1 Lárigiñe lounwen Aabü, aba liñuragun Moabü lungua luagun Ísüraeli. 2 Ánheinti buga Okosíasi, aba léiguadun lídangiñe tufunederan aban rumu íñutu to tídanboun luban to uburuguboun Samaria aba labuleseirun. Ábati lóunahan álügüdaha luma Baali-sebubu le lubungiute Ekürón anhein lareidaguba lubéi lumoun mareidagunbei lan, 3 gama lumoun aba lariñagun lani Bungiu ánheli lun Elíasi, le Tísübena: «Beiba habaroun lóunagülegu lurúeite Samaria, bálügüdañame anhein ua lubéi Bungiu uburugu Ísüraeli, hóudinbei álügüdaha luma Baali-sebubu le lubungiute Ekürón. 4 Bariñagame giñe houn luagu nariñahare lan lun Okosíasi, au le Aburemei: "Másaarunhadibu gabanarugugiñe, ladüga bounwe lan". »

Aba lidin Elíasi, aba ladügüni ítara. 5 Dan hayabinbei lóunagülegu urúei lumoun, lariñaga houn:

—Ka uagu hagiribudunbei?

6 Hariñaga lun:

—Ladüga wadunragun luma aban wügüri, aba lariñagun woun lun wagiribudun lumoun urúei le óunahabaliwa, aba lanme wariñagun lun: "Lariñahare Wabureme: Úati funagia Bungiu uburugu Ísüraeli, bóunahanbei álügüdaha luma Baali-sebubu le lubungiute Ekürón? Ladüga badügüni katei le, másaarunhadibu gabanarugugiñe, bounwe".

7 Lariñaga urúei houn:

—Ida liñagia wügüri ligía le úmabei hadunragua, le ariñagubalin katei le hun?

8 Hariñaga lun:

—Aba wügüri tau aban kapa háyutu luma aban béliti gueru liranaagua luáguboun.

Aba lariñagun urúei:

—Elíasi le Tísübena!

9 Aba lóunahan urúei aban hábuti súdaragu hau dimí-san súdara luagu Elíasi. Dan hachülürünbei, ñun liña Elíasi lábulugu aban wübü. Ábati lariñagun hábuti súdaragu lun Elíasi:

—Profeta, lariñahare urúei lun nege bararirun!

10 Lariñaga Elíasi lun:

—Anhein profeta lubéi au, rarila watu gemeti siélugiñe lun lagumuchaguagüdünibu hau sun dimí-san bisudaranigu.

Aba lábürühan watu gemeti siélugiñe lidan oura ligía, aba lagumuchaguagüdüniña.

11 Ábaya lóunahan urúei ábanya hábuti súdara hau dimí-san súdara, aba lidin aba lariñagun lun Elíasi:

—Profeta, lariñahare urúei lun nege bararirun óufuda!

12 Lariñaga Elíasi lun:

—Anhein profeta lubéi au, rarila watu gemeti siélugiñe lun lagumuchun bau hau sun bisudaranigu.

Aba lábürühan watu gemeti siélugiñe lidan oura ligía, aba láguduniña.

13 Ábaya lóunahan urúei luagu lǘrüwan wéiyaasu ábanya hábuti súdaragu hauya dimí-san súdaragu. Gama lumoun le lǘrüwan hábuti súdaragu, aba lamudeirun le ñeinhin lubéi Elíasi, aba láhuduragun ligibugiñe, aba layumuragun lun, lariñaga:

—Fuleseibá nun, profeta, inebelá nibagari luma habagari dimí-san bubueingu ha bun; 14 lugundun ábürühaali watu gemeti siélugiñe, aba láguduniña biama hábutigu súdaragu hau sun hasudaranigu. Ayumuraguatina bun lun gudemehabu ban nun.

15 Ábati lariñagun lani Wabureme ánheli lun Elíasi:

—Beiba luma, manufudedabá luéi.

Aba lararirun Elíasi, aba lidin luma hábuti súdaragu arihei urúei, 16 aba lariñagun lun:

—Lariñahare Wabureme: "Ladüga bóunahan álügüdaha luma Baali-sebubu le lubungiute Ekürón kamá hamuga úati Bungiu uburugu Ísüraeli, másaarunhadibu gabanarugugiñe, bounwe".

17 Ani ítara liña lasuseredun, aba lounwen Okosíasi, kei lariñaguni Wabureme liyumulugugiñe Elíasi. Keiti marahüñü lubéi Okosíasi, aba larúeihan Horamü le lamulen leweñegua. Lidan libiaman lirumudiri larúeihan Horamü le liráü Hosafátü Hudá, lasusereda lira.

18 Le líbiri asusereduti luagu Okosíasi luma burí katei le ladügübei, anihein bürüwañu tidan haliburun urúeigu le ñein lubéi labürühóua sun le asuseredubei.