1 Ábati lóunaagüdün urúei hawagu sun ábutigu Hudá luma Herusalén lun hadamuridagun luma. 2 Ábati lidin urúei hama sun lílana fulasu ténpulurugu, wügüriña lílana Hudá, lílana Herusalén, fádirigu, profetagu, hama sun híbiri gürigia lúmagiñe le ñǘraütimagilibei darí lumoun le wéiyatimahalibei. Aba laliihani urúei sun le lídanbei daradu le adarirubei tidan litenpulun Aburemei lau umalali héreti houn. 3 Lárigiñe aba lararamun urúei lubadu wagabu, aba lariñagun luagu ladügübei lan le lubeibei Aburemei, luagu giñe lagunfuliruba lan lau úarani lau lugumadin Aburemei luma lilurudun, luma lau daradu le bürüwañubei tidan líburu. Ánhatiña giñe sun híbiri gürigia lun daradu ligía.

4 Ábati lariñagun urúei lun Ilükíasi, fádiri le íñutimabei, luma lun habiaman fádiri luma houn ha óunigirubaña tubenari litenpulun Aburemei lun hasagaruni sun burí katei lánina ladügün kultu lun Baali luma Asera luma houn waruguma ha siélubaña tídangiñe litenpulun Aburemei, aba lidin águdei bóugudin luéi Herusalén, áraabu Sedurón, aba lanügüni baligi uburugun Beteli. 5 Lárigiñe aba lagidaruniña sun fádirigu ha meha híchugubaña lurúeitegu Hudá lun hágudahan kupali tidan burí hatenpulun gibe tubungiutegu to meha lídanboun uburugu burí lani Hudá luma geyegu lau Herusalén, hama fádirigu ha águdahabaña kupali lun Baali, lun weyu, lun hati, luma houn sun waruguma ha siélubaña lídangiñe habara. 6 Sagá lumutu tiyawa Asera to meha litenpulunruguboun Aburemei Herusaléngiñe, aba lágudunu lidan liraüraü duna le lani Sedurón darí terederun baligime, lárigiñe aba lafuruhani baligi ligía luagun burí hamúaha lílana fulasu. 7 Fui lumutu burí giñe harumun magüsi ha adügübalin ahoruhani kei aban kultu tidan litenpulun Aburemei le ñein lubéi burí meha hadaagua würiña manda tun bungiu Asera.

8 Lárigiñe aba líchugun dimurei lun hayabin sun lufadirinigu luburugute burí Hudá, aba lagünrinchagunu sun burí ténpulu lúmagiñe Geba darí Bérüsewa, le meha ñein lubéi hágudaha fádirigu kupali, aba giñe láguruni latarü le hani máfianu le meha lubenaribei Hosué, le gumadimati ñein uburugu, le luéigiñebei lubaünan lubenari uburugu. 9 Gama lumoun mídintiña meha tufadirinigu burí hatenpulun gibe tubungiutegu luagu lani Aburemei latarü Herusalén, hóurügütiña fein maganatu lébini hama híbiri fádirigu.

10 Günringua lumuti giñe Hosíasi fulasu águdaagülei le meha luágubei fulasu wayati le Ben-inomu, lun ua lan ni aban águduti liráü keisi adagaragüdüni lun Moloku. 11 Gidá lumutiña gabayu ha meha híchugubaña lurúeitegu Hudá lun weyu, ha meha tubenaribaña litenpulun Aburemei, gudá lumutu giñe karü to ayusurúboun dan ladügün kultu lun weyu. Karü burí tuguya lidan tibürürün ténpulu tareidúa, lubadu lirumun Natán-mélekü aban hádangiñe lánigu urúei ha íñugutimabaña. 12 Fui lumuti burí giñe latarü le meha hadügübei lurúeitegu Hudá lidan fulasu le íñutimabei tibiti lirumun Aasi, luma burí latarü le meha ladügübei Manasési lidan tibürürün litenpulun Aburemei, aba lachagaruni lubaligin lidoun liraüraü duna le Sedurón.

13 Lárigiñe aba lóunahan urúei agidaragüdoun hatenpulun gibe tubungiutegu to luéigiñeboun oubaü le ñéingiñe lubéi laboucha weyu libiti Herusalén, luéigiñe suru libiti wübü Oliwu, to burí meha lábunaguboun Salomón le lurúeite Ísüraeli, tun Asütárüte to habungiute Sidonna; lun Kemosu le haguariuan Moábüna, luma lun Milükómu le haguariuan Amonna. 14 Abouha lumuti giñe burí dübü luma tonpu sagüráuti, aba labuinchagüdüni fulasu le meha ñein lubéi lau habu gürigia. 15 Günringua lumuti giñe Hosíasi latarü tuma hatenpulun gibe tubungiutegu to Beteliboun, to meha lábunaguboun Heroboamü le liráü Nabatü, le afigougüdübaliña Ísüraelina, lárigiñe aba lágudunu, gudá lumutu giñe tiyawa burí Asera.

16 Dan lagiribudunbei Hosíasi, aba larihini umúahaü burí le luágubei wübü, aba lóunahan asagarei abun burí le ñeinbei lidan, aba láguduni ligibuagu latarü awiyedagüdei. Ítara liña lagunfulirun lererun Aburemei le meha lariñagubei profeta le meha ariñagubalin katei le. 17 Lárigiñe aba lálügüdahan, lariñaga:

—Kagia umuaha lira, le narihubei yágüta?

