1 Lidan libiaman lirumudiri larúeihan Hoasi, le liráü Hoakasi le lurúeite Ísüraeli, ligía lagumeserun Amasíasi le liráü Hoasi arúeiha Hudá. 2 Wein-seingü irumu lau Amasíasi dan le lagumeserunbei arúeiha, aba larúeihan luagu wein-nefu irumu Herusalén. Hoadán tíribei lúguchu, Herusalénna. 3 Buiti ligaburi Amasíasi ligibugiñe Bungiu, gama lumoun mama saragu kei bugaha Dawidi. Adüga lumuti lememe ladügübei Hoasi le lúguchi, 4 ani magidarúntu burí hatenpulun gibe tubungiutegu to burí ídanmemeboun adagaragüda gürigia águdaha hagía kupali.

5 Dan le lederaaguagüdünbei Amasíasi lidan arúeihani, aba láfaraguniña sun úfisigu ha buga áfarubalin lúguchi. 6 Gama lumoun máfaragun lumutiña hasaanigu, lugundun lariñahare Bungiu tidan lilurudun Moisesi: «Masiadirúnbaña agübürigu lun hounwen luéigiñe le hadügübei hasaanigu ni isaanigu luéigiñe le hadügübei hagübürigu. Lóunweba kada aban luéigiñe lifigoun».

7 Amasíasi ligía áfaragubei diisi-milu Edomuna lidan fulasu wayati le lani Salu, aba lagañeiruni uburugu Selá, aba líchuguni Hokuteeli lírime uburugu ligía, ligíati líribei chülǘ lumoun dan le.

8 Lárigiñe katei le, aba lóunahan Amasíasi ariñaga lun Hoasi, le liráü Hoakasi, libari Heú, le lurúeite Ísüraeli:

—Ñǘbuinba aríagua wamaamuga woungua.

9 Aba lóunahan Hoasi ariñaga lun:

—Aba lóunahan hiiyu ariñaga lun hibúari Líwanuna: "Ruboun biráü lun niráü lúmarime". Gama lumoun aba lásügürün aban animaalu gáñiti ñéingiñe, aba ladügüraguni animaalu ligía hiiyu. 10 Gasu nánharun luagu gáñeibani wuribu hawagu Edomuna, ani barügua ban bungua luagu lira. Magadiñeti, gayaraati banaagun bungua; gama lumoun buítimati lun berederun búbiñe. Ka uagu báluaha lamiselu bungua luma lun Hudá?

11 Gama lumoun madügünti Amasíasi gasu lau. Ábati liabin Hoasi lun lagagibudagun luma Amasíasi lidan fulasu le gíribei Betü-sémesi, le lumúanrugubei Hudá. 12 Aba lagañeiruni Ísüraeli wuribu luagu Hudá, aba héibaagun kada aban hábiñoun. 13 Aba ladaürüni Hoasi le lurúeite Ísüraeli Amasíasi uburugu Betü-sémesi, lárigiñe aba lidin Herusalén, aba ladaarun aban hunrenti lóubawagu ayarawaguni le lauti dübü san-gádürü-wein méturu limigifen, lúmagiñe luéigiñe lubenari Éfürain darí lumoun Lubenari Kaaná. 14 Aba giñe lanügüni sun golu luma pülata luma sun ílagu le tídanbei litenpulun Wabureme luma le tídanbei luban urúei. Lárigiñe lanügün fiu gürigia réume, aba lagiribudun Samarioun.

15 Le líbiri asusereduti lun Hoasi, luma katei le burí ladügübei, luma luáguti lawuribuhan luma Amasíasi le lurúeite Hudá, anihein bürüwañu tidan liliburuna asusereduti hawagu lurúeitegu Ísüraeli. 16 Aba lounwen Hoasi, aba labunún Samaria hama lurúeitegu Ísüraeli. Aba larúeihan Heroboamü le liráü leweñegua.

17 Wínwanti Amasíasi, le liráü Hoasi le lurúeite Hudá keinsi irumu lárigiñe lounwen Hoasi le liráü Hoakasi, le lurúeite Ísüraeli. 18 Le líbiri asusereduti lun Amasíasi, anihein bürüwañu tidan liliburuna asusereduti hawagu lurúeitegu Hudá. 19 Eledewaguaali buga lubá Amasíasi uburugu Herusalén, aba lanurahan uburugun Lákisi; gama lumoun aba héibaahani chülǘ uburugu ligía, aba háfaruni ñein. 20 Lárigiñe aba hanügüni Herusaléun luagu aba gabayu, aba hábununi ñein hama lagüchagu luburuguterugu Dawidi. 21 Ábati hanügüni sun lílana Hudá Asaríasi, aba híchuguni urúeime leweñegua Amasíasi le lúguchi. Disisi irumu lau Asaríasi lidan dan ligía, 22 ligía araramagüdüyabalin uburugu Elatü, lárigiñe lounwen lúguchi, ábaya libihini lárigoun lun Hudá.

23 Lidan likeinsin lirumudiri larúeihan Amasíasi, le liráü Hoasi, le lurúeite Hudá, ligía lagumeserun Heroboamü, le liráü Hoasi le lurúeite Ísüraeli arúeiha Ísüraeli, aba larúeihan bián-wein-aban irumu Samaria. 24 Mabuidunti ligaburi ligibugiñe Bungiu, madireirúnti luéi ni aban lídangiñe figóu le aubei buga lafigougüdaña Heroboamü le liráü Nabatü Ísüraelina.

25 Ábaya lagiribudagüdüni Heroboamü láfadaragun burí Ísüraeli lidoun lubara, lúmagiñe lubenari Amatü, darí lumoun barana Arawá, ítara kei buga lariñaguni Bungiu le Lubungiute Ísüraeli lídangiñe Honasi, le liráü Amitái, profeta Gatü-éferüna. 26 Luagu larihini Bungiu lanarime lasufurirun Ísüraeli, le ídangiñebei mesefurun lan ni aban, luma luagu míderawagun lan Ísüraeli. 27 Ábati lesefuruniña Wabureme luéigiñe Heroboamü, le liráü Hoasi, lugundun maritagungili buga lagumuchaguagüdüni Ísüraeli ubouagugiñe.

28 Le líbiri asusereduti lun Heroboamü luma sun burí katei le buga ladügübei, luma burí luwuribun, luma ligaburi libihini uburugu Damasüku luma Amatü lárigoun lun Ísüraeli, anihein bürüwañu tidan liliburuna asusereduti hawagu lurúeitegu Ísüraeli. 29 Aba lounwen Heroboamü, aba labunún haganagua lurúeitegu Ísüraeli. Lárigiñe aba larúeihan Sakaríasi le liráü leweñegua.