1 Dan ñeinñein lubéi Heroboamü águdaha kupali luagu latarü, ligía lachülürün aban profeta Hudaagiñe, lóunahan Bungiu. 2 Aba lariñagagüdüni Aburemei lau umalali héreti:

—Latarü, latarü: Lariñahare Bungiu: "Lágurahouba aban irahü hádangiñe ladügawagun Dawidi, gíriti Hosíasi, ladagaragüdübaña tufadirinigu hatenpulun gibe tubungiutegu ha águdahabaña kupali buagu; ábame hágudahan habu gürigia buagu".

3 Weyuméme ligía, aba líchugun profeta ligía aban seini. Lariñaga:

—Anihán seini le uágubei lariñaga Bungiu: Lañaünrüdaguba latarü, ábame lachagaragun baligi le luágubei.

4 Dan laganbunbalin urúei Heroboamü siadi le lariñagubei profeta kóntüra latarü le Betelibei, aba liñuruni lúhabu luéigiñe latarü, aba lariñagun:

—Daü huméi!

Gama lumoun úhabu le buga liñurubei lun larufudun luagun profeta, aba lerederun deregüdañu, siñá lánhingichuni. 5 Lidan oura ligía, aba lañaünrüdagun latarü, aba lachagaragun baligi le luágubei, kei buga seini le líchigagüdübei Aburemei lun profeta. 6 Ábati lariñagun urúei lun profeta:

—Ayumuraguatina bun, lun bafurieidun lun Aburemei le Bubungiute, lun lareidagun núhabu.

Aba layumuragun profeta lun Bungiu, aba lareidagun lúhabu urúei. 7 Aba lariñagun urúei lun profeta:

—Keimoun numa núbiñe hou báamuga, ábame níchugun aban idewesei bun.

8 Lariñaga profeta lun urúei:

—Ni anhoun bíchiga tamidan bani palasiu nun, mídinbadina buma, ani méiginbadina giñe fein, matun aume duna lidan fulasu le; 9 ladüga ítara liña lariñaguni Aburemei nun. Lariñahare nun: "Meigabá fein, matun buguyame duna, magiribudún buguyame luéigiñe üma le ñéingiñe lubéi bidin".

10 Ábati lidin profeta lídangiñe amu üma, luéi lagiribudun lídangiñememe üma le ñéingiñe lubéi lidin uburugun Beteli.

11 Lidan bugaha dan ligía, ñeinñein aban weiriei mutu profeta aganawa Beteli, aba houdin lirahüñü, aba habahüdagun lun luagu sun le buga ladügübei profeta Hudaana weyu ligía Beteli; abahüdaguatiña giñe lun háguchi luagu le ladügübei urúei. 12 Lariñaga háguchi houn:

—Kagia üma lárügüdübei?

Aba harufuduni lirahüñü lun ka lan üma lárügüdübei profeta Hudaana lun lagiribudun. 13 Ábati lariñagun houn lirahüñü:

—Aranse huméi nilügün burigü.

Aba haranseruni, aba lawarirun profeta, 14 aba lidin profeta Hudaana. Aba ladariruni ñun tábugiñe aban tídibu wewe gíritu ensina, aba lariñagun lun:

—Buguya san profeta le ñǘbuinbei Hudaagiñe?

Lariñaga lun:

—Anha, au.

15 Lariñaga weiriei profeta lun:

—Keimoun numa núbiñe hou báamuga numa.

16 Lariñaga profeta Hudaana lun:

—Siñati nidin buma, ni nebelurun búbiñoun, ni lun neigin fein ni natun duna buma lidan fulasu le; 17 lugundun ariñagaali Aburemei nun furangu: "Meigabá fein, matun duna ya, magiribudún buguyame lídangiñe üma le ñéingiñe lubéi bidin".

18 Aba léredun weiriei mutu ligía luagu, lariñaga lun:

—Profeta giñe au keisi buguya, ani óunahaali Aburemei aban ánheli ariñaga nun lun nanügünibu eiga luma ata núbiñe.

Lau sun leyeehañein lan weiriei mutu ligía, 19 aba lidin profeta Hudaana luma, aba leigin, hou ligía lúbiñe. 20 Dan ñun haña lan luagu dábula, aba ladimurehan Aburemei lun weiriei profeta le agiribudagüdübalin profeta Hudaana, 21 aba lariñagun weiriei mutu lun profeta Hudaana rein:

—Lariñahare Aburemei luagu ladüga lan badüraaguni lererun, 22 lau bagiribudun lun beigin luma lun batun le ñein lubéi lariñaga Aburemei bun lun madügünbani, mabunúnbadibu lan lidan hamúaha wagüchagu.

23 Lásurun leigin profeta Hudaana, aba laranseruni weiriei profeta lilügün mile, 24 aba lidin profeta Hudaana. Gama lumoun ǘmadarugu, aba liabin aban liñún luagun, aba láfaruni hilagubei, aba lerederun riwagu ǘmadarugu. Aba lerederun mile luma liñún lurugabu. 25 Aba hásügürün fiu wügüriña, aba harihini hilaali ǘmadarugu, anihagua liñún lurugabu. Dan hachülürün uburugu le ñein lubéi laganawa weiriei profeta, aba habahüdaguni le harihubei. 26 Dan laganbuni weiriei profeta, le buga agiribudagüdübalin le aban profeta, aba lariñagun:

—Profeta le adüraagubalin lererun Aburemei lira. Ligía lederegerunbalin Aburemei lun aban liñún, aba láfaruni kei lariñaguni Aburemei lun.

27 Lárigiñe aba lariñagun houn lirahüñü lun haranseruni lilügün mile, aba haranseruni. 28 Ábati lidin weiriei profeta ligía, aba ladariruni hilaali ǘmadarugu, anihán mile luma liñún lurugabu. Madügünti liñún ni kata lau hilaali ni lau mile. 29 Ábati labuduni weiriei profeta hilaali, aba lawariragüdüni luagun mile, aba lanügüni uburugun lun lábununi. 30 Aba lábununi lidan lumuaha guánarügü, aba layahun lárigi, lariñaga lidan layahun:

—Aüü, níbiri!

31 Lárigiñe lábununi, aba lariñagun houn lirahüñü:

—Danme nounwen hábunaname lídanmeme umúahaü le ñein lubéi nábunei luwügürin Aburemei le. Lóubagiñeba híchigana; 32 lugundun chóuruti luagu lagunfuliruba lan le lariñagagüdübei Aburemei lun luagu latarü le Betelibei, luma tuagu sun ténpulu to uburuguboun Samaria.

33 Lau sun lira, mígirun lumuti Heroboamü luriban lóuserun, ábaya líchugun fádirigu hádangiñe lílana fulasu tun burí ténpulu. Leha busenti lafadirihan, ábaha líchuguni Heroboamü fádirime tidan ténpulu burí tuguya. 34 Anihán igaburi ligía, lébunabei hafigouhan ladügawagun Heroboamü, aba hagumuchawaguagüdün sunsuinagubei ubouagugiñe luéigiñememe katei ligía.