1 Dan lachülürünbei dan lun lanügüni Wabureme Elíasi sielun lidan aban hiriri, láfuriduña Elíasi luma Eliséu Gilügáligiñe. 2 Aba lariñagun Elíasi lun Eliséu:

—Rédeiba ya, lugundun lóunahañadina Wabungiute Beteli.

Lariñaga Eliséu lun:

—Fiñutina luagu Wabureme luma buagu guánarügü luagu mígirun nubadibu lan bábugua.

Ábati houdin Beteli úara. 3 Aba háfuridun profetagu ha aganóubaña Beteli lubaroun Eliséu, hariñaga lun:

—Subuditi san bun luagu lanügaali lan Wabureme bumaisturun buéi uguñe?

Lariñaga Eliséu houn:

—Anha, subuditi nun, gama lumoun maní humá.

4 Lárigiñe aba lariñagun Elíasi lun Eliséu:

—Rédeiba ya, lugundun lóunahañadina Wabureme Herikó.

Lariñaga Eliséu lun:

—Fiñutina luagu Wabureme luma buagu guánarügü luagu mígirun nubadibu lan bábugua.

Ábati houdin Herikó úara. 5 Aba háfuridun profetagu ha aganóubaña Herikó lubaroun Eliséu, aba hariñagun lun:

—Subuditi san bun luagu lanügaali lan Bungiu bumaisturun buéi uguñe?

Lariñaga Eliséu houn:

—Anha subuditi nun, gama lumoun maní humá.

6 Aba lariñagun Elíasi lun:

—Rédeiba ya, lugundun lóunahañadina Bungiu Hordán.

Lariñaga Eliséu lun:

—Fiñutina luagu Wabureme luma buagu guánarügü, luagu mígirun nubadibu lan bábugua.

Ábati houdin hagía biángubei. 7 Aba hayabin dimí-san profetagu, aba hararamagun madise hawéi hagibugiñe. Aba hararamagun Elíasi luma Eliséu laru duna Hordán. 8 Ábati lanügünu Elíasi tidáü ladaüragun, aba lóuburagunu, aba labeichuni duna tau, aba lafanreinragun duna, aba hánhiñuragun lidan lumabei. 9 Lárigiñe hánhiñuragun, aba lariñagun Elíasi lun Eliséu:

—Ariñagabéi nun ka lan babusenrubei nadügün bun lubaragiñe nanügün buéi.

Lariñaga Eliséu lun:

—Busentina nibihin bián murusun lídangiñe bani sífiri.

10 Lariñaga Elíasi lun:

—Hénrenguti katei le bamuriahabei. Gama lumoun ánhana bariha danme le nanügün buéi, bibihubei le bamuriahabei. Gama lumoun ánhana marihin ban, mibihin bubéi.

11 Sunti añangüra lan éibugeina, adimureheina, aba tasaliragun aban karü lautu watu gemeti sódini, hau giñe gabayu láutiña watu gemeti aba tafanreinraguniña karü, aba lamudeirun Elíasi sielun lidan aban hiriri. 12 Dan larihini Eliséu katei le, aba lagúaragun:

—Núguchi, núguchi, le ítarabei kei súdaragu gabafutiña houn Ísüraelina!

Aba marihindigia laali lan Eliséu Elíasi.

Ábati lanügünün Eliséu ladaüragun, aba laheiridagunu lidan bián murusun. 13 Lárigiñe aba labudunu tidáü daüguaü to éiguaduboun luéi Elíasi, aba lagiribudun luagun Hordán, aba lararamagun laru duna. 14 Lárigiñe, aba labeichuni duna tau tidáü daüguaü, aba lariñagun:

—Hagéi Aburemei le Lubungiute Elíasi?

Kei labeichuni duna aba lamabeidun, ábaya lánhiñuraguni Eliséu. 15 Ha profetagu ha ñéinbaña ligibugiñe, dan harihinbalin, aba hariñagun:

—Anihein lani Elíasi sífiri luagu Eliséu guentó!

Ábati houdin lubaroun, aba habuluchagun ligibugiñe, 16 aba hariñagun lun:

—Añahein dimí-san wügüriña ganigitiña wadan. Héibuga áluahei bumaisturun, luéidügü barüla lan lani Bungiu Sífiri áhuchura luagun aban wübü o luagun lan aban fulasu wayati.

Lariñaga houn:

—Móunaha humá áluahei.

17 Gama lumoun aba héredun luagu, aba lígirun lun hóunahaniña dimí-san wügüriña hagía, aba háluahani Elíasi luagu ǘrüwa weyu, madari hamuti. 18 Dan hagiribudunbei uburugun Herikó, le buga ñein lubéi leredera Eliséu, aba lariñagun houn:

—Ariñagatinatia hun lun midin humá áluahei.

19 Ábati hariñagun lílana uburugu lun Eliséu:

—Arihabá san, maribanti fulasu le ñein lubéi uburugu le, gama lumoun mabuidunti duna, ani marandarunti múa.

20 Lariñaga Eliséu houn:

—Barǘ humá aban bésini iseri nun híchigame salu lidoun.

Aba hanügüni lun, 21 aba lidin Eliséu luagun lísensen duna, aba lachagaruni salu ñeinhin ariñageina ligía. Lariñahare Wabureme:

—Harumagüda naali duna le, máfarahanhalime, madügün ligíame lun marandarun lan múa.

22 Lúmagiñe dan ligía aba larumadun duna ítara kei lariñaguni Eliséu.

23 Lárigiñe aba lidin Eliséu Betelin. Dan amudeireina lan, aba háfuridun fiu nibureintiña lílana uburugu, aba hagumeserun añawariha lun, hariñaga:

—Wariba, helú tábulugu! Wariba, helú tábulugu!

24 Aba lagararaagun Eliséu ariha hawagun, aba líñaraguniña lidan liri Wabureme. Lidan oura ligía, aba hachülaagun bián osu áraabugiñe, aba háfarun bián-wein-biama hádangiñe nibureintiña hagía. 25 Lárigiñe aba lidin Eliséu luagun wübü Karümélu, ñéingiñe aba lagiribudun Samarioun.