1 Ñéinñanu ǘrüwa-wein-diisi lirahüñü Aabü uburugu Samaria, aba lubeiti labürühan Heú gárada houn agumadihatiña uburugu, houn ábutigu luma houn hóuniri lirahüñü Aabü, lariñaga houn tidan gárada: 2 «Kei añahein lubéi lirahüñü habureme huma, dandu ligabayun tuma likarün lánina wuribu, luburugute le burí gabarieirunbei tuma lárumate, danme tachülürün gárada to humoun, 3 hanúadireime le buídutimabei, le úaraguatimabei hádangiñe lirahüñü habureme, ábame híchuguni luagu lálana larúeihan lúguchi, hageindaguame tuagu luban habureme».

4 Aba hanufudedagun, aba hariñagun:

—Anhein siñagua habéi bián urúeigu houngua luma, gúbume wagía.

5 Ábati lóunahan óunigiruti palasiu luma agumadihati uburugu, hama wéiyaaña mutu hama hóuniri lirahüñü Aabü ariñaga lun Heú: «Lábugiñeñadiwa bugumadin, ani wadügübei sun le bariñagun woun, gama lumoun míchugunbadiwa ni aban urúeime. Adügabéi le uágubei baritagua luagu buídutima lan».

6 Aba labürühan Heú houn luagu libiaman wéiyaasu, lariñaga houn: «Anhein númagiñeñadün lubéi ani busén huguya hadügüni le nubeibei, barǘ huméi hábulugu ǘrüwa-wein-diisi lirahüñü Aabü, ábame hiabin arihana haruga kei oura le Hesüreeli».

Hámañanu gürigia wéirigutiña ǘrüwa-wein-diisi lirahüñü Aabü hagía, gürigia hagía agüriahabaliña, 7 dan lubeiti heresibirunbarun gárada, aba hanügüniña ǘrüwa-wein-diisi lirahüñü Aabü hagía, aba hadürürüni hachügü; aba híchuguni sun ichügü ligía lidoun aban faniñe, aba hóunahani uburugun Hesüreeli. 8 Dan lachülürünbei óunagülei, aba lariñagun lun Heú:

—Chülühaña lau hachügü lirahüñü urúei.

Lariñaga Heú:

—Adüga humá bián fánreinti hau, híchigeime lubenari uburugu, hígireime ñein darí haruga.

9 Larugan aba láfuridun Heú, aba lararamun, aba lariñagun houn sun lílana fulasu:

—Huguya, maduruntün. Au eledegubei lubá nabureme, aba náfaruni, gama lumoun, kagia áfaragubaliña sun ha? 10 Subudi huméi buidu luagu lagunfuliruba lan sun le lariñagubei Bungiu hawagu liduheñu Aabü. Adüga laali Bungiu guánarügü le buga lariñagubei lídangiñe Elíasi le lubúein.

11 Aba láfaraguniña Heú híbiri liduheñu Aabü uburugu Hesüreeli, sun luwügüriñanigu wéirigutiña, lumadagu, hama lufadirinigu. Mígirunti ni aban wínwanñu.

12 Ñéingiñe aba lidin uburugu Samaria, ǘmadarugu, aba lachülürün Betü-ekedi le ñein habéi hóuniri mudún, 13 ñein ladariraña líbirigu Okosíasi le lurúeite Hudá. Aba lariñagun Heú houn:

—Kataün?

Hariñaga lun:

—Líbirigu Okosíasi wagía, wayabiña arihaña lirahüñü urúei hama tirahüñü urúei.

14 Ábati lariñagun Heú houn lánigu:

—Ragǘ humaña wínwanñu.

Aba hárügüdüniña wínwanñu, aba hadürürüni hachügü lurugabu lufusun Betü-ekedi le hani hóuniri mudún. Bián-wein-biámañanu wügüriña, mígiruntiña ni aban hádangiñe wínwanñu.

15 Dan lidin Heú ñéingiñe, aba ladunragun luma Honadábü le liráü Rekabü, lídiña arihei. Aba labusurun Heú lun, aba lariñagun lun:

—Buiti baritagun nubá kei buidu lan naritagun bubá?

Lariñaga Honadábü lun:

—Ítara liña.

Lariñaga Heú lun:

—Anhein ítara liña lubéi, rubei búhabu nun.

Aba líchuguni Honadábü lúhabu lun, aba lawariragüdüni Heú tidoun karü, 16 lariñaga lun:

—Keimoun numa, ariha báamugei nemeidin lau Bungiu.