Hariñaga lílana uburugu lun:

—Lumúaha profeta le meha ñǘbuinbei Hudaagiñe, aba lariñaguni le badügübei guentó lau lani Beteli latarü.

18 Ábati lariñagun Hosíasi:

—Ígira huméi, maguuralá ni aban luagu labu. Ítara liña inebewa lan lúgubu, luma lúgubu profeta le buga ñǘbuinbei Samariagiñe.

19 Fui lumutu burí Hosíasi hatenpulun gibe tubungiutegu to meha Samariaboun, to burí meha hábunaguboun lurúeitegu Ísüraeli, agañidagüdei Aburemei, ítara kei buga ladüga uburugu Beteli. 20 Lárigiñe aba láfaraguniña sun tufadirinigu hatenpulun gibe tubungiutegu ha ñéinbaña ligibuagu latarü, aba lágudahan habu gürigia luagu burí latarü ligía. Lárigiñe aba lagiribudun Herusaléun.

21 Aba líchugun urúei dimurei houn sun lílana fulasu lun hefeduhani Luéyuri Esefuruni lidan liri Aburemei le Habungiute, keisi labürüdün tidan liliburuna daradu. 22 Mefeduhóunñahagili bugaha aban Luéyuri Esefuruni libe le, kei lidan dan le hagumadihanbei ábutigu uburugu Ísüraeli, ni lidan sun hadaani lurúeitegu Ísüraeli luma Hudá. 23 Lidan lidisiwídün lirumudiri larúeihan Hosíasi Herusalén lefeduhóua Luéyuri Esefuruni ligía lidan liri Aburemei.

24 Gumuguagüda lumutiña giñe Hosíasi burú hama garíaahatiña, haguariuan burí iduheñu hama burí híbiri guáriua, luma burí katei iyereeguti le unbei ladügǘwa kultu Hudá luma Herusalén. Ladügünbalin ítara, lun lagunfulirun lau lúrudu le bürüwañubei tidan líburu to ladariruboun fádiri Ilükíasi tidan litenpulun Aburemei. 25 Úati bugaha ni aban urúei ni lubaragiñe ni lárigiñe ederegeraguti lungua lun Aburemei kei ligía tau sun lanigi, tau sun luani luma lau sun lere keisi lariñaguni lilurudun Moisesi.

26 Lau sun lira, ábanmeme le lun ligañi Aburemei, gáñiti lun Hudá luagu anabawaguni le buga ladügübei Manasési lun. 27 Ligía lariñagunbei Aburemei luagu lagidarubei lan Hudá liñúarürugugiñe ítara kei buga ladüga lun Ísüraeli, luagu giñe lamaharuba lan lun Herusalén, uburugu le buga lanúadirubei, tuma ténpulu to buga uáguboun lariñaga luagu tídanba lan laganawa liri.

28 Le líbiri asusereduti luáguti Hosíasi luma burí katei le ladügübei, anihein bürüwañu tidan liliburuna asusereduti hawaguti lurúeitegu Hudá. 29 Aba liabin Nekáu, le lurúeite Ehiptu luagun duna Éufüratesi lun líderaguni lurúeite Asiria. Aba láfuridun urúei Hosíasi lun lidin lubaroun; gama lumoun ítara kei larihini Nekáu ñein uburugu Megidu, ítara láfaruni. 30 Aba híchuguni lani úfisigu tidoun aban karü, aba hanügüni Megidugiñe lun Herusaléun, aba hábununi lidan lumuaha. Ábati hanügüni lílana fulasu Hoakasi le liráü Hosíasi, aba híchuguni urúeime leweñegua lúguchi.

31 Wein-ǘrüwa irumu lau Hoakasi dan le lagumeserunbei arúeiha, aba larúeihan ǘrüwa hati Herusalén. Amutáli tíribei lúguchu, Libünáana, liráü Heremíasi. 32 Gama lumoun wuribati lóuserun Hoakasi ligibugiñe Bungiu, kéigubeirügü meha hóuserun lagüchagu. 33 Daü lumuti Nekáu le urúei Ehiptuna uburugu Ribülá, lóubawagu Amatü, lun marúeihanbei lan uburugu Herusalén, fosuláña lílana fulasu lun hafayeihan sedü-milu-bián-san-ǘrüwa-wein líburu pülata luma ǘrüwa-wein-duusu líburu golu keisi liseinsuna gumadi. 34 Aba líchuguni Nekáu le urúei Ehiptuna Eliakímü le liráü Hosíasi urúeime leweñegua lúguchi, aba lasansiruni liri, aba líchugun Hoakimü luagu, ánheinti Hoakasi, aba lanügüni Ehiptun, le ñein lubéi lounwe.

35 Aba Lederegeruni Hoakimü pülata luma golu le lamuriahabei Nekáu lun, lun lasagarubei lan, aba lafosuruniña lílana fulasu lun híchugun ídemuei. Aba líchuguni kada aban golu luma pülata le uágubei lariñawagúa lun, lun lederegerun lun Nekáu le urúei Ehiptuna.

36 Wein-seingü irumu lau Hoakimü dan le lagumeserunbei arúeiha, aba larúeihan unsu irumu Herusalén. Sebudá tíribei lúguchu, Rumaana, liráü Pedaíasi. 37 Gama lumoun wuribati ligaburi ligibugiñe Aburemei ítara kei meha lagüchagu.