1 Adüga lumutu giñe Salomón lani palasiu, ani barüti tareisi irumu lun lásurunu. 2 Adüga lumutu giñe palasiu to gíriboun «Dabíara Líwanuna» luagu timigifen bián-wein-seingü méturu, wein-biama-dimí luagu tidabuberen, tareisi-dimí tiñun. Ani ágüdahouati lau gádürü fíleiti wagabu le uágubei lemeraagua índanu lauti hibúari. 3 Bián-wein-séingüñein índanu burí ligía, fánreinwañu lidan ǘrüwa sétanu le kéinsiti kada aban, ábatiha lágüdaagun lungua luagu wagabu le lauti dübü. 4 Ñeinñein ǘrüwa fíleiti funedera lidan kada touba muna. 5 Sun bena luma funedera gádürüñein larigei, ani ǘrüwa fíleiti funedera le luéigiñebei kada touba muna gagibugu liña luma le luéigiñebei le aban oubaü. 6 Adüga lumuti giñe lasali le gíribei lani Wagabu Lasali, wein-bián méturu dimí limigifen luagu tareisi méturu dimí lidabuberen. Ligibugiñe lasali ligía anihein ámuya lasali, gawagaburiti gábulugu ligía. 7 Adüga lumutu giñe Lasali lánina aguseruni, lun laguserawagüdün ñein, aba lafurarunu lúmagiñe ǘnabugiñe lun iñun lau fulansu le hibúari.

8 Palasiu to ñein lubéi laganawa Salomón anihein aban bürürü tanagangiñe, luma aban lasali ítarameme ladügǘn. Palasiuti to lábunaguboun tun liráü urúei Ehiptuna to lanügüboun lun lúmarime, anihein aban lasali libe le tuágubei luban tidan. 9 Sun burí ábunaguni le, lúmagiñe tiderebugu muna dagá lumoun tuéndegun lúmagiñe tarihín bóugudigiñe dagá lumoun bürürü wéiriti, lauti dübü gebegiti, aranserúati íbaahoua ligía lau siara según lueirin habusenruni, dandu bóugudigiñe ítara kei múnadagiñe. 10 Lauti giñe dübü gebegiti le wéinamuti tiderebugu, anihein kei gádürü méturu dimí luéinamun le líbiri ǘrüwa méturu luma ǘrüwa-wein sentimeturu. 11 Sun íñugiñe tibiti lauti giñe dübü gebegiti, le íbaahouarügüti según lueirin habusenruni, luma wewe le hibúari. 12 Geyegu lau bürürü wéiriti, ñeinñein ǘrüwa fíleiti dübü luma aban fíleiti wagabu lauti hibúari, ligiaméme lidan bürürü le tigibugiñebei luma lidan lasali le tebelaagüle litenpulun Aburemei.

13 Aba lóunahan urúei Salomón anügei Iramü Tírugiñe, 14 le tiráü aban würi hilaali túmari lídangiñe lani Nefütalí türibu luma aban Tíruna le gawadigimaridaditi buronse. Chubaluguti Iramü chu ligía lau, ani subuseti lun ida luba lan ladügün furumiñeguarügü wadagimanu lau buronse, ítara liña lubeiti aba lan lachülürün ligibugiñe urúei Salomón aba ladügüni sun luadigimari lun. 15 Aba larürüdaguagüdün buronse lun ladügün bián wagabu, le gawaguti widü méturu luagu limigifen luma seingü méturu dimí luagu laru. 16 Adügati biama kapitéli lau buronse lun líchuguni íñugiñe libiti wagabu. Kada aban kapitéli íñuti kei burí biama méturu luma wein-seingü sentimeturu. 17 Adügati giñe bián ayarawaguni ragügü kei hamuga iñari, lun kapitéli le íñugiñebei lun wagabu: Aban ayarawaguni lun kada aban kapitéli. 18 Adügati giñe bián fíleiti güranáda lóugiñe kada ayarawaguni, lun ladouragun lau lani wagabu kapitéli. Ligiaméme ladügübei lau le líbiri kapitéli. 19 Kapitéli le ligibuagubei wagabu le lani lasali le ebelaagülei tidoun ténpulu, migifeti kei burí biama méturu ani ítara liña kei aban liriu. 20 Geyegu luma íñugiñe libiti kada kapitéli, lidan fulasu le garanatimabei luagu, lóubawagu ayarawaguni ñeinñoun bián-san güranáda lidan bián fíleiti. 21 Aba líchuguni Iramü wagabu burí le lidan lasali le ebelaagülei tidoun ténpulu. Dánbeiti le líchuguni lidan lufulasun, aba lagúarun lun wagabu le luéigiñebei lóunwenren, Hakín, lun wagabu le luéigiñebei lubaünan, Bóasi. 22 Fulasu le íñugiñebei libiti wagabu ítara liña kei liriu. Ítara liña lubeiti lásurun ladügǘniwa wagabu.