Ábati lanügüni tidan likarün. 17 Dan hebelurun Samarioun, aba láfaraguniña Heú sun ladügawagun Aabü ha buga wínwangiñabaña. Gumuguagüda lumutiña sunsuinagubei kei buga lariñaguni Bungiu lun Elíasi.

18 Lárigiñe aba lóundaruniña Heú sun lílana fulasu, aba lariñagun houn:

—Seriwiti meha Aabü lun Baali murusun, ánheinti au, neseriwiduba lun saragu. 19 Wa humá lubeiti houn sun lani Baali profetagu, ha áhuduragubaña lun, hama lufadirinigu memegeiralá ni aban, lugundun aransedina aban óunwenbu adagaragüdüni lidan liri Baali. Le miábinti, lasiadirúba.

Ladügünbalin Heú lira, lun láfaraguniña lánigu Baali; 20 ligía líchugunbei dimurei lun ladügün aban fedu lun Baali, aba ladügün ítara. 21 Lárigiñe aba lóunahani uganu lidoun sun Ísüraeli, aba hayabin sun lánigu Baali ténpulurugun. Memegeirunti ni aban hádangiñe, aba tabuinchun litenpulun Baali. 22 Ábati lariñagun Heú lun le arihubei tau tagei daüguaü lun lasagarun daüguaü to lánina fedu houn sun lánigu Baali, aba ladügüni ítara. 23 Lárigiñe aba lebelurun Heú luma Honadábü tidoun litenpulun Baali, aba lariñagun Heú houn lánigu Baali:

—Ariha humá lun ua lan ni aban hádangiñe lánigu Bungiu hidan, haweidigia lánigu Baali.

24 Lánigurügüñanu Baali ebelura ténpulurugun lun hadagaragüdün. Ábati líchugun Heú gádürü-wein wügüriña bóugudi, aba lariñagun houn:

—Le ígiruti lun lesefurun aba hádangiñe wügüriña ha níchugubaña húhaburugun, lafayeiruba luagu lau libagari.

25 Dan lásurun ladagaragüdün Heú aba lariñagun houn súdara hama úfisigu:

—Belú humá, áfaragua humaña! Mesefuralá ni aban!

Aba háfaraguniña lánigu Heú tau eféin, lárigiñe aba hachagaruniña ñéingiñe. Ábati hebelurun tidoun lani Baali sanduariu, 26 aba hasagaruniña guáriuagu, aba háguduniña. 27 Fui hamuti giñe latarü tuma lani Baali ténpulu, aba lerederun lágeime ifei darí lumoun dan le.

28 Ítara liña lagumuchaguagüdüni Heú Baali Ísüraeligiñe. 29 Lau sun lira mígirun lumuti Heú figóu burí le buga aubei lafigougüdaña Heroboamü le liráü Nabatü Ísüraelina, rédeimemeti áhuduragua houn hayawa bágasu golu ha uburugubaña Dan luma Beteli.

30 Aba lariñagun Bungiu lun Heú:

—Kei buidu lubéi le badügübei, gúndaatina lau, lugundun úaraguati, ani adüga baali le nabusenrubei hau liduheñu Aabü, harúeihaba badügawagun darí lumoun ligadürün inebanfani.

31 Lau sun lira, máfaagunti Heú lun lagunfuliruni lilurudun Bungiu le Lubungiute Ísüraeli lidan lubudubu, mígirun lumuti figóu le buga aubei lafigougüdaña Heroboamü Ísüraelina.

32 Lidoun dan ligía, aba lagumeserun Bungiu agidaha lídangiñe hamúan Ísüraelina. Aba lawuribuhan Asaeli hama Ísüraelina luéigiñe sun fadaguaü: 33 Lúmagiñe luéigiñe oubaü le ñéingiñe lubéi laboucha weyu libiti Hordán, sun lóubawagu Galaadü, Gadü, Rubén luma Manasési, luma lúmagiñe Aroerü le lubadubei duna Arünón lau sun Galaadü luma Basán.

34 Le líbiri asusereduti lun Heú, luma burí katei le buga ladügübei, anihein bürüwañu tidan liliburuna asusereduti hawagu lurúeitegu Ísüraeli. 35 Aba lounwen, aba hábununi uburugu Samaria, aba larúeihan Hoakasi, le liráü leweñegua. 36 Arúeihati Heú wein-seingü irumu Ísüraeli uburugu Samaria.