1 Lidan irumu wein-sedü lánina larúeihan Heroboamü le lurúeite Ísüraeli, ligía lagumeserun Asaríasi, le liráü Amasíasi le lurúeite Hudá arúeiha. 2 Disisi irumu lau dan le lagumeserunbei arúeiha, aba larúeihan dimí-san-biama irumu Herusalén. Hekolíasi tíribei lúguchu, Herusalénna.

3 Buiti ligaburi Asaríasi ligibugiñe Bungiu kei meha Amasíasi le lúguchi. 4 Lau sun lira magidarúntu burí hatenpulun gibe tubungiutegu to ídanboun hasigira gürigia adagaragüda luma águdaha kupali. 5 Aba labeichuni Bungiu urúei lau líchugun lépüra luagu darí weyu lounwen, aba lubeiti laganóun urúei daüñu tidan amu rumu turageirugu lani palasiu, aba ladügüni Hotamü le liráü lifisiute le lánina agumadihani fulasurugu.

6 Le líbiri asusereduti lun Asaríasi luma sun burí katei le ladügübei, anihein bürüwañu tidan liliburuna asusereduti hawagu lurúeitegu Hudá. 7 Danbei lounwen Asaríasi, aba hábununi hama lagüchagu luburuguterugu Dawidi. Aba larúeihan Hotamü le liráü leweñegua.

8 Lidan lanügün larúeihan Asaríasi le lurúeite Hudá darandi-widü irumu, ligía lagumeserun Sakaríasi le liráü Heroboamü arúeiha Ísüraeli, aba larúeihan sisi hati Samaria. 9 Gama lumoun mabuidunti lóuserun ligibugiñe Bungiu, kei hóuserun lagüchagu, madireirúnti luéi burí figóu le aubei lafigougüdaña Heroboamü le liráü Nabatü Ísüraelina.

10 Aba leledegun Salumu, le liráü Habesi lubá, aba láfaruni uburugu Ibüleámü, aba larúeihan leweñegua.

11 Le líbiri asusereduti lun Sakaríasi, anihein bürüwañu tidan liliburuna asusereduti hawagu lurúeitegu Ísüraeli. 12 Ítara liña lagunfulirun le buga lariñagubei Bungiu lun Heú, dan lariñagunbei lun luagu harúeihaba lan lirahüñü uburugu Ísüraeli, darí hagadürün linebanfangu.

13 Luagu lanügün larúeihan Usíasi, le lurúeite Hudá darandi-nefu irumu, ligía lagumeserun Salumu le liráü Habesi arúeiha. Gama lumoun ábanrügüñein hati larúeihan uburugu Samaria, 14 ladüga aban liabin Manaemü, le liráü Gadü, Tirüságiñe lun Samarioun, aba láfaruni Manaemü Salumu, aba larúeihan leweñegua.

15 Le líbiri asusereduti lun Salumu, luma leledegun luba Sakaríasi, anihein bürüwañu tidan liliburuna asusereduti houn lurúeitegu Ísüraeli.

16 Ábati lagünrinchaguni Manaemü uburugu Tífüsa, aba líweruhani sun katei le ñeinbei luma lidan sun lumúan, lúmagiñe Tirüságiñe. Bougua lumuti giñe haragei sun würiña ha dageinabaña ñein. Ladügünbalin lira, ladüga madaarun hamani lubenari uburugu lubá.

17 Luagu lanügün larúeihan Asaríasi, le lurúeite Hudá darandi nefu irumu, ligía lagumeserun Manaemü, le liráü Gadi arúeiha luagu Ísüraeli, aba larúeihan diisi irumu Samaria. 18 Gama lumoun mabuidunti ligaburi ligibugiñe Bungiu, madireirúnti luéi burí figóu le aubei lafigougüdaña Heroboamü le liráü Nabatü Ísüraelina.