23 Lárigiñe aba ladügün Iramü aban óunwenbu ágeidinaü lauti buronse, lun duna. Róunuti ani weiri ligía, gádürü méturu dimí luéigiñe aban árurugu lun luagun le aban, biama méturu luma wein-seingü sentimeturu liñun, tareisi méturu dimí lítulen. 24 Adügati bián fíleiti tau tin wewe lautu buronse, diisi in lautu buronse lidan kada bián-wein-seingü sentimeturu lábugiñegiñe árurugu geyegu lau ágeidinaü, adügeina ítara lun ábanmemebei lan úgubu luma ágeidinaü. 25 Hawagu duusu bágasu wügüriña láutiña buronse lemeraagua ágeidinaü ligía, ǘrüwa hádangiñe ariha nóruterugun, ǘrüwa súrurugun, ǘrüwa ariha luagun oubaü le ñéingiñe lubéi laboucha weyu, ǘrüwa le ñeinhin lubéi lálüda weyu; múnadounñein hagudi bágasu hagía le hanagangiñebei, le uágubei lemeraagua ágeidinaü. 26 Wídüñein sentimeturu liduru louba ágeidinaü ligía, ítara liña lárurugu kei lárurugu aban kopu. Ani kaweti bián-wein-gádürü-milu líturu duna lidan.

27 Adügati giñe diisi ebu lauti buronse, kada aban, aban méturu luma widü sentimeturu limigifen, ítara lidabuberen luma aban méturu darandi-seingü sentimeturu liñun. 28 Ítara liña ladügǘniwa ebu: Barüti fiu afuraruni lauti fulansu, le burí ichugúbei lidan aban máruku. 29 Ligibuagu buriti fulansu agiwerihatiña hayawa liñún, bágasu wügüriña hama kátaña garünatiña. Hóugiñe luma hábugiñegiñe liñún hama bágasu wügüriña agiwerihatiña fuluri lun uéndenime. 30 Kada ebu anihein gádürü ubalabaü lauti buronse luagu, labu giñe lebu ubalabaü le lauti buronse. Lidan gádürü larigei ebu, lábugiñegiñe ágeidinaü anihein aban ugudi lauti buronse le burí anügübei fuluri luéigiñe kada oubaü. 31 Lurageiruguñein aban ayarawaguni liyuma ágeidinaü le áfuridubei bián-wein-seingü sentimeturu lun iñun. Róunuti liyuma, ani le ágüdahabalin ǘrüwa-wein-wídüñein sentimeturu liñun. Anihein giñe dibuhu ligibuagu liyuma, le gádürübei larigei lumarukun. 32 Gádürügubei tubalaba lábugiñeñein fulansu, sun lebu ubalabaü ragüñu liña luéigiñe ebu. Kada ubalabaü íñuti kei burí ǘrüwa-wein-widü sentimeturu, 33 ítara liña lesetirun kei tubalaba karü. Lébuti ubalabaü, árurugu, rayu, luma lebu rayu lauti buronse súngubei. 34 Gádürügubei ágüdaagülei le lídanbei gádürü larigei kada ebu, ábanmeme úgubu. 35 Fulasu le íñugiñebei libiti aba lásurun lau aban árugu róunuti lau wein-bián sentimeturu dimí liñun, Ábanmeme úgubu ladügüni fulansu luma máruku le íñugiñebei libiti ebu. 36 Aba lagiwerirun Iramü kátaña, liñún luma tídibu fáluma ligibuagu fulansu luma máruku, según luéinamun ubaraü le gayara lumuti hagiwerihóun ñein, luma burí fuluri geyegua lau. 37 Ítara liña lubéi ladügüni díisigubei ebu, aban labu ladügǘniwa súngubei, ligiaméme giñe ligaburi luma luéinamun.

