1 Widü irumu lau Hosíasi dan le lagumeserunbei arúeiha, aba larúeihan darandi-aban irumu Herusalén. Hedidá tíribei lúguchu, liráü Adaíasi le Bosukátüna. 2 Buiti lóuserun Hosíasi ligibugiñe Aburemei, falá lumuti ligaburi Dawidi le lagücha lidan sun katei madireirunga luéi ni murusun.

3 Luagu disiwídü irumu lau larúeihan Hosíasi, aba lóunahani urúei Safán, le liráü Asalíasi, libari Mesulámü litenpulunrugu Aburemei, aba lariñagun lun:

4 —Beiba lumoun Ilükíasi, le fádiri le íñutimabei, bariñagame lun lun lóundaruni seinsu le anügǘbei ténpulurugun le habudahabei ha bénabubaña hámagiñe gürigia, 5 ábame hederegeruni houn ha arihubaña lau wadagimanu tuagu litenpulun Aburemei, lun hafayeiruniña ha nadagimeinbaña aransehóun ténpulu, 6 sarafangei, lábutigu wadagimanu, hama ábunagutiña, luma lun hagañeihan wewe luma dübü lun taransehóun ténpulu. 7 Bariñagame giñe lun, lun málügüdün lániña luagu seinsu le ederegeruti houn, ladüga lau arumani hawadigimari.

8 Aba labahüdagun Ilükíasi le fádiri le íñutimabei lun Safán, luagu ladarirunu liliburuna lúrudu litenpulunrugu Aburemei, aba lederegerunu líburu lun Safán, aba laliihanu. 9 Lárigiñe aba lidin Safán asubudiragüdei katei le lun urúei, lariñaga lun:

—Rǘrüguagüda hamá bumusuniña pülata le ténpulurugubei, derege hamá houn ha arihubaña lau taransehóun ténpulu.

10 Ariñagati giñe Safán lun urúei tuagu líburu to lederegeruboun Ilükíasi lun, aba laliihanu Safán lun urúei. 11 Dan laganbunbalin urúei le tariñagubei liliburuna lúrudu, aba laheiridagunu ladaüragun luougua, 12 aba lariñagun lun Ilükíasi, Aikamü le liráü Safán, Akübóru le liráü Mikaíasi, Safán le abürühabalin sun asusereduti, luma Asaíasi le lani urúei úfisi:

13 —Heiba álügüdaha luma Aburemei nuagu, hawagu lílana fulasu luma luagu sun Hudá libügürü tila líburu to adarirúboun; fagua gáñiti Aburemei woun, kei madügün habéi buga wagüchagu gasu lau le bürüwañubei tidan líburu to.

14 Aba lidin Ilükíasi, Aikamü, Akübóru, Safán luma Asaíasi arihoun profetisa Uludá to lúmari Salumu, le liráü Tiküwá libari Arasi le arihubei tau tagei daüguaü ténpulurugu. Lidan libiaman bariu lani Herusalén taganawa Uludá, dan le hadimurehanbei tun, aba tóunabun, 15 tariñaga:

—Anihán lóunabagüle Aburemei le Lubungiute Ísüraeli: "Ariñaga humá lun le óunahabalün numoun, 16 luagu nariñahare lan au le Aburemei: Nanüga aban wuribani luagun fulasu le luma hawagun lílana, ítara kei tariñaguni líburu to laliihaboun lurúeite Hudá. 17 Ladüga ígira hamaadina aba hágudahan kupali houn amu búngiugu, agañidagüdana lau hóuserun; ligía ladurangunbei nigañi kóntüra fulasu le, ani méñeguchunbei. 18 Ariñaga humá lubeiti lun lurúeite Hudá, le óunahabalün álügüdaha luma Aburemei luagu lariñahare lan giñe Aburemei le Lubungiute Ísüraeli: Ladüga bíchugun barigei lun katei le baganbubei, 19 aba bírudagun deregegua buguya bungua nun dan baganbuni le nariñagubei kóntüra fulasu le, hau sun lílana, luagu híñarawaguba lan ani gumuguagüdawa hagíame, luma luagu baheiridagunu badaüragun buougua aba bayahun nigibugiñe, au giñe luagu nóubadina, aganba náadibu. Au le Aburemei ariñagubalin bun. 20 Nígiraadibu lubeiti lun bounwen darangilañu, ábame bidin óundaragua hama bagüchagu, marihingabeime wuribani le lunbei nanügüni luagun fulasu le".

Ábati hagiribudun lóunagülegu urúei lau óunabagülei le lun.