Lidan lidaani Manaemü, 19 aba lebelurun Pulu le lurúeite Asiria fulasurugún lau erei, aba lederegerun Manaemü ǘrüwa-wein-duusu milu sisi-san líburu pülata lun, lun líderaguni éredagüdei larúeihan. 20 Lun lafayeiruni Manaemü seinsu le lun lurúeite Asiria, aba laguburahaniña rísitiña lóugiñe aban líburu pülata. Ítara liña lagiribudun lurúeite Asiria lageiroun, merederagunhali buga lidan fulasu le.

21 Le líbiri asusereduti lun Manaemü luma sun burí katei le ladügübei, anihein bürüwañu tidan liliburuna asusereduti hawagu lurúeitegu Ísüraeli. 22 Lárigiñe lounwen, aba larúeihan Pekaíasi le liráü leweñegua.

23 Luagu dimí-san lirumudiri larúeihan Asaríasi le lurúeite Hudá, ligía lagumeserun Pekaíasi le liráü Manaemü arúeiha luagu Ísüraeli, aba larúeihan bián irumu Samaria. 24 Gama lumoun mabuidunti ligaburi ligibugiñe Bungiu, madireirúnti luéi burí figóu le aubei lafigougüdaña Heroboamü le liráü Nabatü Ísüraelina.

25 Gama lumoun aba leledegun aban lani úfisi gíriti Peka, liráü Remalíasi lubá, hau dimí-san wügüriña Galaadüna luma, aba lageindagun luma tidan lani palasiu, aba láfaruni, aba larúeihan leweñegua.

26 Le líbiri asusereduti lun Pekaíasi luma sun burí katei le ladügübei, anihein bürüwañu tidan liliburuna asusereduti hawagu lurúeitegu Ísüraeli.

27 Luagu lanügün larúeihan Asaríasi le lurúeite Hudá dimí-san-bián irumu, ligía lagumeserun Peka le liráü Remalíasi arúeiha Ísüraeli, aba larúeihan wein irumu Samaria. 28 Gama lumoun mabuidunti ligaburi ligibugiñe Bungiu, madireirúnti luéi burí figóu le aubei lafigougüdaña Heroboamü le liráü Nabatü Ísüraelina.

29 Lidan dan le Peka lan urúeibei Ísüraeli, aba liabin Tigülátü-Pileserü, le lurúeite Siria, aba lagañeiruni Iyón, Aweli-betü-maaká, Hanóa, Kedesi, Asoru, Galaadü, Galiléa, luma sun lóubawagu Nefütalí aba lanügüniña lílana adaürǘwa Asirioun. 30 Ábati leledegun Oseasi le liráü Elá lubá Peka, le liráü Remalíasi, aba láfaruni. Aba larúeihan leweñegua luagu lanügün larúeihan Hotamü le liráü Oseasi wein irumu.

31 Le líbiri asusereduti lun Peka, luma sun burí katei le ladügübei, anihein bürüwañu tidan liliburuna asusereduti hawagu lurúeitegu Ísüraeli.

32 Lidan libiaman lirumudiri larúeihan Peka, le liráü Remalíasi, ligía lagumeserun Hotamü, le liráü Usíasi arúeiha. 33 Wein-seingü irumu lau dan le lagumeserunbei arúeiha, aba larúeihan disisi irumu Herusalén. Herusá tíribei lúguchu, liráü Sadoku.

34 Buiti ligaburi Hotamü ligibugiñe Bungiu, kei meha ligaburi Usíasi le lúguchi, 35 adüga lumuti tubenari litenpulun Bungiu le íñugiñebei. Lau sun lira, magidarúntu burí hatenpulun gibe tubungiutegu to ídanboun burí hasigira gürigia adagaragüda luma águdaha kupali.

36 Le líbiri asusereduti lun Hotamü luma burí sun katei le ladügübei, anihein bürüwañu tidan liliburuna asusereduti hawagu lurúeitegu Hudá.

37 Lidoun dan ligía, aba lagumeserun Bungiu óunahei Resín le lurúeite Siria luma Peka le liráü Remalíasi luagun Hudá. 38 Dan lóunwenbei Hotamü, aba labunún hama lagüchagu luburuguterugu Dawidi. Aba larúeihan Aasi le liráü leweñegua.