1 Aba lariñagun profeta Elíasi le Tísübena, le lóubawagubei Galaadü lun Aabü:

—Fiñutina luagu Aburemei le Lubungiute Ísüraeli, le unbei neseriwida, luagu máhuyunbei lan huya lidoun irumu le, mábürühan ligíame serenu, darí namuriahani!

2 Ligíati lariñagunbei Aburemei lun Elíasi:

3 —Beiba yáagiñe luagun oubaü le ñéingiñe lubéi laboucha weyu, baramudaguame lidan liraüraü lidunari Keritü, le luéigiñebei oubaü le ñéingiñe lubéi laboucha weyu libiti Hordán. 4 Gayaraabei batun duna lídangiñe liraüraü duna ñein, rúhadina dimurei houn dunuru lun hanaahan éigini bun.

5 Aba ladügüni Elíasi le lubeibei Aburemei lun, aba lidin, aba lerederun aganawa lubadu liraüraü lidunari Keritü, luéigiñe oubaü le ñéingiñe lubéi laboucha weyu libiti Hordán. 6 Ábaha hanügün dunuru fein luma úi lun, binaafin luma rábounweyu. Latatiha duna lídangiñe liraüraü duna. 7 Gama lumoun átiri weyu lárigiñe, aba lamabeidun liraüraü duna ladüga máhuyun lan huya fulasurugu.

8 Ábati lariñagun Aburemei lun Elíasi:

9 —Saraba, beiba uburugun Sarepüta, lóubawagu Sidón, ábame berederun aganawa ñein. Rúhadina dimurei tun aban würi hilaali túmari lun téigagüdünibu.

10 Aba lásaarun Elíasi aba lidin Sarepüta. Dan lachülürün lubenari uburugu, aba larihin aban würi hilaali túmari abudaha watu. Aba lagúarun tun, lariñaga tun:

—Adügabá fulesei nun, barüba murusun duna nun lidan aban weru lun natun.

11 Dan anungura lan yebe lun tanügüni duna lun, ábaya lagúarun tun, lariñaga tun:

—Adügabá fulesei nun, barüba giñe murusun fein nun.

12 Tariñaga lun:

—Fiñutina bun luagu Aburemei le Bubungiute, luagu ua tan fein héfeeru numa. Murusunrügüñoun fulúaru numa luma murusun garaba, nabudahaña yebe watu guenlé lun nidin ásürahoun lun wéiginu nuguya luma niráü, lárigiñeme ábame wóunwegun walama.

13 Lariñaga Elíasi tun:

—Manufudedabá, beiba adügei le bariñagubei. Gama lumoun adügabá aban tiraüraü durudia nun tau fulúaru to búmaboun, ábame banügünu nun, lárigiñe ábame badügün aban beigan tuma aban leigan biráü. 14 Lugundun ariñagaali Aburemei le Lubungiute Ísüraeli luagu magumuboun lan fulúaru tídangiñe diná, ni garaba lídangiñe fudu darime weyu láhuyagüdüni Bungiu huya.

15 Aba tidin, aba tadügüni le lariñagubei Elíasi tun. Aba geigin tan, tuguya, tiráü luma Elíasi lun saragu weyu. 16 Magumuchuntu fulúaru tídangiñe diná, ni garaba lídangiñe fudu, ítara kei lariñaguni Aburemei liyumulugugiñe Elíasi.

17 Átiri dan lárigiñe, aba lasandirun tiráü würi tuguya, wéiriti lisandi darí lun lachatirun lawaragun. 18 Ábati tariñagun würi tuguya lun Elíasi:

—Ka nadügübei bun lubúein Bungiu? Biábiña san aritaguagüdana luagu nifigoun, luma lun lounwen niráü?

19 Lariñaga tun:

—Rubei biráü nun ñahoun.

Aba lanügüni tuéi lúguchu, aba lamudeirun lau tidoun rumu to híchuguboun lun, lun laganóun ñein, aba larounragüdüni tidan ligabanan. 20 Aba lamuriahan luma Aburemei lau umalali héreti, lariñaga:

—Nabureme Nubungiute, bíchiga giñe san igarigu tun würi to, to úbiñeboun naganawa lau lounwen tiráü?

21 Lárigiñe aba larounrun ǘrüwa wéiyaasu luagu irahü ligía, aba lamuriahan luma Aburemei lau umalali héreti, lariñaga:

—Nabureme Nubungiute, ayumuraguatina bun lun báguyuguagüdüni irahü le!

22 Aba laganbuni Aburemei layumuragun Elíasi, aba láguyuguagüdüni irahü. 23 Aba lanügüni Elíasi irahü, aba lidin ederegerei tun lúguchu, lariñaga tun:

—Anihán biráü, wínwanti!

24 Tariñaga lun:

—Guenlé, chóurutima naali luagu lubúein ban Bungiu, ani linarün lan Aburemei le bariñagubei.