1 Dan lásurunbei ladügünu Salomón litenpulun Aburemei, lani urúei palasiu luma sun le labusenrubei ladügün, 2 aba lasaliragun Aburemei lun luagu libiaman wéiyaasu, kei buga lasaliragun lun, uburugu Gabaón, 3 aba lariñagun lun:

—Aganba naali bafurieidun luma bayumuragun, ani anúadira naaru ténpulu to badügüboun lúbanme niri. Nóunigiruboun súnwandan ani tídanboun giñe nanigi. 4 Guentoti, ánhabu abagarida nigibugiñe kei buga labagaridun búguchi Dawidi, tau aban anigi harumatu, adügabéime sun le uágubei nariñaga bun, gúnfulibeime nilurudun, 5 nederebudagüdübei barúeihan Ísüraeli lun súnwandan, kei buga füramase nani lun búguchi Dawidi, dan le nariñagunbei lun luagu súnwandan lan harúeihaba lan ladügawagun Ísüraeli. 6 Gama lumoun ánhana hígira huguya hama hirahüñü, lun magunfulirun humá lau nugumadin luma nilurudun, anhaün áhuduragua houn amu búngiugu; 7 náhulubei Ísüraeli lídangiñe múa le níchugubei lun, ábame nágurunu ténpulu to nanúadiruboun, ábame léherahoun lau Ísüraeli haganagua néchanigu súnwandan. 8 Ábame lerederun tárigirugu ténpulu to, súnmeti ha ásügürütiña tubadugiñe ábame taweiridun hanigi, ábame héherahan, hariñagame ka lan uagu ladügei Aburemei katei le lun ageiraü le luma tun ténpulu to. 9 Lariñawagúame houn luagu ladüga lan hígiruni Ísüraelina Aburemei le Habungiute le asagarubaliña hagüchagu Ehiptugiñe aba háhuduragun seriwi hagía houn amu búngiugu; ligía lan lébubei lóunahani Aburemei óunwenbu wuribati le hawagun.

10 Aba lásügürün wein irumu lárigiñe lábunagunu Salomón biángubei muna, litenpulun Aburemei tuma lani urúei palasiu, 11 to unboun líchiga Iramü le lurúeite Tiru fulansu hibúari luma gudi, luma sun golu le labusenrubei lun Salomón, gama lumoun ruti giñe urúei Salomón wein uburugu yarafa lun Galiléa lun urúei Iramü. 12 Gama lumoun dan lídinbei Iramü arihei uburugu burí le líchugubei Salomón lun, magundanti lau, 13 aba lariñagun:

—Kagia luwuyeri uburugu burí le bíchugubei nun níbiri?

Ligía láchubalin fulasu le ñein lubéi burí uburugu ligía, Kabulu, le líribei chülǘ lumoun dan le. 14 Wídüñein-milu-sedü-san-duusu líburu golu lóunahan Iramü lun Salomón.

15 Anihán lébunabei líchigagüdün Salomón wadagimanu lau éregu lun tábunawagun litenpulun Bungiu, luban guánarügü, üma, lubarieirun Herusalén, bóugudin luéi uburugu Asoru, Megidu luma Géserü: 16 Ñǘbuinhali buga urúei Ehiptuna, aba lárügüdüni uburugu Géserü; lárigiñe aba láguduni, aba láfaraguniña sun Kananna ha aganóubaña ñein uburugu, lárigiñe aba ledewehani tun liráü to lúmari Salomón. 17 Ábati lararamagüdüniya Salomón uburugu Géserü, Betü-orón le ǘnabugiñebei, 18 Baalatü luma Tamarü, lidan fulasu mageirawati le lani Hudá. 19 Ráramagüdaya lumuti giñe sun burí uburugu le ñein lubéi lareidaha éigini, le ñein tubéi burí karü, le ñein habéi gürigia ha awarihabaña gabayu, luma sun le laritagubei lábunagun uburugu Herusalén, Líwanurugu luma lidan sun fulasu le lábugiñebei lagumadihan. 20 Ha Amoruna, Étüna, Féresüna, Eweuna hama Hebusuna ha erederubaña fulasurugu, ha mámabaña Ísüraelina, 21 ha hadügawagun, ha erederubaña fulasurugu hárigiñe, ha hásiñarubaña Ísüraelina agumuchaguagüda, aba líchuguniña Salomón adüga wadagimanu hǘrüti, ítara liña habagari chülǘ lumoun dan le. 22 Gama lumoun mafosurunti Salomón ni aban Ísüraelina lun leseriwidun kei idamuni, lubaragiñe lira ábaha heseriwidun kei súdara, kei úfisigu, kei ábutigu, kei gumadan tun burí karü to lánina wuribu luma gumadanme houn gabayuagutiña. 23 Seingü-san-dimiñanu ábutigu ha óunigirubaliña nadagimeintiña.

24 Aba táguyun liráü urúei Ehiptuna luburuguterugugiñe Dawidi tidoun palasiu to ladügagüdüboun Salomón tun. Adüga lumuti giñe üma.

25 Ǘrüwa wéiyaasu lidan irumu líchugun Salomón adagaragüdüni gudawarügüti luma Adagaragüdüni lánina arandaruni luagu latarü le buga ladügübei lun Bungiu, águdaha ligía kupali ligibugiñe Bungiu. Ítara liña lubeiti lagumuchun tábunawagun ténpulu.

26 Adügati giñe urúei Salomón waporu uburugu Esión-géberü, le lubadubei Elatü, laru Barana Funati, lumúanrugu Edomu. 27 Aba lóunahaniña Iramü lani úfisigu, ha subuditi luáguti áfayahani houn, úara hama lani Salomón úfisigu, 28 Aba hachülürün Ofirü, ñéingiñe lubéi hanüga luara darandi-milu-widü-san líburu golu, aba hanügüni lun urúei Salomón.