1 Luagu aban weyu, aba hariñagun profetagu lun Eliséu:

—Lóuguayati fulasu le ñein lubéi waganawa buma woun. 2 Ígirabawa lun woudin lidan duna Hordán lun wanügün kada aban wádangiñe aban lugudina wewe lun wadügün aban fulasu ñein lun waganóun.

Lariñaga Eliséu houn:

—Heiba.

3 Lariñaga aban hádangiñe lun:

—Fuleseihabubá woun: Keimoun wama.

Lariñaga houn:

—Magadiñeti, nídiba huma.

4 Aba lidin hama chülǘ Hordán, aba hagumeserun áchuaha wewe. 5 Dan le láchugun aban hádangiñe tugudina aban wewe, aba téiguadun larawan dúnarugun. Ábati lagúaragun ariñaga:

—Máisturu, furedeirügü numutu harawa to!

6 Aba lariñagun profeta lun:

—Halía tadagara?

Aba larufuduni lun halía lan tadagara. Ábati láchugun Eliséu murusun wewe, aba lígiragüdüni le ñeinhin lubéi tadagara harawa, aba láfayaragüdünu harawa.

7 Lariñaga Eliséu lun:

—Budaboun.

Aba línchuni wügüri ligía lúhabu, aba labudunu harawa.

8 Lawuribuhaña lurúeite Siria luma Ísüraeli, lídanti óundaraguni le ladügübei hama lánigu, aba lariñaguni houn halíaba lan fulasu híchigoun hakianpun. 9 Ábati lóunahan Eliséu ariñaga lun lurúeite Ísüraeli, lun louchun lun másügürün lan lídangiñe fulasu ligía, ladüga añangüra lan buga Síriana ñeinhin. 10 Aba lubeiti lóunahaniña lurúeite Ísüraeli lisudaranigu lidoun fulasu le líridubei profeta lun dan le leweridirunbalin, ítara liña hesefurun saragu wéiyaasu.

11 Ábati lagibedun laritagun lurúeite Siria ladüga katei le, aba lagúarun houn lánigu aba lariñagun houn:

—Ariñaga huméi nun ka lan hádangiñe wánigu lúmagiñebei lurúeite Ísüraeli!

12 Aba lóunabun aban hádangiñe:

—Ni aban wádangiñe nurúeite. Gama lumoun Eliséu, profeta le Ísüraelibei, subudigüda lumuti sun le bariñagubei íbini birumunrugu lun lurúeite Ísüraeli.

13 Ábati lariñagun lurúeite Siria:

—Áluga humá hasubudiruni halíañein lan, óunaha náamuga wügüriña árügüdei. Dan hariñagunbei lun luagu anihein lan Dotán, 14 aba lóunahan saragu súdaragu ha hawagutiña gabayu tuma karü to lánina wuribu hama saragu súdaragu eibu, aba hachülürün uburugun Dotán áriebu, aba hegeyedaguni uburugu. 15 Larugan binaafin, aba lásaarun lubúein Eliséu, dan láfuridunbei, ligía larihiniña súdaragu hagía geyegua hamá lan uburugu hau gabayu tuma karü lánina wuribu; ábati lidin ariñaga lun Eliséu:

—Kábagia wadüga guentó, máisturu?

16 Lariñaga Eliséu lun:

—Manufudedabá, ladüga gíbetimatiña ha wámagiñebaña sügǘ hau ha hámagiñebaña.

17 Aba lafurieidun Eliséu lun Bungiu, lariñaga:

—Ayumuraguatina bun Nabureme, lun béfegechuni lagu lun larihin

Ábati léfegechuni Bungiu lagu lubúein Eliséu, aba larihin saragu gürigia hawagutiña gabayu tuma karü lautu watu gemeti geyegu lau Eliséu.

18 Dan le hábürüha lubéi yebe Síriana luagun Eliséu, aba layumuragun lun Bungiu, lariñaga:

—Amuriahatina buma lun bígiruniña gürigia ha marihinga.

Aba ladügüni Bungiu kei lamuriahani Eliséu luma. 19 Ábati lariñagun Eliséu houn:

—Mama anihán ǘmabei, mama giñe uburugu le háluahabei le. Falá humana, nanügaadün lumoun wügüri le háluahabei.

Aba lanügüniña uburugun Samaria. 20 Hachülürünbei ñein, aba lafurieidun Eliséu, lariñaga:

—Guentoti Bungiu, fegebei hagu lun gayara lan harihin.

Aba harihini luagu lurageiruguñanu lan Samaria. 21 Danti larihiniña lurúeite Ísüraeli, aba lariñagun lun Eliséu:

—Áfaraguanaña san núguchi?

22 Lariñaga Eliséu lun:

—Ua, máfaraguabaña. Héchutibu funagia áfaraguaña ha banügün adaüra tau befeinte tuma bigimaran? Ruba éigini houn lun heigin luma lun hatun, lárigiñeme ábame báguyugüdüniña lun habureme.

23 Ábati ladügün aban óunwenbu fedu houn, aba heigin, gurá hagía. Lárigiñe aba lóunahaniña urúei lun habureme. Lúmagiñe dan ligía, mebeluhaña Síriana hamúanrugun Ísüraelina.

24 Lárigiñe, aba lóundaruniña Ben-adadü le lurúeite Siria lisudaranigu, aba hegeyedaguni Samaria lun hábürühan luagun. 25 Ábati ñein lan saragu ilamaü Samaria, ladüga hanarimeti hegeyedaguni lisudaranigu Ben-adadü; darí lun lalugurun aban lichügü mile luagu gádürü-wein murusun pülata, aban guada líturu hádiga unhun luagu seingü murusun pülata.

26 Luagu aban weyu dan lásügürün urúei luéigiñe baríeiru aba tagúaragun aban würi ariñaga lun:

—Uruei, íderaguabana!

27 Lariñaga urúei tun:

—Anhein míderagun lubalibu Bungiu, ida liñati babusenrubei níderagunibu? Gayaraati funagia níchugun türigu o diwéin bun? 28 Kagia suserebei bun?

Tariñaga lun:

—Aba tariñagun hiñaru to nun lun níchuguni niráü lun wéigini, larugan lanme, aba lanme wéigini tiráü. 29 Ábati wagisaruni niráü, aba wéigini. Larugan aba nariñagun tun lun tíchuguni tiráü lun wéigini, aba taramuduni.

30 Dan laganbunbalin urúei katei le, aba laheiridagunu ladaüragun luougua arufudei ligarigu. Keiti luáguñein lubéi baríeiru, aba harihini gürigia luagu tauñein lan daüguaü lánina igarigu. 31 Ábati lariñagun urúei:

—Béilana Bungiu here, anhein madürü nan lichügü Eliséu le liráü Safatü uguñe!

32 Ñeinñein Eliséu lúbiñe ñun hama ábutigu. Óunahaaliti buga urúei aban hádangiñe luwügüriñanigu lumoun Eliséu. Gama lumoun lubaragiñebei lachülürün lóunagüle urúei, aba lariñagun Eliséu houn ábutigu:

—Ariha humá lóunahan gáfarahati le adürürei nichügü. Gama lumoun aganba humana, danme liabin lóunagüle, ábame hadouruni bena, mígira humá lun lebelurun, anitebei labureme lárigi.

33 Ñéingili adimureha hama, ligía lachülürün óunagülei lumoun Eliséu, aba lariñagun lun:

—Kei lóunahan lubéi Bungiu lamiselu le wawagun, kábagia amu katei naguraba lúmagiñe?