1 Lidoun dan ligía, aba lasandirun Awíasi le liráü Heroboamü. 2 Aba lariñagun Heroboamü tun lúmari:

—Dáüguaba lun ibidiñewa lan luagu númari ban, beiba Siló. Ñein laganawa Aíasi, le profeta le buga ariñagubei nun luagu auba lan lurúeite néchani le. 3 Barüba diisi fein, durudia, sírudu, ábame bidin lumoun, ariñaga láamugei bun kaba lan asusereda lun irahü le.

4 Aba tadügüni lúmari Heroboamü ítara. Aba taranserun, aba tidin Siló, aba tachülürün lúbiñoun Aíasi. Marihinhaliti Aíasi buidu ladüga lueiyan 5 gama lumoun subudigüda laali buga Aburemei lun luagu tiábinba lan lúmari Heroboamü lumoun, álügüdei ida luba lan lidin lun lisandi tiráü subudigüda lumuti giñe lun kaba lan lóunabagüle tun, luma luagu tiábinba lan tau amu daüguaü lun ibidiñewa tan.

6 Dan laganbuni Aíasi tugudi bénabu, aba lariñagun Aíasi tun:

—Beluba lúmari Heroboamü. Ka uagu bafamura kei amu gürigia? Ariñawagúaali nun lun nadimurehan bun lau dimurei dereti, 7 giribubá lubeiti, bariñagame lun Heroboamü luagu lariñahare lan Aburemei le Lubungiute Ísüraeli: "Sagá numutibu hádangiñe lílana fulasu, aba níchugunibu harúeiteme numutuniña ha Ísüraelina. 8 Gidá numuti arúeihani hawéi ladügawagun Dawidi lun níchuguni bun. Gama lumoun móuseruntibu kei Dawidi le nubúein, le agunfulirubalin nugumadin, éibuga ligía numa tau sun lanigi, ani úaraguati ligaburi nigibugiñe; 9 anhein buguya, wuribatimati bóuserun sügǘ hau sun ha bubaabaña; lun bagañidagüdünina, aba badügün amu búngiugu láutiña gürabu rǘrüguati, aba meberesen ban nau. 10 Ligía nanüga lubéi wuribani hawagun badügawagun: Nadügüba lun hóunwegun sun badügawagun wügüriña uburugu Ísüraeli. Meredebei ni aban wínwanñu. Nabuidubaña badügawagun sunsuinagubei kei labuidún hádiga animaalu. 11 Biduheñu ha óunwegutiña uburugu, héigibaña ounli; ha óunwegutiña áraabu, héigibaña dunuru áraabuna, ladüga ítara liña naranseruni, au le Aburemei".

12 —Buguya würi, saraba, beiba búbiñoun. Keime bíchugun aban bugudi uburugu, ítarame lounwen irahü. 13 Ábame hayahun sun Ísüraelina lárigi, ábame hábununi; ligíarügüba ladügawagun Heroboamü abunúti. Lugundun hadan sun ladügawagun Heroboamü luágurügüñein ladarira Aburemei murusun katei le auti lagundaara. 14 Lárigiñeme, ábame líchugun aban urúei Ísüraeli, le lunbei lagumuchun hau ladügawagun Heroboamü lidan lidaani. Lúmagiñe guentó, 15 lánhingichaali Aburemei Ísüraeli, kei lánhingichuni léibaagun duna maburu. Láhulubei lídangiñe lubuidun múa le, le líchugubei houn hagüchagu, ábame láguruniña yagürounmeme luéi duna Éufüratesi, ladüga háhuduragun tun tiyawa Asütárüte, agañidagüdei Aburemei lau katei ligía. 16 Lederegerubei Aburemei Ísüraeli luagu burí figóu le ladügübei Heroboamü afigougüdalei Ísüraeli.

17 Ábati tásaarun lúmari Heroboamü, aba tidin, aba tachülürün Tirüsá, kei tachülürün tubenari muna, ítara lounwen irahü. 18 Aba houdin sun Ísüraelina ábunahei, aba hayahun lárigi, kei buga lariñagagüdüni Aburemei lun profeta Aíasi.

19 Le líbiri asusereduti luáguti Heroboamü, wuribu burí le ladügübei, luma sun ida liña lan larúeihan, anihein bürüwañu tidan liliburuna asusereduti hawaguti lurúeitegu Ísüraeli. 20 Wein-biámañein irumu larúeihan Heroboamü, lárigiñe lounwen, aba larúeihan Nadabü le liráü leweñegua.

21 Arúeihati Roboamü le liráü Salomón Hudá. Bián-wein-aban irumu lau dan le lagumeserunbei arúeiha, aba larúeihan disedü irumu Herusalén, uburugu le buga lanúadirubei Aburemei lídangiñe sun haburugute lani Ísüraeli türibu lúbanme liri. Naamá, ligía buga tíribei lúguchu Roboamü, Amonna.

22 Gama lumoun katei le burí ladügübei Roboamü, mabuidunti ligibugiñe Bungiu, aba lagañidagüdüni burí katei ligía Aburemei sügǘ lau sun figóu le buga hadügübei lagüchagu Roboamü; 23 lugundun bunaguatiña giñe burí hatenpulun gibe tubungiutegu, guáriua luma lugudina wewe sagüráuti luagu wübü íñuti luma lábugiñe tídibu wewe hilumatu. 24 Ñéinñanu giñe wügüriña ha adügübalin ahoruhani keisi aban kultu hadan lílana fulasu, adaagua haméi sun luwuyeri iwiyei le meha hadaagubei néchanigu wíyetiña ha meha lasagarubaña Aburemei hagibugiñe Ísüraelina.

25 Lidan liseingün lirumudiri larúeihan Roboamü, aba lábürühan Sisakü le lurúeite Ehiptu luagun Herusalén, 26 aba lanügüni irisini le tídanbei litenpulun Aburemei luma le lúbiñebei urúei. Barǘ lumuti giñe sun idaüdinaü lauti golu le ladügübei Salomón. 27 Aba ladügün urúei Roboamü idaüdinaü lauti buronse leweñegua, aba lígiruni lábugiñe haríaahan hábutigu lúniri tubenari luban urúei. 28 Ságüha lidin urúei ténpulurugu, hanügüni óunigirutiña idaüdinaü, lárigiñe ábayaha híchuguni lárigoun.

29 Le líbiri luáguti Roboamü, luma sun burí katei le ladügübei, anihein bürüwañu tidan liliburuna asusereduti hawaguti lurúeitegu Hudá.

30 Merederaditi hawuribuhan Roboamü luma Heroboamü hámagua. 31 Dan lóunwenbei Roboamü, aba labunún hama lagüchagu luburuguterugu Dawidi. Naamá tíribei lúguchu, Amonna. Aba larúeihan Abiamü le liráü leweñegua.