38 Adügati giñe diisi ágeidinaü lauti buronse, kada aban lídangiñe wéiriti kei burí aban méturu luma gádürü-wein sentimeturu, le gayaraati lárügüdün widü-san-gádürü-wein líturu, kada aban aba lichugún ligibuagu aban lídangiñe diisi ebu, 39 Seingü ebu luagun tóunwenren ténpulu, luma seingü luéigiñe tubaünan. Ágeidinaü le wéiribei aba lichugún luagu lóubadina tóunwenren ténpulu luagun suedi.

40 Adügati giñe Iramü sóudieru, chóbuli, luma kopu wéinamuti; ítara liña lásuruni sun wadagimanu le ladügübei lun Salomón tun litenpulun Aburemei, 41 Anihán burí le ladügübei: Bián wagabu, kapitéli róunuti le íñugiñebei libiti, biámagubei ayarawaguni lun ladourun lau kapitéli, 42 gádürü-san güranáda lun biámagubei ayarawaguni, lidan bián fíleiti lun kada aban ayarawaguni, le aubei ladourawagúa lau bián kapitéli le róunubei le íñugiñebei libiti wagabu. 43 Diisi ebu luma diisi ágeidinaü le ñǘdünbei ligibuagu, 44 ágeidinaü le wéiribei lun duna hama duusu bágasu ha ágüdahabalin, 45 bóugudin luéi sóudieru, chóbuli luma kopu wéinamuti.

Sun ílagu le ladügübei Iramü lun Salomón tun litenpulun Aburemei, lauti buronse fínuti. 46 Aba lóunahan urúei adaagüdei sun katei le, labadinagua Sukotu luma Saretán lidan liwayatin Hordán. 47 Gíbeti ílagu lauti buronse, darí lun máhüchürün lan Salomón luagu lamisurahóuniwa lihürü.

48 Óunahati giñe Salomón adaagüdei sun líbiri ílagu le tídanbei litenpulun Aburemei: Latarü lauti golu, dábula lauti golu le uágubei tichugúa fein to anuadirúboun lun Aburemei, 49 lebu sanudelu lauti golu le ligibugiñebei Fulasu Sándutimati, seingü luéigiñe lóunwenren seingü luéigiñe lubaünan, labu burí fuluri agiwerihóuti luagu, lanpu, tuma tenasa lautu golu, 50 kopu, isiresi lun líbaahouniwa limechan lanpu, kopu wéinamuti, guliyeru wéinamuti, ágeidinaü lun kupali labu leñegura watu, súngubei lauti golu, lauti giñe golu ladibiha bena le luágubei lubenari Fulasu Sándutimati turageirugu ténpulu, luma le luágubei tubenari ténpulu.

51 Danbei le lásurun sun wadagimanu le lóunahabei urúei Salomón adaagüda tidan litenpulun Aburemei, aba lanügüni Salomón sun ílagu le láutibei golu luma pülata le líchugubei Dawidi, le lúguchi lun Aburemei, luma lareidaagüle tirisin litenpulun Aburemei.