Aburemei lungua lun Salomón larumugunrugu, aba lariñagun lun:

—Amuriahabei le babusenrun numa, níchugubei bun.

6 Lóunabeiti Salomón:

—Óusera bumuti buga Dawidi le núguchi lau saragu areini, Dawidi le bubuein, lugundun éibugati lábugiñe úaraguni buma tau sun lanigi. Ligía lébubei bóuseruni lau saragu areini, ru buguya aban isaani lun, lun lañuuruba lan luagu lálana narúeihan, kei lasuseredun uguñe weyu. 7 Buguya, Nabureme le Nubungiute, ru baadina lun narúeihan leweñegua núguchi Dawidi lau sun nibureingidina lan. 8 Gama lumoun anaha arúeiha houn gürigia ha banúadirubaña: Gíbetiña, le lueirin hibe, darí lun siñá lan habahüdǘniwa. 9 Ruba lubeiti aban anigi gaganbaditu nun lun gayara lan nabuguruniña bumutuniña, luma lun nasubudiruni le buídubei lumoun le wuribabei; lugundun kaba gayara labuguruniña bánigu ha ha ítarabaña iibe?

10 Gúndaati Aburemei lau le lamuriahabei Salomón, 11 aba lariñagun lun:

—Ladüga anihán lan bamuriahabei numa, mamuriahantibu ibagari migifeti, ni irisini, ni lun hóunwegun báganiñu, bamuriaha lichú aau lun baganbun luma lun bagumadihan, 12 nadügaali le bamuriahabei bun: Níchiga lichú aau bun libe le úagili luma ni aban bubaragiñe, ani úabei giñe luma ni aban bárigiñe. 13 Níchuguba giñe irisini bun, luma uéiriguni katei le mamuriahan bumuti, lun úabei lan ni aban urúei kei buguya lidan sun bibagari. 14 Ani anhein badüga le nubeibei, gúnfulibeime nilurudun kei buga ladügüni Dawidi le búguchi, níchuguba ibagari migifeti bun.

15 Dan lagagudunbei Salomón, aba lasubudiruni luagu luénedü lan. Dan lachülürünbei uburugun Herusalén aba larufudagun lungua tigibugiñe lubagüsina lidaradun Aburemei, aba ladagaragüdün le lánina arandaruni luma adagaragüdüni gudawarügüti lun Aburemei. Lárigiñe aba ladügagüdün aban adineruni houn sun gumadimatiña.

16 Lidan dan ligía, aba houdin bián horu lumoun urúei. Dan ligibugiñehaaña, 17 aba tariñagun aban hádangiñe:

—Arihabá san urúei, nuguya tuma hiñaru to tidan aban muna waganawa, tau numa múnada, aba nagaraüdün aban irahü. 18 Ǘrüwa weyu lárigiñe nagaraüdün, aba giñe tagaraüdün hiñaru to. Wábuguarügüñadiwa wagía biangua múnada. Úatiña amu gürigia terencha wama múnada. Wagíarügüñadiwa biámagua. 19 Gama lumoun luagu aban áriebu, aba lounwen tiráü hiñaru to, ladüga tarounrun ligibuagu. 20 Ábati tásaarun amidi áriebu, dan anaha lan arumuga, aba tanügüni niráü nóubawagugiñe, aba tarounragüdüni túmagua, aba tíchuguni tiráü le hilaalibei numoun. 21 Larugan binaafin dan le násaarunbei lun nátagüdüni niráü, aba narihin luagu hilá lan. Gama lumoun dan larugoungadunbei buidu, aba narihin luagu mama lan ligía niraübei.

22 Tariñaga to aban würi:

—Uá, niráü le wínwangilibei, biráü le hilaalibei.

Tariñaga to buga furumiñetu:

—Biyeeni, le hilaalibei biraübei, le wínwangilibei niraübei.

Aba herederun asigeneha ítara ligibugiñe urúei. 23 Ábati lariñagun urúei lúnguarügü:

—Tariñaga to luagu tiráü lan le wínwangilibei, le lan hilaalibei tiraübei to aban, to aban ariñaga amu katei!

24 Ábati lariñagun urúei:

—Barǘ humá aban eféin nun!

Lárigiñe hanügünu eféin lun urúei, 25 aba lariñagun:

—Bigua huméi irahü le wínwangilibei lamidan lúmagua, ábame híchugun lamidan tun aban, lamidan tun to aban.

26 Gama lumoun aba tírudagun lúguchu irahü le wínwangilibei luagu tiráü, aba tariñagun lun urúei:

—Máfarabei irahü urúei rúgubeibei tun hiñaru to.

Aba tariñagun to aban:

—Ni nun, ni bun. Bíwaguala!

27 Ábati ladimurehan urúei, lariñaga:

—Máfara huméi irahü, ru huméi tun túguta, ladüga tuguya lúguchuboun.

28 Aba gefén lan sun Ísüraeli luagu ligaburi laranseruni urúei turobuli ligía, aba linebedun houn, ladüga harihin luagu rúhali lan Aburemei lichú aau lun lun laguseragüdün lau úarani.