1 Arúeihati Salomón lidan sun Ísüraeli. 2 Anihán hiri ha awadigimaridubaña lun: Asaríasi, le liráü fádiri Sadoku; 3 Eliorefü luma Aíasi, lirahüñü Sisá, ha abürühabalin sun asusereduti; Hosafátü, le liráü Ailudu, lani urúei abürühati; 4 Benaíasi, le liráü Hoyadá, hábuti súdaragu, Sadoku luma Abiatárü, fádirigu, 5 Asaríasi, le liráü Natán, hábuti ha arihubaña lau sun lumegen urúei; Sabudu, le liráü fádiri Natán, eweridihati urúei, 6 Aisarü, hábuti nadagimeintiña palasiurugu; luma Adonirámü, le liráü Abüdá, ligía arihubei lau wadagimanu fósuarügüti.

7 Dúusuñanu bugaha agumadihatiña líchugun Salomón lidan sun Ísüraeli, hagía burí meha asuturubalin sun le lemegeirubei urúei lun hau sun liduheñu. Kada aban hádangiñe lun leseriwidun aban hati lidan irumu. 8 Anihán hiri duusu ha arihubaña lau lemegeirun urúei:

Ben-uru, lidan luwübüri Éfürain;

9 Ben-dékerü, uburugu Makasi, Saalübímü,

Betü-sémesi, Elón luma Betü-anán;

10 Ben-ésedi, uburugu Aruwótu,

Sokó luma lidan sun ageiraü le Éferü,

11 Ben-abinadábü, lidan sun Doru;

Tafatü to liráü Salomón tuguya lúmariboun;

12 Baaná, le liráü Ailudu, uburugu Taanakü,

Megidu luma sun Betü-seán, le lubadubei Saretán,

ǘnabu luéi Hesüreeli, lúmagiñe Betü-seán darí Aweli-meolá,

yagürounmeme luéi Hokumeámü;

13 Ben-géberü, uburugu Ramotu le lani Galaadü,

ligía arihubei lau lirahüñü aüdü le lóubawagubei Galaadü,

le lani Hairü le liráü Manasési,

luma giñe lóubawagu Arügóbu, le uburugubei Basán,

le ñein lubéi ǘrüwa-wein uburugu wéinamuti

lau lubarieirun luma lidaünda lauti buronse;

14 Ainadábü; le liráü Idó, uburugu Manaímü;

15 Aimaasi le amarieidubei tuma Basemátü to liráü Salomón, uburugu Nefütalí;

16 Baaná, le liráü Usaí, uburugu Aserü luma Alotu;

17 Hosafátü, le liráü Parúa uburugu Isakárü;

18 Simí, le liráü Elá, uburugu Benhamín;

19 Géberü, le liráü Urí, lóubawagu Gadü,

lageira Sihón le harúeite Amoruna,

luma Ogu le lurúeite Basán.

Ñeinñein giñe aban ábuti houn sun agumadihatiña le arihubei lau sun katei lidan sun ageiraü.

20 Gíbetiña meha lirahüñü Ísüraeli luma Hudá kei sagoun le lárubei beya. Ñeinñein meha saragu éigini luma uniñein hama, so gúndaatiñati. 21 Salomón meha agumadihabei lúmagiñe duna Éufüratesi darí hageira Filistéana, darí lumoun fadaguaü luma Ehiptu, sun hagía afayeihatiña seinsu lun urúei Salomón ani rédeitiña lábugiñe lugumadin lidan sun libagari. 22 Ítara liña meha liibe éigini le lúbiñebei Salomón luagu weyu: Sisi-milu-sisi-san líburu fulúaru to tautu türigu; tareisi-milu-bián-san líburu fulúaru to lautu amu luwuyeri ilaü, 23 diisi bágasu wügüriña ha dibunetimatiña, wein bágasu wügüriña ha agüriahóutiña lau híduru, hama san mudún, bóugudin hawéi hawuyerigu usari hama dunuru dibunetiña; 24 ladüga lagumadihañaha Salomón lóubawagu sun oubaü le ñeinhin lubéi lálüda weyu libiti Éufüratesi, lúmagiñe Tífüsagiñe darí Gasa, hóugiñeñein giñe sun urúeigu ha luágubaña oubaü ligía, darangiluhaali giñeha sun ageiraü le geyegubei hau.

25 Sun dan le wínwanñu lubéi Salomón, darangilati habagaridun sun lílana Hudá luma Ísüraeli, lúmagiñe Dángiñe darí Bérüsewa, kada aban ganadüritiña beibei tuma igu. 26 Ñéinñanu bián-wein-milu gabayu luma Salomón lidan lubarieirun lun hachawahan karü, hama duusu-milu súdara lun hawariruniña. 27 Kada aban agumadihati le arihubei lau lemegeirun urúei ru lumuti le lemegeirubei urúei lun hau sun ebeluhatiña lumoun, lidan hati le atokarubei lun, houcha hagíaha lun memegeirun lan ni kata. 28 Sagü lachülürün hadaani, hóunahanu sebada luma sagadi houn gabayu, le ñeinhin lumuti lariñawagúa houn.

29 Ruti Aburemei saragu lichú aau luma lualin ichügü lun Salomón, luma saragu gunfurandaü kei sagoun laru beya, 30 darí lun chu lan lau Salomón sügǘ hau Ehiptuna hama ha luéigiñebaña oubaü le ñéingiñe lubéi laboucha weyu. 31 Chuti bugaha lau sügǘ lau furumiñeguarügü wügüri: Chuti lau sügǘ lau Etán, le ladügawagun Sera, sügǘ lau Emán, Kalikólu luma Darüdá, ha lirahüñü Maolu. Aganbúati luagu lichú lau lidan sun néchani le geyegubei lau. 32 Adügati ǘrüwa-milu ariñawagúni luma milu-seingü poema. 33 Subuseti luáguti tídibu burí wewe lun luma híduru lúmagiñe hibúari le Líwanuna dagá lumoun híduru le áhüchübei tóubawagu muna; subuseti giñe hawaguti animaalugu lun, dunuru, animaalugu ha aduruuharügübaña múarugu hama úduraü. 34 Ñǘbuintiña gürigia lídangiñe sun fulasu le ñein lumuti laganbúa luagu lichú lau Salomón, lun haganbuni.